Shubman Gill: గుజ‌రాత్ కెప్టెన్ శుభ‌మ‌న్ గిల్ ప్ర‌త్యేక రికార్డు.. జీటీ త‌ర‌పున మొద‌టి బ్యాట్స్‌మెన్‌గా చ‌రిత్ర‌!

Shubman Gill: స్టార్ భారత ఓపెనర్ శుభ్‌మన్ గిల్ (Shubman Gill) శనివారం ఒక ప్రత్యేక రికార్డును తన పేరిట న‌మోదు చేసుకున్నాడు. అతడు గుజరాత్ టైటాన్స్ (GT) కోసం IPLలో 2000 పరుగులు పూర్తి చేశాడు. అలా చేసిన తొలి జీటీ ఆటగాడిగా నిలిచాడు. 25 ఏళ్ల శుభ్‌మన్‌కు ఈ మైలురాయిని సాధించడానికి 53 పరుగులు అవసరమ‌య్యాయి. అతడు లక్నోలోని భారత రత్న శ్రీ అటల్ బిహారీ వాజ్‌పేయీ ఏకనా స్టేడియంలో జ‌రిగిన IPL 2025 మ్యాచ్‌లో లక్నో సూపర్ జెయింట్స్‌పై 11వ ఓవర్ ఐదవ బంతిపై ఒక పరుగు తీసి 2000 పరుగులు పూర్తి చేశాడు. గిల్‌ను IPL 2024కు ముందు GT కెప్టెన్‌గా నియమించారు. జట్టు కెప్టెన్‌గా తన మొదటి సీజన్‌లో 12 మ్యాచ్‌లలో మొత్తం 426 పరుగులు చేశాడు. కానీ తన జట్టును ప్లేఆఫ్‌కు అర్హత సాధించడంలో సహాయపడలేకపోయాడు.

వరుసగా రెండో ఫిఫ్టీ

గిల్ ఈ సీజన్‌లో వరుసగా రెండో ఫిఫ్టీ చేశాడు. అతడు LSGపై కేవలం 38 బంతుల్లో 60 పరుగుల ఇన్నింగ్స్ ఆడాడు. హైదరాబాద్‌లోని రాజీవ్ గాంధీ ఇంటర్నేషనల్ స్టేడియంలో సన్‌రైజర్స్ హైదరాబాద్‌తో గుజరాత్ టైటాన్స్ ఆడిన నాల్గవ లీగ్ మ్యాచ్‌లో శుభ్‌మన్ గిల్ అద్భుతమైన బ్యాటింగ్ చేశాడు. అతడు 43 బంతుల్లో నాటౌట్ 61 పరుగులు చేశాడు.

Also Read: Mahesh – Rajamouli : చేరుకోదారి చూసుకున్న మహేష్ , రాజమౌళి ఎందుకు..?

శుభ్‌మన్ గిల్ తన IPL కెరీర్‌ను 2018లో కోల్‌కతా నైట్ రైడర్స్ (KKR)తో ప్రారంభించాడు. ఆ తర్వాత IPL 2022 మెగా వేలంలో గుజరాత్ టైటాన్స్ అతడిని 8 కోట్ల రూపాయలకు తమ జట్టులోకి తీసుకుంది. గుజరాత్ కోసం తన మొదటి సీజన్‌లో గిల్ 16 మ్యాచ్‌లలో 483 పరుగులు చేశాడు. జట్టును ఛాంపియన్‌గా నిలబెట్టడంలో కీలక పాత్ర పోషించాడు. రెండవ సీజన్‌లో అతడు అద్భుత ప్రదర్శన చేస్తూ 3 సెంచరీలు, 4 హాఫ్ సెంచరీలతో మొత్తం 890 పరుగులు చేసి ఆరెంజ్ క్యాప్ గెలుచుకున్నాడు.

ఈ జాబితాలో రెండో స్థానంలో సాయి సుదర్శన్

పంజాబ్‌లో జన్మించిన శుభ్‌మన్ గిల్‌ను IPL 2025 మెగా వేలంలో గుజరాత్ టైటాన్స్ 16.50 కోట్ల రూపాయలకు రిటైన్ చేసింది. గుజరాత్ టైటాన్స్ కోసం అత్యధిక పరుగులు చేసిన వారి జాబితాలో గిల్ తర్వాత సాయి సుదర్శన్ పేరు వస్తుంది. తమిళనాడుకు చెందిన ఈ బ్యాట్స్‌మన్ ఇప్పటివరకు జట్టు కోసం 31 మ్యాచ్‌లు ఆడాడు. 1300 కంటే ఎక్కువ పరుగులు చేశాడు.