వెనిజులాలో మారుతున్న సమీకరణాలు.. భారత్‌కు భారీ ప్రయోజనాలు?

Venezuela

Venezuela: అమెరికా మాజీ అధ్యక్షుడు డొనాల్డ్ ట్రంప్ ఇప్పటికే దీనిపై సంకేతాలు ఇచ్చారు. అమెరికా చమురు కంపెనీలు వెనిజులాలో ప్రవేశించి దెబ్బతిన్న మౌలిక సదుపాయాలను మరమ్మతు చేసి ఉత్పత్తిని పునరుద్ధరించవచ్చని విశ్లేషకులు భావిస్తున్నారు. ఆంక్షలు సడలించిన వెంటనే వాణిజ్యం పుంజుకుంటుందని కెప్లర్ విశ్లేషకుడు నిఖిల్ దూబే పేర్కొన్నారు.

భారత రిఫైనరీలకు కలిగే లాభం

వెనిజులా నుండి వచ్చే ‘భారీ ముడి చమురు’ను ప్రాసెస్ చేయడానికి భారతీయ రిఫైనరీలు సాంకేతికంగా పూర్తి సామర్థ్యాన్ని కలిగి ఉన్నాయి. అమెరికా నాయకత్వంలో వెనిజులా చమురు రంగం పునర్వ్యవస్థీకరణ జరిగితే అది భారత్‌కు ఆర్థికంగా, వ్యూహాత్మకంగా పెద్ద ప్లస్ అవుతుంది.

బకాయిల వసూలుకు మార్గం సుగమం

1 బిలియన్ డాలర్ల బకాయిలు: వెనిజులా ప్రభుత్వం నుండి భారతీయ చమురు సంస్థ ONGC విదేశ్ లిమిటెడ్ (OVL) కు రావాల్సిన సుమారు 1 బిలియన్ డాలర్ల (దాదాపు రూ. 8,300 కోట్లు) పెండింగ్ చెల్లింపుల వసూలుకు ఇప్పుడు మార్గం సుగమం కావచ్చు.

Also Read: జనవరి 13న టాటా పంచ్ ఫేస్‌లిఫ్ట్ లాంచ్!

ఆగిపోయిన ఉత్పత్తి: ఆంక్షల కంటే ముందు భారత్ వెనిజులా నుండి రోజుకు 4 లక్షల బ్యారెళ్ల చమురును దిగుమతి చేసుకునేది. వెనిజులా వార్షిక ఎగుమతుల్లో భారత్, చైనాల వాటా 35% ఉండేది. 2020లో అమెరికా కఠిన ఆంక్షలు విధించడంతో ఈ దిగుమతులు పూర్తిగా నిలిచిపోయాయి.

చమురు క్షేత్రాల్లో భారత భాగస్వామ్యం

తూర్పు వెనిజులాలోని సాన్ క్రిస్టోబల్ చమురు క్షేత్రంలో OVL కు 40% వాటా ఉంది. అలాగే కారాబోబో-1 భారీ చమురు బ్లాక్‌లో OVL కు 11%, ఇండియన్ ఆయిల్ (IOC), ఆయిల్ ఇండియాకు కలిపి 3.5% వాటా ఉంది. అమెరికా పర్యవేక్షణలో వెనిజులా ప్రభుత్వ సంస్థ PDVSA పునర్నిర్మాణం జరిగితే, ఈ ప్రాజెక్టులన్నీ మళ్ళీ వేగవంతం అవుతాయి.

ఏడాదిలోనే పెరగనున్న ఉత్పత్తి

ప్రస్తుతం ఆంక్షల వల్ల సాంకేతికత అందక సాన్ క్రిస్టోబల్ క్షేత్రంలో ఉత్పత్తి రోజుకు 5,000-10,000 బ్యారెళ్లకు పడిపోయింది. అయితే ఆంక్షలు తొలగిస్తే గుజరాత్ నుండి డ్రిల్లింగ్ పరికరాలను వేగంగా వెనిజులాకు తరలించి ఉత్పత్తిని ప్రారంభించవచ్చు. ఆధునిక సాంకేతికతతో ఈ ఉత్పత్తిని రోజుకు 80,000 నుండి 1 లక్ష బ్యారెళ్ల వరకు పెంచవచ్చు. దీనివల్ల మధ్యప్రాచ్య దేశాలపై చమురు ఆధారితం తగ్గి, ప్రపంచ ఇంధన మార్కెట్‌లో భారత్ మరింత బలోపేతం అవుతుంది.

Follow us