Hyderabad Crime:’మార్కెట్ బాక్స్ యాప్’ మోసం… నలుగురి అరెస్ట్, 10 కోట్లు స్వాధీనం
సైబర్ క్రైం అనేక రూపాల్లో విలసిల్లతున్నది. ఆన్ లైన్ మోసగాళ్ళు రోజుకో తీరుతో క్రియేటివిటీ చూయిస్తున్నారు.
- By Hashtag U Published Date - 03:52 PM, Mon - 29 August 22
సైబర్ క్రైం అనేక రూపాల్లో విలసిల్లతున్నది. ఆన్ లైన్ మోసగాళ్ళు రోజుకో తీరుతో క్రియేటివిటీ చూయిస్తున్నారు. అనేక మంది ప్రజలు ఈ సైబర్ క్రైం వల్ల కోట్ల రూపాయలు పోగొట్టుకుంటున్నారు. అలా కోట్లు కొల్లగొట్టిన ఓ సైబర్ క్రైం ముఠాను సైబరాబాద్ పోలీసులు అరెస్టు చేశారు. ‘మార్కెట్ బాక్స్ యాప్’ అనే ఓ యాప్ ద్వారా కొందరు ట్రేడింగ్, పెట్టుబడుల వ్యాపారం అంటూ అనేక మందిని ఆకర్శించారు. పది మంది సభ్యులు గల రాజస్థాన్, ఉత్తరప్రదేశ్ కు చెందిన ఓ ముఠా నడుపుతున్న ఈ యాప్ మోసపు వలలో అనేక మంది పడిపోయారు. దాదాపు 10 కోట్ల మేర నష్టపోయారు.
ట్రేడింగ్ మరియు ఇన్వెస్ట్మెంట్ పేరుతో వాట్సాప్ మరియు టెలిగ్రామ్ యాప్స్ ద్వారా ప్రజలను ట్రేడింగ్ యాప్ లో పెట్టుబడి పెట్టేలా చేసి 10 కోట్ల రూపాయలు కాజేసిన ముఠాను పట్టుకున్న సైబరాబాద్ పోలీసులు. ఇది దేశంలోనే అతి పెద్ద సైబర్ క్రైమ్ జప్తు చేసిన కేసుగా నిలిచిందని @cpcybd తెలిపారు. pic.twitter.com/V37Ojf2BFF
— Cyberabad Police (@cyberabadpolice) August 29, 2022
హైదరాబాద్ కు చెందిన ఓ వ్యక్తి ఈ యాప్ లో 62 లక్షల రూపాయల పెట్టుబడి పెట్టాడు. 34 లక్షలు కోల్పోయాడు. దాంతో ఆయన సైబర్ క్రైం పోలీసులకు పిర్యాదు చేశాడు. దాంతో దర్యాప్తు చేపట్టిన సైబర్ క్రైం పోలీసులు ఆ ముఠా రాజస్థాన్ నుంచి కార్యక్రమాలు నిర్వహిస్తున్నట్టు తెలుసుకున్నారు. వాళ్ళను పట్టుకోవడానికి పోలీసు బృందం వెళ్ళి రకరకాల వేశాలతో మూడు నెలలపాటు కాపు కాసి చివరికిముఠాలోని నలుగురిని అరెస్టు చేశారు. వాళ్ళ నుండి 9 కోట్ల 81 లక్షల రూపాయలు స్వాధీనం చేసుకున్నారు. ఈ ముఠా దోచుకున్న సొమ్ముతో అక్కడ పెద్ద పెద్ద వ్యాపారాలు నిర్వహిస్తున్నట్టు సైబారాబాద్ సీపీ స్టీఫెన్ రవీంద్ర తెలిపారు. మార్కెట్ బాక్స్ యాప్ సెబీ లో నమోదు కాలేదని, ప్రజలు ఏ విషయాన్ని కూడా పూర్తిగా తెలుసుకోకుండా ఆ యాప్ లో ఉన్న వివరాలన్నీనిజమే అని నమ్మేయడం వల్ల సులభంగా మోసపోతున్నారని చెప్పారు.
