యుద్ధం ఎఫెక్ట్‌.. వారి ఉద్యోగాలు కూడా డౌటే?!

Restaurant Kitchens

Restaurant Kitchens: మధ్యప్రాచ్యంలో పెరుగుతున్న ఉద్రిక్తతలు ప్రపంచవ్యాప్త సంక్షోభానికి దారితీశాయి. దీని ప్రభావం ఇప్పుడు భారతదేశంలోని ఫుడ్ సర్వీస్ సెక్టార్ (ఆహార సేవా రంగం)పై స్పష్టంగా కనిపిస్తోంది. దీనికి ప్రధాన కారణం లిక్విఫైడ్ పెట్రోలియం గ్యాస్ కొరత.

హోర్ముజ్ జలసంధి మార్గంలో ఆటంకాలు ఏర్పడటంతో భారతదేశంలో ఎల్‌పీజీ సంక్షోభం మరింత ముదిరే ప్రమాదం ఉంది. ఒకవేళ ఈ యుద్ధం సుదీర్ఘకాలం కొనసాగితే ఉద్యోగుల తొలగింపు, వేతన కోతలు, వ్యాపారాలపై తీవ్ర ప్రభావం పడే అవకాశం ఉంది.

సంక్షోభం ఎంత తీవ్రంగా ఉంది?

ఎల్‌పీజీ లభ్యతను మెరుగుపరుస్తామని ప్రభుత్వం హామీ ఇచ్చినప్పటికీ తమకు తగినంత కమర్షియల్ ఎల్‌పీజీ సిలిండర్ల సరఫరా అందడం లేదని రెస్టారెంట్, క్యాటరింగ్ పరిశ్రమ వర్గాలు చెబుతున్నాయి. దీనివల్ల వ్యాపార కార్యకలాపాలను కొనసాగించడం అత్యంత కష్టతరంగా మారుతోంది. పరిస్థితి అనిశ్చితంగా ఉందని, పరిస్థితులు ఎప్పుడు సాధారణ స్థితికి వస్తాయో తెలియడం లేదని పలువురు వ్యాపారులు ఆవేదన వ్యక్తం చేస్తున్నారు.

Also Read: ప్రసూతి సెలవులపై సుప్రీంకోర్టు సంచలన తీర్పు.. మూడు నెలల నిబంధన రద్దు!

ఓ ప్ర‌ముఖ మీడియాతో మాట్లాడిన రెస్టారెంట్ యజమాని అంజన్ ఛటర్జీ.. ప్రస్తుతం ఈ రంగం మొత్తం ఆందోళనలో ఉందని తెలిపారు. పరిస్థితులు మెరుగుపడకపోతే ఈ పరిశ్రమలో తక్కువ స్థాయిలో పనిచేసే ఉద్యోగులపైనే దీని ప్రభావం ఎక్కువగా ఉంటుందని ఆయన హెచ్చరించారు.

ఎవరిపై ప్రభావం ఎక్కువగా ఉంటుంది?

ఈ సంక్షోభం వల్ల ముఖ్యంగా చిన్న రెస్టారెంట్లు, వీధి పక్కన ఉండే హోటళ్లు, క్యాటరర్లు, క్లౌడ్ కిచెన్ నిర్వాహకులు తీవ్ర ఇబ్బందులు పడుతున్నారు. వీరిలో చాలా మంది ఇప్పటికే తమ వ్యాపారాలను మూసివేశారు. నేషనల్ రెస్టారెంట్ అసోసియేషన్ ఆఫ్ ఇండియా (NRAI) అధ్యక్షుడు సాగర్ దర్యాణి మాట్లాడుతూ.. చిన్న వ్యాపారులు నష్టాలను తట్టుకోలేరని, వారు తప్పనిసరి పరిస్థితుల్లో ఉద్యోగులను తొలగించాల్సి వస్తుందని పేర్కొన్నారు. పెద్ద సంస్థలు కొంతకాలం పాటు నష్టాలను భరించగలిగినప్పటికీ వారి వ్యాపార కార్యకలాపాలపై ఇది ప్రతికూల ప్రభావం చూపుతుంది.

Follow us