Shubman Gill: ఎట్ట‌కేల‌కు నిజం ఒప్పుకున్న గిల్.. అందుకే పరుగులు చేయ‌లేక‌పోతున్నాడ‌ట!
ఎర్ర బంతితో బ్యాటింగ్ చేయడం నాకు ఆందోళన కలిగించే విషయం. కొన్నిసార్లు నేను ఎర్రటి బంతితో 25-30 పరుగులు బాగా స్కోర్ చేశాను. కానీ కొన్నిసార్లు నేను పెద్ద స్కోరు చేయగలిగినప్పటికీ నాపై చాలా ఒత్తిడి ఉండేది.
- By Gopichand Published Date - 04:24 PM, Sun - 26 January 25
Shubman Gill: భారత క్రికెట్ జట్టు స్టార్ బ్యాట్స్‌మెన్ శుభ్‌మన్ గిల్ (Shubman Gill) రంజీ మ్యాచ్‌లో శనివారం పంజాబ్ త‌ర‌పున అద్భుత సెంచరీ చేయడం ద్వారా కోల్పోయిన ఫామ్‌ను తిరిగి పొందాడు. తొలి ఇన్నింగ్స్‌లో విఫలమైన గిల్ రెండో ఇన్నింగ్స్‌లో 171 బంతుల్లో 102 పరుగులతో అద్భుత ఇన్నింగ్స్ ఆడాడు. అతని ఇన్నింగ్స్‌లో 14 ఫోర్లు, మూడు సిక్సర్లు ఉన్నాయి. అయితే అతని సెంచరీ జట్టుకు ఉప‌యోగ‌ప‌డలేదు. అక్కడ కర్ణాటకపై ఇన్నింగ్స్ 207 పరుగుల తేడాతో పంజాబ్ ఓటమిని ఎదుర్కోవలసి వచ్చింది.
రెడ్ బాల్‌తో బ్యాటింగ్ చేయడం ఆందోళన కలిగించే విషయం- గిల్
పీటీఐతో గిల్ మాట్లాడుతూ.. ఎర్ర బంతితో బ్యాటింగ్ చేయడం నాకు ఆందోళన కలిగించే విషయం. కొన్నిసార్లు నేను ఎర్రటి బంతితో 25-30 పరుగులు బాగా స్కోర్ చేశాను. కానీ కొన్నిసార్లు నేను పెద్ద స్కోరు చేయగలిగినప్పటికీ నాపై చాలా ఒత్తిడి ఉండేది. నేను నా ఆటను స‌రిగ్గా ఆడలేకపోయేవాడ్ని. కొన్నిసార్లు నా దృష్టి, ఏకాగ్రతను కోల్పోయి ఔట్ అయ్యేవాడ్ని అని గిల్ తెలిపాడు.
Also Read: Kethireddy Venkatarami Reddy: విజ‌య‌సాయి రెడ్డి పోవ‌డం వ‌ల‌న న‌ష్ట‌మేమీ లేదు: కేతిరెడ్డి
బోర్డర్-గవాస్కర్ సిరీస్‌లో నిరాశ‌ప‌ర్చిన గిల్
ఈ యువ ఆటగాడు ఇటీవల ఆస్ట్రేలియాతో జరిగిన ఐదు మ్యాచ్‌ల బోర్డర్-గవాస్కర్ సిరీస్‌లో ఆడాడు. ఈ సిరీస్‌లో గిల్‌కు మూడు మ్యాచ్‌లు ఆడే అవకాశం లభించింది. కానీ గిల్ ఈ అవకాశాన్ని సద్వినియోగం చేసుకోలేక‌పోయాడు. ఆరు ఇన్నింగ్స్‌ల్లో గిల్ బ్యాట్‌ నుండి 93 పరుగులు మాత్రమే వచ్చాయి. ఈ సమయంలో 31 పరుగులే గిల్ అత్యుత్తమ స్కోరు కావ‌డం గ‌మ‌నార్హం. 25 ఏళ్ల గిల్ గాయం కారణంగా మొదటి టెస్ట్ మ్యాచ్‌లో ఆడలేకపోయాడు. తరువాత పేలవమైన ఫామ్ కారణంగా గిల్ మెల్‌బోర్న్‌లో ఆడే సిరీస్‌లోని నాల్గవ టెస్టు నుండి వైదొలగవలసి వచ్చింది.
టెస్టు క్రికెట్‌లో నిరాశ‌ప‌రుస్తున్న గిల్
ఈ కుడిచేతి వాటం బ్యాట్స్‌మన్ చాలా సంవత్సరాలుగా భారత బ్యాటింగ్ యూనిట్ భవిష్యత్తుగా పేరొందాడు. అయితే రెడ్ బాల్ క్రికెట్‌లో అతని రికార్డు చెప్పుకోద‌గిన విధంగా లేదు. ఇప్పటివరకు గిల్ 32 టెస్టుల్లో 59 ఇన్నింగ్స్‌ల్లో 35 సగటుతో ఐదు సెంచరీలతో 1893 పరుగులు మాత్రమే చేశాడు. అయినప్పటికీ టీమ్ మేనేజ్‌మెంట్ అతనిపై నమ్మకం ఉంచింది. 2025 ఛాంపియన్స్ ట్రోఫీ కోసం భారత వన్డే జట్టుకు వైస్ కెప్టెన్‌గా గిల్‌ను నియమించింది.
