Glenn Maxwell: మాక్స్‌వెల్‌కు షాకిచ్చిన బీసీసీఐ.. 25 శాతం ఫైన్‌!
ఐపీఎల్ నిబంధ‌న‌ల‌ను ఉల్లంఘించినందుకు గ్లెన్ మాక్స్‌వెల్‌పై అతని మ్యాచ్ ఫీజులో 25 శాతం జరిమానా విధించబడింది. ఈ నిర్ణయం బీసీసీఐ తీసుకుంది.
- By Gopichand Published Date - 09:34 AM, Wed - 9 April 25
Glenn Maxwell: ఐపీఎల్ 2025లో భాగంగా మంగ‌ళ‌వారం పంజాబ్ కింగ్స్- చెన్నై సూపర్ కింగ్స్ మధ్య మ్యాచ్ జరిగింది. ఈ మ్యాచ్‌ను పంజాబ్ కింగ్స్ 18 పరుగుల తేడాతో గెలుచుకుంది. 2 పాయింట్లు సాధించి ప్లేఆఫ్‌లకు తమ ఆశలను బలపరిచింది. అయితే మ్యాచ్ తర్వాత పంజాబ్ స్టార్ ఆటగాడు గ్లెన్ మాక్స్‌వెల్‌పై (Glenn Maxwell) జరిమానా విధించబడింది. బీసీసీఐ అతనిపై కఠిన చర్యలు తీసుకుంది.
గ్లెన్ మాక్స్‌వెల్‌పై కఠిన చర్య
ఐపీఎల్ నిబంధ‌న‌ల‌ను ఉల్లంఘించినందుకు గ్లెన్ మాక్స్‌వెల్‌పై అతని మ్యాచ్ ఫీజులో 25 శాతం జరిమానా విధించబడింది. ఈ నిర్ణయం బీసీసీఐ తీసుకుంది. అంతేకాకుండా నియమాలను ఉల్లంఘించినందుకు మాక్స్‌వెల్‌కు ఒక డిమెరిట్ పాయింట్ కూడా లభించింది. ఐపీఎల్ మీడియా విడుదలలో తెలిపిన వివరాల ప్రకారం.. గ్లెన్ మాక్స్‌వెల్ ఆర్టికల్ 2.2 (మ్యాచ్ సమయంలో ఫిక్స్‌చర్‌లు, ఫిట్టింగ్‌ల దుర్వినియోగం) కింద లెవెల్ 1 నేరాన్ని అంగీకరించాడు. మ్యాచ్ రిఫరీ శిక్షను కూడా అంగీకరించాడు. నిబంధ‌న‌ల ప్రకారం.. లెవెల్ 1 ఉల్లంఘనల కోసం మ్యాచ్ రిఫరీ నిర్ణయం తీసుకుంటారు.
Also Read: New Aadhaar App: సరికొత్త ఆధార్ యాప్.. ఇక ఆ పనులన్నీ ఈజీ
గ్లెన్ మాక్స్‌వెల్ ఐపీఎల్ 2025లో ఇప్పటివరకు పెద్దగా ఆకట్టుకోలేకపోయాడు. పంజాబ్ అతన్ని ఎన్నో ఆశలతో తమ జట్టులో చేర్చుకుంది. కానీ ఈ ఆస్ట్రేలియన్ స్టార్ ఆ ఆశలను నెరవేర్చలేకపోయాడు. ఇప్పటివరకు ఆడిన 4 మ్యాచ్‌లలో అతను విఫలమయ్యాడు. 4 మ్యాచ్‌లలో 3 ఇన్నింగ్స్‌లలో అతను 31 పరుగులు మాత్రమే చేశాడు. అంతేకాకుండా 4 మ్యాచ్‌లలో అతను 3 వికెట్లు తీశాడు. రాబోయే మ్యాచ్‌లలో పంజాబ్‌కు మాక్సీ నుండి ఎన్నో ఆశలు ఉండబోతున్నాయి.
పంజాబ్ మ్యాచ్ గెలిచింది
చెన్నైతో జ‌రిగిన మ్యాచ్‌లో మొదట బ్యాటింగ్ చేసిన పంజాబ్ 20 ఓవర్లలో 219 పరుగులు చేసింది. పంజాబ్ తరపున ప్రియాంష్ ఆర్య 42 బంతుల్లో 103 పరుగుల ఇన్నింగ్స్ ఆడాడు. అతనితో పాటు శశాంక్ సింగ్ 36 బంతుల్లో 52 పరుగులు చేశాడు. అయితే, లక్ష్యాన్ని ఛేదించే క్రమంలో సీఎస్కే 20 ఓవర్లలో 201 పరుగులు మాత్రమే చేయగలిగింది. సీఎస్కే తరపున డెవాన్ కాన్వే 49 బంతుల్లో 69 పరుగులు చేశాడు. మిగిలిన సీఎస్కే బ్యాట్స్‌మెన్ ఎవ‌రూ ఆక‌ట్టుకోలేక‌పోయారు.
