ఇరాన్‌లో చిక్కుకున్న భారతీయులు.. కేంద్రం కీల‌క నిర్ణ‌యం!

Iran

Indians: ఇరాన్‌లో నెలకొన్న హింసాత్మక పరిస్థితులపై భారత ప్రభుత్వం ఆందోళన వ్యక్తం చేస్తోంది. నిరసనకారుల ఆందోళనలు ఉధృతమవుతున్న నేపథ్యంలో అక్కడ చిక్కుకున్న భారతీయ పౌరులను సురక్షితంగా బయటకు తీసుకురావడానికి ప్రభుత్వం అత్యవసర ప్రణాళికను సిద్ధం చేస్తోంది. అందుతున్న సమాచారం ప్రకారం.. తరలించబడే వారి మొదటి బృందాన్ని రేపే విమానాల ద్వారా స్వదేశానికి చేర్చే అవకాశం ఉంది.

ఇరాన్‌లో మారుతున్న పరిస్థితుల దృష్ట్యా స్వదేశానికి తిరిగి రావాలనుకునే భారతీయ పౌరుల ప్రయాణాన్ని సులభతరం చేసేందుకు విదేశీ వ్యవహారాల మంత్రిత్వ శాఖ సన్నాహాలు చేస్తోందని మూలాలు తెలిపాయి. టెహ్రాన్‌లోని భారత రాయబార కార్యాలయం వివిధ ప్రాంతాల్లోని భారతీయ విద్యార్థులను సంప్రదించడం ప్రారంభించిందని, ఎవరు దేశం విడిచి వెళ్లాలనుకుంటున్నారో వారి వివరాలను సేకరిస్తోందని ప్రభుత్వ వర్గాలు తెలిపాయి. అనేక ప్రాంతాలలో ఇంటర్నెట్ సేవలు నిలిచిపోవడం, ఫోన్ లైన్లు సరిగ్గా పనిచేయకపోవడంతో ఈ ప్రక్రియను అధికారులు వ్యక్తిగతంగా నిర్వహిస్తున్నారు.

భారతీయ విద్యార్థుల సమాచారాన్ని సేకరిస్తున్న అధికారులు

ఇంటర్నెట్ కనెక్టివిటీ అందుబాటులో లేనందున, టెలికమ్యూనికేషన్ వ్యవస్థలు నమ్మదగ్గవిగా లేనందున విద్యార్థులను గుర్తించడానికి, సమాచారాన్ని సేకరించడానికి రాయబార కార్యాలయ అధికారులు క్షేత్రస్థాయిలో పనిచేస్తున్నారు అని ఒక ప్రభుత్వ మూలం వెల్లడించింది. భద్రతా పరిస్థితులను ఎప్పటికప్పుడు సమీక్షిస్తూ భారతీయ పౌరులను సురక్షితంగా వెనక్కి తీసుకురావడానికి తగిన ఏర్పాట్లు వేగంగా జరుగుతున్నాయి.

Also Read: రేపు బ్యాంకులు ఎక్కడెక్కడ పని చేయవు?

ఇరాన్‌లో నిరసనలు ఎప్పుడు ప్రారంభమయ్యాయి?

ఇరాన్‌లో జరుగుతున్న భారీ నిరసనల మధ్య భారతీయ విద్యార్థుల భద్రతపై ఆందోళనలు పెరిగాయి. గత నెల చివరలో ఇరానియన్ రియాల్ విలువ భారీగా పడిపోవడంతో ఈ అశాంతి ప్రారంభమైంది. అప్పటి నుండి ఇది దేశంలోని మొత్తం 31 ప్రావిన్సులకు వ్యాపించి, ఇప్పుడు పెద్ద రాజకీయ ప్రదర్శనలుగా మారింది. దేశవ్యాప్త నిరసనల అణచివేత చర్యల్లో కనీసం 3,428 మంది మరణించారని మానవ హక్కుల సంఘాలు పేర్కొన్నాయి. గత కొన్ని రోజులుగా అక్కడ పరిస్థితులు వేగంగా దిగజారాయి.

అధికారిక అంచనాల ప్రకారం.. విద్యార్థులతో కలిపి 10,000 కంటే ఎక్కువ మంది భారతీయులు ప్రస్తుతం ఇరాన్‌లో నివసిస్తున్నారు. బుధవారం భారత్ అక్కడ ఉన్న తన పౌరులందరికీ అందుబాటులో ఉన్న మార్గాల ద్వారా దేశాన్ని విడిచిపెట్టాలని, ఇరాన్‌కు అనవసర ప్రయాణాలను నివారించాలని సూచించింది.

అడ్వైజరీలో ఏముంది?

టెహ్రాన్‌లోని భారత రాయబార కార్యాలయం జారీ చేసిన అధికారిక అడ్వైజరీలో.. విద్యార్థులు, యాత్రికులు, వ్యాపారవేత్తలు, పర్యాటకులు కమర్షియల్ విమానాలు లేదా ఇతర అందుబాటులో ఉన్న రవాణా మార్గాల ద్వారా ఇరాన్ విడిచి వెళ్లాలని కోరింది.

Follow us