Zomato layoffs: జొమాటోలో మొదలైన ఉద్యోగాల కోత.. ఇప్పటికే 100 మంది ఔట్..?

ప్రపంచవ్యాప్తంగా భారత మార్కెట్‌లో అస్థిరత ప్రభావం ప్రైవేట్ రంగంపై స్పష్టంగా కనిపిస్తోంది. ట్విట్టర్, ఫేస్‌బుక్ మాతృ సంస్థ మెటా తర్వాత ఇప్పుడు ఫుడ్ అగ్రిగేటర్ జొమాటో కూడా ఉద్యోగుల తొలగింపును ప్రకటించింది. Zomato ఇచ్చిన సమాచారం ప్రకారం.. కంపెనీ తన ఉద్యోగులలో 3 శాతం ఉద్యోగులను తొలగించనుంది. ఇప్పటికే 100 మందిని తొలగించినట్లు తెలుస్తోంది. ఇటీవల ప్రకటించిన త్రైమాసిక ఫలితాల్లో కొంతవరకు జొమాటో నష్టాలు తగ్గగా.. ఖర్చులు ఇంకా తగ్గించుకునేందుకు సంస్థ ఉద్యోగులను తొలగించే ప్రక్రియను మొదలుపెట్టింది.

ఫుడ్ అగ్రిగేటర్ జొమాటో శనివారం తన వర్క్‌ఫోర్స్‌లో 3 శాతం కంటే తక్కువ మందిని తొలగిస్తున్నట్లు ధృవీకరించింది. రెగ్యులర్ పనితీరు ఆధారంగా ఉద్యోగుల తొలగింపు ఉంటుందని కంపెనీ తెలిపింది. జొమాటో ప్రతినిధి మాట్లాడుతూ.. “మా వర్క్‌ఫోర్స్‌లో 3 శాతం కంటే తక్కువ మందితో సాధారణ పనితీరు ఆధారిత సంప్రదింపుల తర్వాత ఈ నిర్ణయం తీసుకున్నాం” అని పేర్కొన్నారు. ఈ గందరగోళానికి ముందు గురుగ్రామ్ ఆధారిత కంపెనీలో దాదాపు 3,800 మంది ఉద్యోగులు ఉన్నారు. జోమాటో చివరిసారిగా 520 మంది ఉద్యోగులను లేదా 13 శాతం ఉద్యోగులను 2020 మే నెలలో తొలగించింది. కరోనా వైరస్ మహమ్మారి తరువాత వ్యాపారంలో మందగమనానికి ప్రతిస్పందనగా గత కొన్ని వారాల్లో కంపెనీ నుండి ముగ్గురు ఉన్నత స్థాయి ఎగ్జిక్యూటివ్‌లు తమ పదవులకు రాజీనామా చేసిన విషయం తెలిసిందే.

జొమాటో సహ వ్యవస్థాపకుడు మోహిత్ గుప్తా శుక్రవారం కంపెనీని విడిచిపెట్టారు. రాహుల్ గంజు, ఇంటర్‌సిటీ లెజెండ్స్ సర్వీస్ మాజీ హెడ్ సిద్ధార్థ్ ఝవార్ ఈ నెల ప్రారంభంలో నిష్క్రమించిన విషయం తెలిసిందే. మోహిత్ గుప్తా గురుగ్రామ్ ఆధారిత సంస్థతో నాలుగున్నర సంవత్సరాల పని తర్వాత రాజీనామా చేశారు. అతను 2018లో కంపెనీలో చేరాడు. Zomato ఫుడ్ డెలివరీ యూనిట్‌కు నాయకత్వం వహించాడు. కంపెనీ అతన్ని 2020లో సహ వ్యవస్థాపకుడిగా ప్రమోట్ చేసింది. గత త్రైమాసికంలో జొమాటోకు కార్యకలాపాల ద్వారా వచ్చే ఆదాయం 62.20 శాతం పెరిగి రూ.1,661.3 కోట్లకు చేరుకుంది.