India: ఐసీసీ టోర్న‌మెంట్ల నుండి టీమిండియాను స‌స్పెండ్ చేయాలి: పాక్ మాజీ ఆట‌గాడు

India

India: ఆసియా కప్ 2025 ఫైనల్ తర్వాత ట్రోఫీని స్వీకరించడానికి టీమ్ ఇండియా నిరాకరించడంపై పాకిస్థాన్ మాజీ క్రికెటర్ రషీద్ లతీఫ్ తీవ్రంగా స్పందించారు. ఈ చర్య క్రీడా స్ఫూర్తికి విరుద్ధమని ఆరోపిస్తూ భారత జట్టు (India)ను ఐసీసీ టోర్నమెంట్ల నుండి సస్పెండ్ చేయాలని ఆయన డిమాండ్ చేశారు.

ట్రోఫీ తిరస్కరణపై రషీద్ లతీఫ్ ఆగ్రహం

ఆసియా కప్ 2025 ఫైనల్ మ్యాచ్ ముగిసిన తర్వాత దుబాయ్‌లో నాటకీయ పరిణామాలు చోటు చేసుకున్నాయి. ఆసియన్ క్రికెట్ కౌన్సిల్ (ACC) ఛైర్మన్, పాకిస్తాన్ అంతర్గత వ్యవహారాల మంత్రి అయిన మొహ్సిన్ నఖ్వీ చేతుల మీదుగా ట్రోఫీని స్వీకరించడానికి భారత జట్టు నిరాకరించింది. దీంతో పోస్ట్-మ్యాచ్ ప్రజెంటేషన్ వేడుక పూర్తిగా గందరగోళంలో పడింది. ఈ వ్యవహారంపై పాకిస్థాన్ మాజీ కెప్టెన్ రషీద్ లతీఫ్ తీవ్రంగా మండిపడ్డారు.

Also Read: Jagan Digital Book : విడదల రజినిపై ‘డిజిటల్ బుక్’లో ఫిర్యాదు!

‘క్రికెట్‌కు చెడ్డ రోజు’

లతీఫ్ ఈ సంఘటనను ‘క్రికెట్‌కు ఒక అగ్లీ డే (చెడ్డ రోజు)’గా అభివర్ణించారు. భారత జట్టు క్రీడా స్ఫూర్తిని ఉల్లంఘించిందని ఆయన ఆరోపించారు. వ్యక్తిగత అవార్డులు అందుకున్నప్పటికీ ఆటగాళ్లు సమిష్టిగా నఖ్వీని వేదికపై గుర్తించకుండా ఉండటంపై లతీఫ్ అభ్యంతరం వ్యక్తం చేశారు. “ACC ఛైర్మన్ నుండి ఆసియా కప్ 2025 ట్రోఫీ, అవార్డులను తీసుకోవడానికి నిరాకరించిన తర్వాత భారత క్రికెట్ జట్టును ఐసీసీ టోర్నమెంట్ల నుండి సస్పెండ్ చేయాలి. ఏ ఇతర క్రీడలోనైనా ఇటువంటి చర్యకు తక్షణమే క్రమశిక్షణా చర్యలు తీసుకునేవారు” అని లతీఫ్ తన ఫేస్‌బుక్ పోస్ట్‌లో ఘాటుగా రాశారు.

ఐసీసీపై భారత ప్రభావంపై సందేహం

అయితే ఐసీసీ (అంతర్జాతీయ క్రికెట్ కౌన్సిల్) భారత్‌పై చర్యలు తీసుకునే అవకాశంపై ఆయన సందేహం వ్యక్తం చేశారు. దీనికి కారణం ఐసీసీ నాయకత్వంలో భారతదేశానికి ఉన్న బలమైన ప్రభావమే అని లతీఫ్ వాదించారు. “ఐసీసీ ఛైర్మన్ (ప్రస్తుతం జై షా), సీఈఓ, సీఎఫ్‌ఓ, కమర్షియల్ చీఫ్, హెడ్ ఆఫ్ ఈవెంట్స్, కమ్యూనికేషన్స్ వంటి ముఖ్య పదవుల్లో భారతీయులు ఉండటం వల్ల సస్పెన్షన్ అసంభవంగా అనిపిస్తుంది” అని ఆయన స్పష్టం చేశారు.

లతీఫ్ వ్యాఖ్యల ప్రకారం.. భారతదేశం మరోసారి ‘జెంటిల్మన్ గేమ్’ సారాన్ని, స్ఫూర్తిని ఉల్లంఘించిందని, ఈ చర్య క్రికెట్‌కు ఏ మాత్రం మంచిది కాదని ఆయన తీవ్రంగా ఖండించారు. భారత జట్టు చర్యల వల్ల ప్రజెంటేషన్ వేడుకను నిర్వాహకులు కుదించాల్సి వచ్చింది. క్రికెట్‌లో రాజకీయ అంశాలను తీసుకురావడంపై పాక్ వర్గాల నుండి తీవ్ర విమర్శలు వ్యక్తమవుతున్నాయి.

Follow us