బౌలింగ్ యాక్షన్.. ఐసీసీ నిబంధనలు ఏం చెబుతున్నాయి?

Bowling Action

Bowling Action: టీ20 ప్రపంచకప్ 2026లో పాకిస్థాన్ స్పిన్నర్ ఉస్మాన్ తారిక్ బౌలింగ్ యాక్షన్ ఇప్పుడు హాట్ టాపిక్‌గా మారింది. దీనిపై క్రికెట్ వర్గాలు రెండుగా విడిపోయాయి. భారత మాజీ క్రికెటర్ ఆకాష్ చోప్రా దీనిపై ప్రశ్నలు గుప్పించగా, రవిచంద్రన్ అశ్విన్ మాత్రం అతనికి మద్దతుగా నిలిచారు. ఈ నేపథ్యంలో అసలు ఐసీసీ నిబంధనలు ఏం చెబుతున్నాయి? ఒక బౌలర్ యాక్షన్‌ను ఐసీసీ ఎలా పరీక్షిస్తుంది? అనే విషయాలు ఇక్కడ చూద్దాం.

ఉస్మాన్ తారిక్ యాక్షన్‌లో వివాదం ఏమిటి?

ఉస్మాన్ తారిక్ బంతిని విడిచే ముందు కాసేపు ఆగి,ఆ తర్వాత బౌలింగ్ చేస్తున్నాడు. ఈ ‘పాజ్’ బ్యాటర్లను తీవ్రంగా ఇబ్బంది పెడుతోంది. అశ్విన్ అభిప్రాయం ప్రకారం.. బంతి వేసే ముందు ఆగడం నిబంధనల ప్రకారం సరైనదే. కానీ బంతిని విసిరే క్రమంలో అతని చేయి వంగుతోందా లేదా అనేది ఐసీసీ తేల్చాల్సిన విషయం.

ఐసీసీ నిబంధనలు ఏం చెబుతున్నాయి?

క్రికెట్ నిబంధనల ప్రకారం.. బౌలర్ బంతిని విసరకూడదు, కేవలం బౌలింగ్ మాత్రమే చేయాలి.

15 డిగ్రీల నియమం: బౌలర్ బంతిని విడిచే సమయంలో తన మోచేతిని 15 డిగ్రీల కంటే ఎక్కువగా సాగదీస్తే లేదా వంచితే దానిని ‘ఇల్లీగల్ యాక్షన్’గా పరిగణిస్తారు. మానవ శరీర నిర్మాణం ప్రకారం బౌలింగ్ చేసేటప్పుడు చేయి స్వల్పంగా వంగడం సహజం కాబట్టి, ఐసీసీ ఈ 15 డిగ్రీల వరకు వెసులుబాటు కల్పించింది.

Also Read: ఆధార్ కార్డులో ఫోటో మార్చుకోవడానికి స్టెప్-బై-స్టెప్ ప్రాసెస్ ఇదే!

యాక్షన్‌ను ఐసీసీ ఎలా తనిఖీ చేస్తుంది?

ఒక బౌలర్ యాక్షన్‌పై అనుమానం వస్తే ఐసీసీ అనుసరించే ప్రక్రియ ఇలా ఉంటుంది.

ఫీల్డ్ రిపోర్ట్: మ్యాచ్ జరుగుతున్నప్పుడు అంపైర్లు లేదా మ్యాచ్ అధికారులు బౌలర్ యాక్షన్ సరిగ్గా లేదని భావిస్తే, వారు మ్యాచ్ ముగిశాక ఒక నివేదికను సమర్పిస్తారు.

బయోమెకానిక్స్ టెస్టింగ్: రిపోర్ట్ అందిన తర్వాత సదరు బౌలర్ ఐసీసీ గుర్తింపు పొందిన ‘టెస్టింగ్ సెంటర్’కు వెళ్లాలి. అక్కడ అత్యాధునిక 3D సెన్సార్లు, హై-స్పీడ్ కెమెరాల సాయంతో బౌలింగ్ యాక్షన్‌ను రికార్డ్ చేస్తారు.

విశ్లేషణ: ల్యాబ్‌లో బౌలర్ తన సాధారణ వేగంతో బంతులు వేయాల్సి ఉంటుంది. సాఫ్ట్‌వేర్ సాయంతో మోచేయి ఎన్ని డిగ్రీలు వంగుతుందో ఖచ్చితంగా లెక్కిస్తారు.

నిషేధం- పునరాగమనం: ఒకవేళ యాక్షన్ 15 డిగ్రీల కంటే ఎక్కువ ఉంటే ఆ బౌలర్‌పై వెంటనే నిషేధం విధిస్తారు. అతను తన యాక్షన్‌ను సరిదిద్దుకుని, మళ్లీ టెస్టులో పాస్ అయితేనే అంతర్జాతీయ క్రికెట్‌లో బౌలింగ్ చేయడానికి అనుమతిస్తారు.

Follow us