Hyderabad: హైదరాబాద్ లో భారీగా గంజాయి పట్టివేత

Hyderabad (21)

Hyderabad: తెలంగాణ పోలీసులు ఈ రోజు గురువారం రెండు వేర్వేరు కేసులలో మొత్తం ఐదుగురు అంతర్రాష్ట్ర డ్రగ్స్ వ్యాపారులను అరెస్టు చేశారు. నిందితుల నుండి పెద్ద మొత్తంలో గంజాయి మరియు విలువైన వస్తువులను స్వాధీనం చేసుకున్నారు.

మొదటి కేసులో ఇద్దరు అంతర్రాష్ట్ర వ్యాపారుల నుంచి 200 కిలోల గంజాయిని పోలీసులు స్వాధీనం చేసుకున్నారు. పోలీసులు తెలిపిన వివరాల ప్రకారం.. నిందితులు అక్కాబత్తుల లక్ష్మణకుమార్‌(32), గంటా శ్రీనుబాబు(26)లకు ఏడాది క్రితం గంజాయి సరఫరా చేసే నూకరాజుతో పరిచయం ఉంది. దీంతో ఆంధ్రప్రదేశ్‌లోని ఏజెన్సీ ప్రాంతం నుంచి మహారాష్ట్ర, ఢిల్లీకి గంజాయి రవాణా చేసేందుకు నిందితులిద్దరినీ ఒప్పించి, ఒక్కో ట్రిప్పుకు లక్ష రూపాయలు ఇస్తానని హామీ ఇచ్చాడు. అక్టోబరు 18న ఏపీలోని పోలవరం నుంచి లోడ్‌తో కూడిన గంజాయి లారీని ఢిల్లీకి తరలించాలని నిందితులను నూకరాజు ఆదేశించాడు. పక్కా సమాచారం మేరకు పోలీసులు అక్రమ రవాణాను అడ్డుకుని ఖమ్మం, సూర్యాపేట మీదుగా ఢిల్లీకి వెళుతుండగా పెద్దంబర్‌పేటలోని ఔటర్‌ రింగ్‌ రోడ్డు వద్ద ఇరువురిని పట్టుకున్నారు. 60.10 లక్షల విలువైన 200 కిలోల గంజాయి, ఒక లారీ, రూ. 10,000 నగదు, సెల్‌ఫోన్‌ను స్వాధీనం చేసుకున్నారు. నూకరాజు పరారీలో ఉన్నాడు అని పోలీసులు తెలిపారు.

రెండో కేసులో స్పెషల్ ఆపరేషన్ టీమ్ (SOT) మరియు కీసర పోలీసులు ఈ రోజు అంతర్రాష్ట్ర గంజాయి స్మగ్లింగ్ రాకెట్ నుండి ముగ్గురు వ్యక్తులను పట్టుకున్నారు మరియు వారి వద్ద నుండి 430 కిలోల గంజాయిని స్వాధీనం చేసుకున్నారు. పోలీసులు తెలిపిన వివరాల ప్రకారం నిందితులు మోహన్ రాథోడ్ (25), పెద్ద బాబు రావు (30), మద్దెల రమేష్ (27)గా గుర్తించారు. ఇతర నిందితులు బాహుళ్య లీలావతి, గోపాల్, సంతోష్ పరారీలో ఉన్నారు. వీరంతా కలిసి ఒడిశా నుంచి పాతబస్తీ హైదరాబాద్‌కు గంజాయి రవాణా చేసేందుకు పథకం పన్నారు.

నిందితులు ఒడిశా నుంచి 430 కిలోల గంజాయిని కొనుగోలు చేసి రెండు వాహనాల్లో హైదరాబాద్‌కు తిరిగి వస్తున్నట్లు పోలీసులు తెలిపారు. పక్కా సమాచారం మేరకు గంజాయి ఉన్న వాహనాన్ని అడ్డగించి ముగ్గురు వ్యక్తులను అదుపులోకి తీసుకుని 430 కిలోల గంజాయి, అశోక్ లేలాండ్ వాహనం, ఐరన్ పిల్లర్ బాక్సులు, నగదు రూ.2,170, నాలుగు సెల్‌ఫోన్లు, రూ. 11,00,000 స్వాధీనం చేసుకున్నారు.

Also Read: Liquor Scam: మనీష్ సిసోడియాకు భారీ షాక్

Follow us