AUS vs ENG : యాషెస్ సిరీస్‌లో ఆసీస్ ఆలౌట్..నిలకడగా ఆడుతున్న ఇంగ్లండ్!
- By Vamsi Chowdary Korata Published Date - 11:03 AM, Sat - 22 November 25
యాషెస్ సిరీస్‌లో ఆస్ట్రేలియా – ఇంగ్లండ్ మధ్య తొలి టెస్టు ఉత్కంఠభరితంగా సాగుతోంది. మిచెల్ స్టార్క్ అద్భుత బౌలింగ్‌తో ఇంగ్లండ్ 172 పరుగులకు ఆలౌట్ కాగా, ఆస్ట్రేలియా 132 పరుగులకే కుప్పకూలింది. దీంతో ఇంగ్లండ్‌కు 40 పరుగుల ఆధిక్యం లభించింది. రెండో ఇన్నింగ్స్‌లో ఇంగ్లండ్ 59/1తో లంచ్ విరామానికి చేరుకుంది, మొత్తం 99 పరుగుల ఆధిక్యంలో ఉంది. క్రీజులో ఓపెనర్ బెన్ డకెట్, ఓలీ పోప్ నిలకడగా ఆడుతూ కొనసాగుతున్నారు.
ఆస్ట్రేలియా – ఇంగ్లండ్ మధ్య జరుగుతున్న యాషెస్ సిరీస్ చాలా ఆసక్తికరంగా సాగుతోంది. తొలి రోజే 19 వికెట్లు పడటంతో ఆట చాలా రసవత్తరంగా మారింది. బౌలర్లు నిప్పులు చెరుగుతున్న యాషెస్ సిరీస్ తొలి టెస్టులో రెండో రోజు ఆస్ట్రేలియా ఆలౌట్ అయింది. 123/9 ఓవర్ నైట్ స్కోర్‌తో రెండో రోజు ఆట ప్రారంభించిన ఆస్ట్రేలియా.. కొద్దిసేపటికే 132 పరుగులకు ఆలౌట్ అయింది.
యాషెస్ సిరీస్‌లో భాగంగా పెర్త్ వేదికగా ఆస్ట్రేలియా – ఇంగ్లండ్ మధ్య జరుగుతున్న తొలి టెస్టులో టాస్ గెలిచిన ఇంగ్లండ్ బ్యాటింగ్ ఎంచుకుంది. ఆస్ట్రేలియా పేస్ దిగ్గజం మిచెల్ స్టార్క్ అద్భుత బౌలింగ్ ధాటికి ఇంగ్లండ్ ఆటగాళ్లు క్రీజులో ఎక్కువసేపు నిల్చోలేకపోయారు. స్టార్క్ ఏడు వికెట్లు తీసుకోవడంతో ఇంగ్లండ్ జట్టు మొదటి ఇన్నింగ్స్‌లో 172 పరుగులకు ఆలౌట్ అయింది.
తొలి రోజు రెండో సెషన్‌లోనే మొదటి ఇన్నింగ్స్‌కి వచ్చిన ఆస్ట్రేలియాను ఇంగ్లండ్ బౌలర్లు భయపెట్టారు. జోఫ్రా ఆర్చర్, బ్రైడన్ కార్స్‌ ఆరంభంలో వికెట్లు పడగొట్టగా.. కెప్టెన్ బెన్ స్టోక్స్ ఐదు వికెట్లతో ఆసీస్ వెన్ను విరిచాడు. దాంతో తొలి రోజు ఆట ముగిసే సమయానికి ఆస్ట్రేలియా 9 వికెట్ల నష్టానికి 123 పరుగులు చేసింది. నాథన్ లయన్ – బ్రెండన్ డాగట్ రెండో రోజు మరో తొమ్మిది పరుగులు జోడించారు. దాంతో ఆసీస్ 132 పరుగులకు ఆలౌట్ అయింది.
మొదటి ఇన్నింగ్స్‌లో 40 పరుగుల ఆధిక్యం పొందిన ఇంగ్లండ్ జట్టు రెండో ఇన్నింగ్స్ ప్రారంభించింది. రెండో ఇన్నింగ్స్ ఆరంభంలోనే జాక్ క్రాలీని మిచెల్ స్టార్క్ కాట్ అండ్ బౌల్డ్‌గా పెవిలియన్‌కు పంపాడు. రెండు ఇన్నింగ్స్‌లలోనూ క్రాలీ ఐదో బంతికే అవుటవ్వడం విశేషం. ఆ తర్వాత బెన్ డకెట్, ఓలీ పోప్ మరో వికెట్ పడకుండా జాగ్రత్త వహించారు. దాంతో లంచ్ బ్రేక్ సమయానికి ఇంగ్లండ్ ఒక వికెట్ నష్టానికి 59 పరుగులు చేసింది. మొదటి ఇన్నింగ్స్‌లో లభించిన 40 పరుగుల ఆధిక్యంతో కలిపి ఇంగ్లండ్ 99 పరుగుల లీడింగ్‌లో కొనసాగుతోంది.
