జపాన్లో భారీ భూకంపం!
భద్రతా కారణాల దృష్ట్యా పలు కీలక సేవలను తాత్కాలికంగా నిలిపివేశారు. ముఖ్యంగా ఎలాంటి ప్రమాదాలు జరగకుండా బుల్లెట్ రైలు సేవలను కొంతకాలం పాటు ఆపివేశారు.
- Author : Gopi
Date : 20-04-2026 - 3:51 IST
Published By : Hashtagu Telugu Desk
Japan Earthquake: జపాన్లో సోమవారం సంభవించిన శక్తివంతమైన భూకంపం ప్రజలను భయాందోళనకు గురిచేసింది. రిక్టర్ స్కేల్పై దీని తీవ్రత సుమారు 7.5గా నమోదైంది. దేశంలోని ఈశాన్య తీరానికి సమీపంలో సముద్రంలో ఈ భూకంపం సంభవించడంతో అధికారులు వెంటనే సునామీ హెచ్చరికలను జారీ చేశారు. జపాన్ వాతావరణ సంస్థ సమాచారం ప్రకారం.. భూకంప కేంద్రం భూమికి సుమారు 10 కిలోమీటర్ల లోతులో ఉండటంతో దీని ప్రభావం చాలా ప్రమాదకరంగా మారింది. ఈ ప్రకంపనల తర్వాత తీర ప్రాంతాల్లో 3 మీటర్ల ఎత్తు వరకు సునామీ అలలు వచ్చే అవకాశం ఉందని అధికారులు హెచ్చరించారు.
అప్రమత్తమైన ప్రభుత్వం
ప్రభుత్వం తక్షణమే అత్యవసర చర్యలు చేపట్టి ప్రభావిత ప్రాంతాలైన ఇవాటే, అయోమోరి, హక్కైడోలలో నివసించే ప్రజలను సురక్షిత ప్రాంతాలకు వెళ్లాలని సూచించింది. ప్రధాని సానాయే తకైచి కూడా ప్రజలకు విజ్ఞప్తి చేస్తూ.. ఏమాత్రం ఆలస్యం చేయకుండా ఎత్తైన ప్రాంతాలకు లేదా సహాయక శిబిరాలకు వెళ్లాలని కోరారు. భూకంపం ఎంత తీవ్రంగా ఉందంటే అనేక చోట్ల ప్రజలు కనీసం నిలబడలేకపోయారు. జపాన్ భూకంప తీవ్రతను కొలిచే వ్యవస్థలో దీనిని ‘అప్పర్ 5’ స్థాయి ప్రకంపనగా గుర్తించారు. ఇది చాలా ప్రమాదకరమైన విభాగం కిందకు వస్తుంది.
Also Read: రోహిత్ శర్మ, విరాట్ కోహ్లీకి పెరగనున్న కష్టాలు!
Old visuals of Earthquake in Japan https://t.co/oLWVwO9mjE pic.twitter.com/AiXQOvzHyW
— Saturn World News (@SaturnWorldNews) April 20, 2026
నిలిచిపోయిన బుల్లెట్ రైళ్లు
భద్రతా కారణాల దృష్ట్యా పలు కీలక సేవలను తాత్కాలికంగా నిలిపివేశారు. ముఖ్యంగా ఎలాంటి ప్రమాదాలు జరగకుండా బుల్లెట్ రైలు సేవలను కొంతకాలం పాటు ఆపివేశారు. టీవీ ఛానెళ్లలో నిరంతరం అలర్ట్ మెసేజ్లు ప్రసారం చేస్తూ ప్రజలను అప్రమత్తం చేస్తున్నారు. సునామీ వల్ల నష్టం తగ్గించడానికి కొన్ని రేవుల్లో ఉన్న ఓడలను సముద్రం లోపలికి తరలించినట్లు నివేదికలు చెబుతున్నాయి. ప్రస్తుతం భారీ స్థాయిలో ప్రాణ, ఆస్తి నష్టం జరిగినట్లు అధికారికంగా ఎలాంటి ధ్రువీకరణ రాలేదు. కానీ యంత్రాంగం పరిస్థితిని నిరంతరం పర్యవేక్షిస్తోంది. సహాయక, రెస్క్యూ టీమ్లను అప్రమత్తంగా ఉంచారు.
Follow us
