తొలి మ్యాచ్‌లో పాక్ స్టార్ ప్లేయ‌ర్‌ బాబర్ ఆజం ఫ్లాప్!

Babar Azam

Babar Azam: టీ20 వరల్డ్ కప్ 2026లో పాకిస్థాన్ ఆడిన మొదటి మ్యాచ్ బాబర్ ఆజంకు ఒక పీడకలలా మిగిలిపోయింది. ఆసియా కప్ 2025కు దూరమైన తర్వాత బాబర్‌కు ఈ వరల్డ్ కప్‌లో రాణించడం చాలా కీలకంగా మారింది. ఆస్ట్రేలియాతో జరిగిన గత సిరీస్‌లో మంచి ప్రదర్శన చేసి ఫామ్‌లోకి వచ్చిన బాబర్.. వరల్డ్ కప్‌లో పరుగుల వర్షం కురిపిస్తాడని అందరూ భావించారు. కానీ తొలి మ్యాచ్‌లోనే పేలవ ప్రదర్శనతో పాకిస్థాన్‌ పరువు తీశాడు. ఒక సులువైన క్యాచ్ ఇచ్చి పెవిలియన్‌కు చేరాడు.

తొలి మ్యాచ్‌లోనే బాబర్ ఆజం ఫ్లాప్

టీ20 వరల్డ్ కప్ 2026 మొదటి మ్యాచ్‌లో పాకిస్థాన్ జట్టు నెదర్లాండ్స్‌ను 147 పరుగులకే కట్టడి చేసింది. ఛేదనలో పాక్ జట్టు ఒక దశలో 98 పరుగులకు 2 వికెట్లు కోల్పోయి పటిష్టంగా కనిపించింది. ఆ సమయంలో పాకిస్థాన్ సులభంగా గెలుస్తుందని అనిపించింది. అయితే సాహిబ్జాదా ఫర్హాన్, ఉస్మాన్ ఖాన్ అవుట్ కావడంతో క్రీజులోకి వచ్చిన బాబర్ ఆజంపై భారీ అంచనాలు నెలకొన్నాయి.

కానీ బాబర్ 18 బంతుల్లో కేవలం 15 పరుగులు మాత్రమే చేసి అవుట్ అయ్యాడు. బాబర్ చాలా నెమ్మదిగా బ్యాటింగ్ చేయడం, మరోవైపు వరుసగా వికెట్లు పడటంతో అతనిపై ఒత్తిడి పెరిగింది. రోలోఫ్ వాన్ డర్ మెర్వ్ వేసిన బంతిని భారీ షాట్ కొట్టబోయి, కైల్ క్లీన్‌కు అత్యంత సులువైన క్యాచ్ ఇచ్చి దొరికిపోయాడు. కీలకమైన టోర్నీలో మొదటి మ్యాచ్‌లోనే బాబర్ నిరాశపరిచాడు.

Also Read: భారత్ చారిత్రాత్మక విజయం.. వైభవ్ సూర్యవంశీ బాధ?

నెదర్లాండ్స్‌పై పాకిస్థాన్ విజయం

బాబర్ ఆజం అవుట్ అయిన తర్వాత పాకిస్థాన్ జట్టు కష్టాల్లో పడింది. చివరి రెండు ఓవర్లలో గెలవడానికి 29 పరుగులు అవసరమయ్యాయి. ఈ ఉత్కంఠభరిత సమయంలో ఫహీమ్ అష్రఫ్ విధ్వంసకర బ్యాటింగ్‌తో ఆదుకున్నాడు. లోగన్ వాన్ బీక్ వేసిన ఓవర్లో ఏకంగా నాలుగు సిక్సర్లు బాది 24 పరుగులు పిండుకున్నాడు. దీంతో పాకిస్థాన్‌కు విజయం సులభమైంది. చివరి ఓవర్లో కేవలం 5 పరుగులు మాత్రమే అవసరం కాగా వాటిని పాక్ ఆటగాళ్లు సునాయాసంగా పూర్తి చేశారు.

ఫలితంగా పాకిస్థాన్ 3 వికెట్ల తేడాతో నెదర్లాండ్స్‌పై విజయం సాధించి టీ20 వరల్డ్ కప్ 2026ను గెలుపుతో ప్రారంభించింది. బాబర్ విఫలమైనప్పటికీ పాక్ జట్టు ఎలాగోలా గట్టెక్కి విజయాన్ని అందుకుంది.

Follow us