India vs Australia: తీరు మార్చుకొని టీమిండియా.. అవే చెత్త షాట్లు!

Border Gavaskar Trophy

India vs Australia: సిడ్నీ క్రికెట్ గ్రౌండ్‌లో భారత్, ఆస్ట్రేలియా (India vs Australia) మధ్య బోర్డర్-గవాస్కర్ సిరీస్ చివరి టెస్టు జరుగుతోంది. ఈ మ్యాచ్‌లో కెప్టెన్ జస్ప్రీత్ బుమ్రా టాస్ గెలిచి ముందుగా బ్యాటింగ్ ఎంచుకున్నాడు. అతని నిర్ణయం తప్పని ఆస్ట్రేలియా బౌలర్లు నిరూపించారు. ఈ సిరీస్‌లో భారత బ్యాట్స్‌మెన్‌ల ప్రదర్శన చెప్పుకోదగిన విధంగా లేదు. భార‌త బ్యాట్స్‌మెన్‌ల పేల‌వ ఫామ్‌ను ఆస్ట్రేలియా బౌలర్లు పూర్తిగా సద్వినియోగం చేసుకున్నారు. సిడ్నీ టెస్టులో భారత్ ప్లేయింగ్ ఎలెవన్‌లో రెండు ప్రధాన మార్పులు కనిపించాయి. పింక్ టెస్ట్ భారత్‌కు చాలా ముఖ్యమైనది. బోర్డర్‌-గవాస్కర్‌ సిరీస్‌ను నిలబెట్టుకోవాలంటే భారత్‌ ఈ మ్యాచ్‌లో విజయం సాధించడం తప్పనిసరి.

శుభారంభం ఇవ్వలేక‌పోయిన జైస్వాల్, రాహుల్

బోర్డర్‌-గవాస్కర్‌ సిరీస్‌లో భారత్‌ తరఫున అత్యంత విజయవంతమైన బ్యాట్స్‌మెన్‌గా నిలిచిన యశస్వి జైస్వాల్.. సిడ్నీ టెస్టు తొలి ఇన్నింగ్స్‌లో రాణించ‌లేక‌పోయాడు. ఐదో టెస్టులో స్కాట్ బౌలాండ్ చేతిలో అవుట్ అయ్యాడు. జైస్వాల్ 26 బంతులు ఎదుర్కొని 10 పరుగులు చేశాడు. కేఎల్ రాహుల్ మ‌రోసారి నిరాశ‌ప‌ర్చాడు. సిరీస్‌లో తొలి 3 మ్యాచ్‌ల్లో రాహుల్ ఆటతీరు బాగానే ఉంది. మెల్‌బోర్న్ తర్వాత రాహుల్ కూడా సిడ్నీ టెస్టులో 4 ప‌రుగుల‌కే పెవిలియన్‌కు చేరుకున్నాడు. అతను 4 పరుగుల స్కోరు వద్ద ఆస్ట్రేలియా కెప్టెన్ మిచెల్ స్టార్క్ బౌలింగ్‌లో క్యాచ్ ఇచ్చి ఔట్ అయ్యాడు.

Also Read: Yoga Tips : మీరు మొదటిసారి యోగా చేయబోతున్నట్లయితే, నిపుణులు చెప్పిన ఈ విషయాలు తెలుసుకోండి.!

సిడ్నీ టెస్టులో పునరాగమనం చేసిన శుభ్‌మన్ గిల్ కూడా 20 ప‌రుగులు చేసి ఔట‌య్యాడు. నాథ‌న్ లియాన్ బౌలింగ్‌లో స్టీవ్ స్మిత్‌కు క్యాచ్ ఇచ్చి మూడో వికెట్‌గా పెవిలియ‌న్ బాట ప‌ట్టాడు. శుభ్‌మన్ గిల్ 64 బంతుల్లో 20 పరుగులతో ఇన్నింగ్స్ ఆడాడు. సిడ్నీ టెస్టులో భారత్ కేవలం 17 పరుగుల వద్ద 2 వికెట్లు కోల్పోయింది. దీంతో భారత్ క‌ష్టాలు పెరిగాయి. అయితే తర్వాత విరాట్ కోహ్లీ, శుభ్‌మన్ గిల్ భాగస్వామ్యం జట్టును మళ్లీ మ్యాచ్‌లోకి తీసుకొచ్చింది. ఈ ఇద్దరు బ్యాట్స్‌మెన్ మధ్య 39 పరుగుల భాగస్వామ్యం ఉంది. ఆ తర్వాత నాథన్ లియాన్ శుభ్‌మన్ గిల్ వికెట్‌ను తీసి ఆస్ట్రేలియా జ‌ట్టులో జోష్ నింపాడు.

అయితే ఒకానొక ద‌శ‌లో కోహ్లీ క్రీజుల్లో సెట్ అవుతున్నాడు అనుకోగా.. ఆసీస్ బౌల‌ర్ టీమిండియాకు బిగ్ షాక్ ఇచ్చాడు. 69 బంతుల్లో 17 ప‌రుగులు చేసిన విరాట్ కోహ్లీని బోలాండ్ ఔట్ చేశాడు. దీంతో భార‌త్ జ‌ట్టు 72 ప‌రుగులకే 4 వికెట్లు కోల్పోయింది. ప్రస్తుతం క్రీజులో రిష‌బ్ పంత్ (14), ర‌వీంద్ర జ‌డేజా (4) ఉన్నారు. ఈ వార్త రాసే స‌మ‌యానికి భార‌త్ స్కోర్ 4 వికెట్ల న‌ష్టానికి 81 ప‌రుగులు చేసింది.

రోహిత్ శ‌ర్మకు షాక్‌

సిడ్నీ క్రికెట్ గ్రౌండ్‌లో ఆస్ట్రేలియాతో జరుగుతున్న ఐదో టెస్టు కోసం భారత కెప్టెన్ రోహిత్ శర్మ భారత ప్లేయింగ్ ఎలెవన్‌లో భాగం కాలేదు. అతను ఈ మ్యాచ్‌కు విశ్రాంతి తీసుకునే ఎంపికను ఎంచుకున్నాడు. టాస్ సమయంలో భారత కెప్టెన్ జస్ప్రీత్ బుమ్రా ఈ విష‌యాన్ని తెలియ‌జేశాడు. ప్రస్తుతం జరుగుతున్న బోర్డర్-గవాస్కర్ ట్రోఫీలో రోహిత్ పేలవ ప్రదర్శనతో మూడు మ్యాచ్‌ల్లో 31 పరుగులు మాత్రమే చేసిన నేపథ్యంలో ఈ నిర్ణయం తీసుకున్నారు. అయితే కెప్టెన్‌ను ప్లేయింగ్ ఎలెవెన్ నుంచి తొల‌గించ‌డం టీమిండియాలో ఇదే మొద‌టిసారి.

Follow us