Land Grabbing: మంత్రి మల్లారెడ్డిపై భూకబ్జా ఆరోపణలు.. బాధితులకు ప్రాణభయం!

తెలంగాణ కార్మిక శాఖ మంత్రి సీహెచ్ మల్లారెడ్డిపై ఇద్దరు వ్యక్తులు సంచలన ఆరోపణలు చేస్తూ బషీర్‌బాగ్ ప్రెస్ క్లబ్‌లో మీడియా ముందుకు వచ్చారు. సుమారు 30 కోట్ల రూపాయల విలువైన భూమిని విక్రయించేందుకు కుట్ర జరుగుతోందని.. మంత్రి మల్లా రెడ్డి తన బామ్మర్ది శ్రీనివాస్ రెడ్డితో కలిసి తమపై దౌర్జన్యం చేస్తున్నారని.. తమ ప్రాణాలకు ముప్పు ఉందని వేదన వ్యక్తం చేశారు. మేడ్చల్ జిల్లా గుండ్ల పోచంపల్లిలో మంత్రి మల్లారెడ్డి కళాశాల ఎదురుగా ఉన్న స్థలాన్ని సుంకరి అనే కుటుంబం నుంచి మర్రి వెంకట్ రెడ్డి, దయాసాగర్ రెడ్డి కొనుగోలు చేశారు. మొత్తం ఎనిమిది ఎకరాల్లో 4.5 ఎకరాలు కొనుగోలు చేశారు.

అదే సమయంలో మంత్రి మల్లారెడ్డి తన భార్య పేరిట 2 ఎకరాలు కొనుగోలు చేశారు. అయితే మొత్తం భూమిని ఇవ్వాలని మంత్రి కుట్ర పన్నుతున్నారని వారు ఆరోపిస్తున్నారు. మైదానంలోకి వెళ్లగానే మంత్రి, ఆయన అనుచరులు మాపై దాడి చేశారు. తుపాకీతో కాలుస్తానని మంత్రి బామర్ది శ్రీనివాస్ రెడ్డి బెదిరించారు. భూమిని వదిలిపెట్టమని మమ్మల్ని బెదిరించారు. రాజకీయ ఒత్తిళ్లు ఉన్నందున పోలీసులకు ఫిర్యాదు చేసినా పట్టించుకోవడం లేదు. భూ రికార్డుల్లో మా పేరు తొలగించి.. అక్రమంగా వారి పేరు మార్చేశారు మంత్రి. మా భూమి మాకు ఇప్పించాలంటూ ప్రభుత్వానికి విన్నవిస్తున్నామని బాధితులు మీడియా ముందు వాపోయారు.

మంత్రి మల్లారెడ్డి ఎంతో మంది రైతులను మోసం చేస్తున్నారన్నారు. మంత్రి మల్లారెడ్డి నుంచి మాకు ప్రాణహాని ఉంది. మాకు రక్షణ కల్పించి న్యాయం చేయాలని సీఎం కేసీఆర్‌ను కోరుతున్నామని బాధితులు మర్రి వెంకట్‌రెడ్డి, దయాసాగర్‌రెడ్డి మీడియా సాక్షిగా విన్నవించారు. ఈ ఆరోపణలపై మంత్రి మల్లారెడ్డి, శ్రీనివాసరెడ్డి ఇద్దరూ స్పందించాల్సి ఉంది.

Also Read: TTD Chairman: అటవీ అధికారుల సూచన మేరకే కర్రలు ఇచ్చాం, ట్రోల్స్ పై టీటీడీ చైర్మన్ రియాక్షన్