India vs Canada: భారత్ వర్సెస్ కెనడా.. పూర్తిగా దెబ్బతిన్న సంబంధాలు

India vs Canada: భారత్, కెనడాల మధ్య రోజురోజుకూ ఉద్రిక్తతలు పెరుగుతున్నాయి. ఖలిస్తాన్‌కు మద్దతిచ్చే ఉగ్రవాదులకు ఆశ్రయం కల్పిస్తామని కెనడా ప్రధాని జస్టిన్ ట్రూడో చేసిన ప్రకటన కారణంగా ఇరు దేశాల మధ్య సంబంధాలు పూర్తిగా దెబ్బతిన్నాయి. ఒకవైపు ఖలిస్తానీ ఉగ్రవాదులపై చర్యలు తీసుకోవాలని మోడీ ప్రభుత్వం కెనడాను నిరంతరం డిమాండ్ చేస్తుంటే, మరోవైపు, కెనడా ప్రధాని ఖలిస్తానీ ఉగ్రవాదులకు బహిరంగంగా మద్దతు ఇవ్వడం శోచనీయం.గత మూడు రోజుల్లో అంటే 72 గంటల్లో ఇలాంటి ఘటనలు చాలానే జరిగాయి. వీటి కారణంగా ఇరు దేశాల మధ్య సంబంధాల మధ్య అంతరం మరింతగా పెరిగింది. (India vs Canada)

ఈ ఏడాది జూన్ 18న కెనడాలోని సర్రే నగరంలో ఖలిస్తానీ మద్దతుదారు హర్దీప్ సింగ్ నిజ్జర్ హత్యకు గురయ్యాడు ఈ హత్యకు సంబంధించి సెప్టెంబర్ 18న కెనడా ప్రధాని జస్టిన్ ట్రూడో నిజ్జార్ హత్య వెనుక భారత ప్రభుత్వ హస్తం ఉందని ప్రకటించాడు. హర్దీప్ సింగ్ హత్య వెనుక భారత ఏజెన్సీలు ఉన్నాయా అనే దానిపై కెనడా భద్రతా సంస్థలు దర్యాప్తు చేస్తున్నాయని ఆయన పేర్కొన్నారు. అదే సమయంలో కెనడా కూడా భారత దౌత్యవేత్తను బహిష్కరించింది.ప్రధాని ట్రూడో ప్రకటనపై భారత విదేశాంగ శాఖ వెంటనే స్పందించింది. కెనడా ఆరోపణలను తోసిపుచ్చిన భారత ప్రభుత్వం, ఖలిస్తానీలు, తీవ్రవాదుల దృష్టి మరల్చడానికే ఇలాంటి ఆరోపణలు చేస్తున్నారని పేర్కొంది.

భారత విదేశాంగ మంత్రిత్వ శాఖ సెప్టెంబర్ 19 ఉదయం ప్రధాని ట్రూడో ఆరోపణలను నిరాధారమైనదిగా పేర్కొంది. కెనడాలో ఆశ్రయం పొందుతున్న ఖలిస్తానీ ఉగ్రవాదులు, తీవ్రవాదుల దృష్టిని మరల్చేందుకు ప్రధాని ఇలాంటి ప్రకటనలు చేస్తున్నారని భారత విదేశాంగ మంత్రిత్వ శాఖ పేర్కొంది. అదే సమయంలో భారత్ కెనడా హైకమిషనర్ కెమెరూన్ మెక్కేని పిలిపించింది. కెనడా దౌత్యవేత్తను భారత్ నుంచి బహిష్కరించాలని కూడా నిర్ణయం తీసుకున్నారు. కెనడాలో పెరుగుతున్న భారత వ్యతిరేక కార్యకలాపాలు, రాజకీయ ప్రేరేపిత ద్వేషపూరిత ప్రకటనలు, నేరపూరిత హింస కారణంగా అక్కడ నివసిస్తున్న భారతీయులు లేదా అక్కడికి వెళ్లాలనుకునే వారందరూ చాలా జాగ్రత్తగా ఉండాలని విదేశీ వ్యవహారాల మంత్రిత్వ శాఖ సూచించింది. కెనడాలో నివసిస్తున్న దౌత్యవేత్తలు మరియు భారతీయులు బెదిరింపులకు గురవుతున్నట్లు భారత విదేశాంగ మంత్రిత్వ శాఖ తెలిపింది. అటువంటి పరిస్థితిలో కెనడాలోని ఇటువంటి కార్యకలాపాలు జరిగే అవకాశం ఉన్న ప్రాంతాలకు ప్రజలు వెళ్లోద్దని సూచించింది. కెనడాలో ప్రతికూల పరిస్థితుల దృష్ట్యా, భారతీయ విద్యార్థులు చాలా జాగ్రత్తగా ఉండాలని ప్రత్యేకంగా సూచించారు.

కెనడాతో సంబంధాలున్న ఉగ్రవాద-గ్యాంగ్‌స్టర్ నెట్‌వర్క్‌తో సంబంధం ఉన్న 43 మంది వ్యక్తుల వివరాలను నేషనల్ ఇన్వెస్టిగేషన్ ఏజెన్సీ (NIA) బుధవారం విడుదల చేసింది. ఇదిలా ఉండగా కెనడాలో గురువారం రెండు సంఘటనలు జరిగాయి. కెనడాలో గ్యాంగ్‌స్టర్ సుఖ్‌దూల్ సింగ్ అలియాస్ సుఖ దునేకే హత్యకు గురయ్యాడు. అతను ఖలిస్తానీ మద్దతుదారు అర్ష్‌దీప్ సింగ్‌కు సన్నిహితుడు. ఈ హత్యకు లారెన్స్ బిష్ణోయ్ బాధ్యత వహించాడు.దీని తరువాత భారత ప్రభుత్వం కెనడాపై ఆంక్షలు విధించింది. అందులో భాగంగా కెనడియన్ పౌరులకు వీసా సేవలను నిలిపివేసింది.

Also Read: MLC Kavitha: 26న జలవిహార్ లో బీసీ సంఘం సమావేశానికి మద్దతు: ఎమ్మెల్సీ కవిత