Varun Chakravarthy: ఐసీసీ టీ20 ర్యాంకింగ్స్‌లో అద‌ర‌గొట్టిన టీమిండియా స్పిన్నర్!
ఐసీసీ టీ20 ఆల్‌రౌండర్ ర్యాంకింగ్స్‌లో హార్దిక్ పాండ్యా మొదటి స్థానంలో కొనసాగుతున్నారు. ఈ జాబితాలో పాకిస్థాన్ ఆటగాడు సామ్ అయూబ్ 4 స్థానాలు లాభపడి ఆరో స్థానానికి చేరుకున్నారు.
- By Gopichand Published Date - 04:14 PM, Wed - 17 September 25
Varun Chakravarthy: భారత స్పిన్నర్ వరుణ్ చక్రవర్తి (Varun Chakravarthy) ప్రపంచంలోనే నంబర్-1 టీ20 బౌలర్‌గా నిలిచారు. ఐసీసీ బుధవారం విడుదల చేసిన తాజా ర్యాంకింగ్స్‌లో ఈ విషయం వెల్లడైంది. ఆసియా కప్ 2025లో అద్భుతమైన ప్రదర్శన తర్వాత కుల్దీప్‌ యాదవ్ కూడా ర్యాంకింగ్స్‌లో భారీగా ఎగబాకారు. ఆయన 37వ స్థానం నుంచి 23వ స్థానానికి చేరుకున్నారు. బ్యాటింగ్‌లో అభిషేక్ శర్మ నంబర్-1 బ్యాట్స్‌మన్‌గా కొనసాగుతుండగా.. తిలక్ వర్మ 2 స్థానాలు కోల్పోయారు.
టీ20లో నంబర్-1 బౌలర్‌గా వరుణ్ చక్రవర్తి
యూఏఈతో జరిగిన మ్యాచ్‌లో వరుణ్ చక్రవర్తి తన 2 ఓవర్ల స్పెల్‌లో కేవలం 4 పరుగులు ఇచ్చి ఒక వికెట్ తీశారు. 34 ఏళ్ల ఈ స్పిన్నర్ పాకిస్థాన్‌తో జరిగిన మ్యాచ్‌లో తన 4 ఓవర్ల స్పెల్‌లో 24 పరుగులు ఇచ్చి ఒక వికెట్ తీసుకున్నారు. మూడు స్థానాలు ఎగబాకి ఆయన ఐసీసీ టీ20 బౌలింగ్ ర్యాంకింగ్స్‌లో మొదటి స్థానానికి చేరుకున్నారు. చరిత్రలో మొదటిసారిగా వరుణ్ నంబర్-1 బౌలర్‌గా నిలిచారు. 733 రేటింగ్‌తో వరుణ్ అగ్రస్థానానికి చేరుకున్నారు, అంతకు ముందు ఈ స్థానంలో న్యూజిలాండ్ ఆటగాడు జాకబ్ డఫ్ఫీ ఉన్నారు. డఫ్ఫీ ఇప్పుడు రెండో స్థానానికి పడిపోయారు. టాప్ 10లో వరుణ్‌తో పాటు రవి బిష్ణోయ్ కూడా ఉన్నారు. కానీ ఆయన 2 స్థానాలు కోల్పోయారు. రవి బిష్ణోయ్ ఆసియా కప్ స్క్వాడ్‌లో లేరు. బిష్ణోయ్ ఇప్పుడు 8వ స్థానంలో ఉన్నారు.
Also Read: Suryakumar Yadav: ఏసీసీకి వార్నింగ్ ఇచ్చిన టీమిండియా కెప్టెన్ సూర్యకుమార్!
23వ స్థానానికి చేరుకున్న కుల్దీప్‌ యాదవ్
604 రేటింగ్‌తో స్పిన్నర్ కుల్దీప్‌ యాదవ్ 23వ స్థానానికి చేరుకున్నారు. ఆయన 16 స్థానాలు ఎగబాకారు. ఆసియా కప్ 2025లో యూఏఈతో జరిగిన మొదటి మ్యాచ్‌లో కుల్దీప్‌ 2.1 ఓవర్లలో 7 పరుగులు ఇచ్చి 4 వికెట్లు తీసుకున్నారు. పాకిస్థాన్‌తో జరిగిన మ్యాచ్‌లో ఆయన 4 ఓవర్ల స్పెల్‌లో 18 పరుగులు ఇచ్చి 3 వికెట్లు పడగొట్టారు. ఈ రెండు మ్యాచ్‌లలో కుల్దీప్‌ ప్లేయర్ ఆఫ్ ది మ్యాచ్‌గా ఎంపికయ్యారు.
ఆల్‌రౌండర్, బ్యాటింగ్ ర్యాంకింగ్స్‌లో భారత్ ఆధిపత్యం
ఐసీసీ టీ20 ఆల్‌రౌండర్ ర్యాంకింగ్స్‌లో హార్దిక్ పాండ్యా మొదటి స్థానంలో కొనసాగుతున్నారు. ఈ జాబితాలో పాకిస్థాన్ ఆటగాడు సామ్ అయూబ్ 4 స్థానాలు లాభపడి ఆరో స్థానానికి చేరుకున్నారు. టీ20 బ్యాట్స్‌మెన్ ర్యాంకింగ్స్‌లో కూడా భారత ఆటగాడే మొదటి స్థానంలో ఉన్నారు. అభిషేక్ శర్మ 884 రేటింగ్‌తో నంబర్-1 టీ20 బ్యాట్స్‌మెన్‌గా ఉన్నారు. ఈ జాబితాలో తిలక్ వర్మ 2 స్థానాలు కోల్పోయి, రెండో స్థానం నుంచి నాలుగో స్థానానికి పడిపోయారు. అలాగే సూర్యకుమార్ యాదవ్ కూడా ఆరో స్థానం నుంచి ఏడో స్థానానికి చేరుకున్నారు.
