Putin : పుతిన్ భారత్ పర్యటన లో టైట్ సెక్యూరిటీ.. కమెండోలు, స్నైపర్, డ్రోన్లు, ఏఐ!

రష్యా అధ్యక్షుడి భారత పర్యటన కోసం.. పటిష్ఠమైన భద్రతా ఏర్పాట్లు చేస్తున్నారు. పుతిన్ చుట్టూ 5 అంచెల భద్రతను మోహరించనున్నారు. కమెండోలు, స్నైపర్లు, డ్రోన్లు, ఏఐ సాయంతో.. పుతిన్ పర్యటన మొత్తం.. అణువణువూ గాలింపు చేపట్టనున్నారు. ఇక రష్యా సెక్యూరిటీతోపాటు.. భారత ఎన్‌ఎస్‌జీ కమెండోలు కూడా పుతిన్ భద్రతలో భాగం కానున్నారు. మరోవైపు.. పుతిన్ కోసం.. అత్యాధునిక వాహనాన్ని సిద్ధం చేశారు.

ప్రధానమంత్రి నరేంద్ర మోదీ ఆహ్వానం మేరకు.. భారత్-రష్యా వార్షిక సమ్మిట్‌లో పాల్గొనేందుకు రష్యా అధ్యక్షుడు వ్లాదిమిర్ పుతిన్ భారత పర్యటనకు రానున్నారు. ఈ క్రమంలోనే పుతిన్‌కు అత్యున్నత స్థాయి భద్రత కల్పించేందుకు భారత ప్రభుత్వం చర్యలు చేపట్టింది. రష్యా అధ్యక్షుడికి ఐదు అంచెల భద్రతా వలయాన్ని సిద్ధం చేసింది. రష్యా ప్రెసిడెన్షియల్ సెక్యూరిటీ సర్వీస్.. భారత నేషనల్ సెక్యూరిటీ గార్డ్ (ఎన్ఎస్‌జీ) కమాండోలతో సహా అత్యాధునిక టెక్నాలజీని కేంద్ర ప్రభుత్వం రంగంలోకి దించింది.

డిసెంబర్ 4వ తేదీన సాయంత్రం పుతిన్ ఢిల్లీకి చేరుకోనున్నారు. ఆయన పర్యటనలో భాగంగా ప్రధాని మోదీతో విందు.. రాష్ట్రపతి భవన్‌లో లాంఛనప్రాయంగా స్వాగతం, రాజ్‌ఘాట్‌లోని మహాత్మా గాంధీ స్మారక చిహ్నం సందర్శన, హైదరాబాద్ హౌస్‌లో సమ్మిట్, భారత్ మండపంలో పలు కార్యక్రమాలు ఏర్పాటు చేశారు. ఇక ఈ పుతిన్ పర్యటనలోనే భారత్, రష్యా మధ్య కీలక రక్షణ ఒప్పందం కుదిరే అవకాశాలు ఉన్నాయని సంబంధిత వర్గాలు వెల్లడించాయి.

పుతిన్ భారత పర్యటనకు పూర్తి భద్రత కల్పించేందుకు.. రష్యాకు చెందిన నాలుగు డజన్లకు పైగా భద్రతా సిబ్బంది ఇప్పటికే ఢిల్లీకి చేరుకున్నారు. ఢిల్లీ పోలీసులు, ఎన్ఎస్‌జీ అధికారులతో కలిసి.. రష్యా సెక్యూరిటీ.. పుతిన్ ప్రయాణించే మార్గాలను పరిశుభ్రం చేస్తున్నారు. ఈ భద్రతా వలయంలో స్నైపర్‌లు, డ్రోన్‌లు, జామర్‌లు, ఆర్టిఫిషియల్ ఇంటెలిజెన్స్ (ఏఐ) పర్యవేక్షణ, ఫేషియల్ రికగ్నిషన్ కెమెరాలు వంటి అత్యాధునిక టెక్నాలజీ పరికరాలను ఉపయోగించనున్నారు.

పుతిన్ భారత్‌‍లో అడుగుపెట్టిన వెంటనే ఈ ఐదు అంచెల భద్రతా వలయం యాక్టివ్ కానుంది. బయటి వలయాల్లో ఢిల్లీ పోలీసులు.. ఎన్‌ఎస్‌జీ ఉండగా.. లోపలి వలయాలను రష్యా ప్రెసిడెన్షియల్ సెక్యూరిటీ నిర్వహిస్తుంది. ప్రధాని మోదీతో ఉన్నప్పుడు.. ప్రధానమంత్రి రక్షణ బాధ్యతలు చూసే స్పెషల్ ప్రొటెక్షన్ గ్రూప్ (ఎస్‌పీజీ) కమాండోలు కూడా లోపలి వలయంలో చేరతారు.

ఆరస్ సెనట్
పుతిన్ కోసం రష్యా నుంచి ప్రత్యేకంగా ‘ఆరస్ సెనట్’ అనే అత్యంత పటిష్టమైన సాయుధ లగ్జరీ లిమోసిన్‌ కారును కూడా ఢిల్లీకి తీసుకువస్తున్నారు. రష్యా అధ్యక్షుడు ఉపయోగించే ఈ సాయుధ లగ్జరీ లిమోసిన్‌ను చక్రాల కోట అని కూడా పిలుస్తారు. దీన్ని మాస్కో నుంచి ప్రత్యేకంగా ఢిల్లీకి తీసుకువస్తున్నారు. ఈ ఏడాది ప్రారంభంలో చైనాలో జరిగిన ఎస్‌సీఓ సమ్మిట్ సమయంలో కూడా పుతిన్ ఇదే ఆరస్ సెనట్‌లో ప్రధాని మోదీతో కలిసి ప్రయాణించడం విశేషం.