Narendra Modi : ట్రంప్‌ వ్యాఖ్యలపై ప్రధాని మోడీ స్పందన

Narendra Modi : అమెరికా అధ్యక్షుడు డొనాల్డ్‌ ట్రంప్‌ తనపై చేసిన వ్యాఖ్యలకు భారత ప్రధాని నరేంద్ర మోడీ స్పందించారు. ట్రంప్‌ తనను “గొప్ప ప్రధానమంత్రి” అని అభివర్ణించిన మాటలను మోడీ స్వాగతిస్తూ, ఇరు దేశాల సంబంధాలు ఎప్పటికీ బలంగా, సానుకూలంగానే కొనసాగుతాయని తెలిపారు. తాజాగా మీడియాతో మాట్లాడిన ట్రంప్‌, “మోడీ మంచి స్నేహితుడు. ఆయన గొప్ప ప్రధానమంత్రి. మేమిద్దరం ఎప్పటికీ స్నేహితులమే. కానీ ఈ ప్రత్యేక సమయంలో మోడీ చేస్తున్న కొన్ని నిర్ణయాలు నాకు నచ్చడం లేదు” అని అన్నారు. అయినప్పటికీ ఇరు దేశాల మధ్య ఉన్న బంధం ప్రత్యేకమైనదని, అప్పుడప్పుడు విభేదాలు సహజమేనని పేర్కొన్నారు.

అదే సమయంలో భారత్‌పై కఠిన చర్యలు తీసుకున్న విషయాన్ని కూడా ట్రంప్‌ వెల్లడించారు. మొదటగా 25 శాతం సుంకం విధించామని, అనంతరం రష్యాతో సంబంధాలు పెట్టుకున్నందుకు జరిమానాగా మరో 25 శాతం సుంకం విధించామని, దాంతో మొత్తం 50 శాతం టారిఫ్‌లు అమల్లోకి వచ్చాయని ట్రంప్‌ స్పష్టం చేశారు. దీంతో రెండు దేశాల మధ్య వాణిజ్య సంబంధాలు గణనీయంగా దెబ్బతిన్నాయి. ట్రంప్‌ చేసిన వ్యాఖ్యలకు ప్రతిస్పందనగా ప్రధాని మోడీ సోషల్‌ మీడియాలో కీలక పోస్ట్‌ చేశారు. ట్రంప్‌ భావాలను అభినందిస్తున్నానని, భారత్–అమెరికా బంధం సానుకూలంగా ఉన్నదని తెలిపారు. “భవిష్యత్‌ దృష్ట్యా వ్యూహాత్మక భాగస్వామ్యాన్ని మరింత బలోపేతం చేస్తాం. రెండు దేశాల ప్రజలకు లాభం చేకూరేలా సహకారం కొనసాగుతుంది” అని మోడీ పేర్కొన్నారు.

PM Modi : భారత్‌–అమెరికా సంబంధాల్లో ఉద్రిక్తతలు : ఐరాస సమావేశాలకు మోడీ గైర్హాజరు!

భారత్–అమెరికా సంబంధాలపై చర్చ జరుగుతున్న వేళ, ట్రంప్‌ మరోసారి చైనా అంశాన్ని ప్రస్తావించారు. చైనా కారణంగా భారత్‌, రష్యాను కోల్పోయామని వ్యాఖ్యానించారు. ఇటీవల చైనాలో మోడీ–పుతిన్–జిన్‌పింగ్ కలిసి ఉన్న ఫొటోను సోషల్‌ మీడియాలో షేర్‌ చేసిన ఆయన, “భారత్, రష్యా చైనా ప్రభావంలోకి వెళ్తున్నాయి” అంటూ అభిప్రాయపడ్డారు. ఓవల్‌ కార్యాలయంలో విలేకరులు దీనిపై ప్రశ్నించగా, మోడీ తన మంచి స్నేహితుడని, ఇరు దేశాల మధ్య బంధం ఇంకా బలంగానే ఉందని ట్రంప్‌ మళ్లీ స్పష్టంచేశారు.

సుంకాల పెంపు, రష్యా చమురు దిగుమతుల అంశంపై అమెరికా తీసుకున్న వైఖరి కారణంగా భారత్–అమెరికా మధ్య వాణిజ్య సంబంధాలు ఇబ్బందులు ఎదుర్కొంటున్నాయి. అయితే రెండు దేశాల వ్యూహాత్మక అవసరాలు, జియోపాలిటికల్‌ పరిస్థితులను దృష్టిలో ఉంచుకుంటే, ఈ విభేదాలు తాత్కాలికమేనని నిపుణులు అభిప్రాయపడుతున్నారు. ప్రధాని మోడీ, అధ్యక్షుడు ట్రంప్‌ మధ్య వ్యక్తిగత స్నేహం బలంగానే ఉన్నప్పటికీ, వాణిజ్య పరమైన విభేదాలు ఇరుదేశాల సంబంధాలపై మబ్బులు కమ్ముతున్నాయి. రాబోయే కాలంలో ఈ వివాదాలు ఎలా పరిష్కారమవుతాయన్నదే రెండు దేశాల బంధానికి కీలకం కానుంది.

Operation Sindoor : యుద్ధం మూడురోజుల్లోనే ముగిసిందని అనుకోవడం తప్పు : ఆర్మీ చీఫ్‌ ద్వివేదీ