Rishabh Pant: రిషబ్ పంత్‌ను లక్నో రూ. 27 కోట్లకు ఎందుకు కొనుగోలు చేసింది? కార‌ణ‌మిదే!

Rishabh Pant: ఐపీఎల్ 2025 మెగా వేలం టీమ్ ఇండియా వికెట్ కీపర్ బ్యాట్స్‌మెన్ రిషబ్ పంత్‌కు (Rishabh Pant) చాలా అద్భుతంగా క‌లిసి వ‌చ్చింది. ఐపీఎల్‌ చరిత్రలో పంత్‌పై భారీ బిడ్‌ నమోదైంది. ఢిల్లీ క్యాపిటల్స్ నుండి విడుదలైన తర్వాత రిషబ్ పంత్ ఇప్పుడు లక్నో సూపర్ జెయింట్‌లోకి ప్రవేశించాడు. 27 కోట్ల భారీ ధరకు రిషబ్ పంత్‌ను LSG కొనుగోలు చేసింది. దీని తర్వాత ఇప్పుడు లక్నో సూపర్ జెయింట్స్ యజమాని సంజీవ్ గోయెంకా పంత్‌ను రూ. 27 కోట్లకు కొనుగోలు చేయడానికి కారణాన్ని చెప్పాడు.

LSG పంత్‌ను ఎందుకు కొనుగోలు చేసిందంటే?

మెగా వేలానికి ముందు ఈ ఆటగాడు ఈసారి వేలంలో ఉన్న అన్ని రికార్డులను బద్దలు కొట్టగలడని రిషబ్ పంత్ గురించి ఊహాగానాలు వచ్చాయి. చివరికి అదే జరిగింది. LSG యజమాని సంజీవ్ గోయెంకా పంత్‌ను 27 కోట్ల రూపాయల భారీ ధరతో కొనుగోలు చేయడానికి కారణాన్ని కూడా చెప్పాడు. క్రిక్ బ‌జ్ నివేదిక ప్రకారం.. సంజీవ్ గోయెంకా ఇది గర్వించదగ్గ విషయం కాదని చెప్పిన‌ట్లు పేర్కొంది. త‌మ జ‌ట్టు వ్యూహంలో కీలక భాగంగా పంత్‌ను దృష్టిలో ఉంచుకుని వేలం ప్లాన్ చేసిన‌ట్లు, తదనుగుణంగా బడ్జెట్ రూపొందించిన‌ట్లు ఆయ‌న తెలిపారు.

Also Read: She Is Male : ‘‘నువ్వు మహిళవేనా ? పురుషుడివా ?’’.. ఈ ప్రశ్నపై మహిళా బాక్సర్‌ సంచలన నిర్ణయం

బ్యాలెన్స్‌డ్ టీమ్‌ను రూపొందించడమే వేలం లక్ష్యం

సంజీవ్ గోయెంకా ఇంకా మాట్లాడుతూ.. వేలంలో మా లక్ష్యం అత్యంత ఖరీదైన ఆటగాడిని కొనుగోలు చేయడం కాదు. సమతుల్య జట్టును సృష్టించడం. పంత్‌తో పాటు ఇద్దరు ఫాస్ట్ బౌలర్లను కొనుగోలు చేయాలని జట్టు భావించింది. ఇందులో భువనేశ్వర్ కుమార్‌ను కూడా కొనుగోలు చేయాలని ఫ్రాంచైజీ నిర్ణయించింది. అయితే LSG భువీని కొనుగోలు చేయలేకపోయింది. ఆ తర్వాత LSG అవేష్ ఖాన్, ఆకాష్ దీప్ వైపు మళ్లింది. అవేశ్‌ను రూ.9.75 కోట్లకు, ఆకాశ్‌దీప్‌ను రూ.8 కోట్లకు ఎల్‌ఎస్‌జీ కొనుగోలు చేసింది. కాగా భువనేశ్వర్ కుమార్‌ను రాయల్ ఛాలెంజర్స్ బెంగళూరు రూ.10.75 కోట్లకు కొనుగోలు చేసింది.

LSG 13 మంది ఆటగాళ్లను కొనుగోలు చేసింది

ఈసారి ఐపీఎల్ 2025 మెగా వేలంలో లక్నో సూపర్ జెయింట్స్ 13 మంది ఆటగాళ్లను కొనుగోలు చేసింది. ఇందులో ఆరుగురు బ్యాట్స్‌మెన్, ఏడుగురు బౌలర్లు ఉన్నారు. రూ. 27 కోట్లు వెచ్చించి అత్యంత ఖరీదైన ఆటగాడిగా రిషబ్ పంత్‌ను ఎల్‌ఎస్‌జీ కొనుగోలు చేసింది.