PM Kisan : రైతులకు శుభవార్త.. రేపు పీఎం కిసాన్‌ పథకం నిధులు విడుదల

PM Kisan : ప్రధాని కిసాన్‌ సమ్మాన్‌ నిధి (పీఎం కిసాన్‌) పథకం కింద రైతులకు మరొకసారి ఆర్థిక సాయం అందించేందుకు కేంద్ర ప్రభుత్వం సిద్ధమైంది. శనివారం, ఆగస్టు 2న కేంద్ర ప్రభుత్వం రూ.20,500 కోట్లు విడుదల చేయనుంది. ఇది పథకానికి సంబంధించిన 20వ విడతగా నమోదవుతోంది. ఈ మొత్తాన్ని దేశవ్యాప్తంగా ఉన్న సుమారు 9.7 కోట్ల మంది అర్హత కలిగిన రైతుల బ్యాంకు ఖాతాల్లో నేరుగా జమ చేయనున్నారు. ఈ నిధుల విడుదలకు సంబంధించిన కార్యక్రమం వారాణసిలో ప్రధాని నరేంద్ర మోడీ చేతుల మీదుగా ప్రారంభం కానుంది. ఈ సందర్భంగా మోడీ వర్చువల్ విధానంలో రైతుల ఖాతాల్లో నిధులు బదిలీ చేయనున్నారు. కేంద్ర వ్యవసాయ శాఖ మంత్రి శివరాజ్‌ సింగ్‌ చౌహాన్‌ బుధవారం ఈ కార్యక్రమ ఏర్పాట్లపై ఉన్నతస్థాయి సమీక్ష సమావేశం నిర్వహించారు.

ఏటా రూ.6,000 – మూడు విడతలుగా

పీఎం కిసాన్‌ యోజన 2019లో ప్రారంభమై, అప్పటి నుంచి రైతులకు నేరుగా బ్యాంకు ఖాతాల్లో ప్రభుత్వం డబ్బులు జమ చేస్తోంది. ప్రతి సంవత్సరం రూ.6,000 మొత్తాన్ని మూడు విడతలుగా (ప్రతి నాలుగు నెలలకు రూ.2,000 చొప్పున) విడుదల చేస్తారు. ఇప్పటివరకు 19 విడతలు విడుదల కాగా, ప్రస్తుతం 20వ విడతకు సంబంధించిన నిధులు విడుదల కానున్నాయి. ఇప్పటివరకు ఈ పథకం కింద రైతులకు దాదాపు రూ.3 లక్షల కోట్లకు పైగా నిధులు అందించబడినట్లు అధికారిక సమాచారం. ఈ విడతలో కూడా సుమారు 9.3 కోట్ల మంది రైతులు లబ్ధి పొందే అవకాశం ఉన్నట్లు ప్రభుత్వం అంచనా వేస్తోంది.

అర్హతకు కచ్చితమైన ప్రమాణాలు

ఈ పథకం ప్రయోజనాన్ని పొందాలంటే రైతులు కొన్ని నిబంధనలు పాటించాల్సి ఉంటుంది. ముఖ్యంగా e-KYC పూర్తిచేయడం, భూమి రికార్డుల ధృవీకరణ, మరియు ఆధార్‌ కార్డు బ్యాంకు ఖాతాకు అనుసంధానం వంటి అంశాలు తప్పనిసరి. ఈ ప్రక్రియలు పూర్తిచేయని రైతుల ఖాతాల్లోకి వాయిదా జమ కాకపోవచ్చని అధికారులు హెచ్చరిస్తున్నారు. కేంద్ర ప్రభుత్వం తరఫున ఇప్పటికే పలు రాష్ట్రాలకు స్పష్టమైన మార్గదర్శకాలను జారీ చేసింది. ఇంకా వివరాలను అప్‌డేట్ చేయనివారు వీలైనంత త్వరగా పీఎం కిసాన్‌ అధికారిక వెబ్‌సైట్‌ లేదా స్థానిక CSC కేంద్రాల ద్వారా వివరాలను సరిచేసుకోవాలని సూచన.

వర్చువల్‌గా లక్షల మంది రైతులు పాల్గొననున్న కార్యక్రమం

వారణసిలో జరిగే కార్యక్రమానికి దేశవ్యాప్తంగా లక్షలాది మంది రైతులు వర్చువల్‌ విధానంలో హాజరవుతారు. ప్రధానమంత్రి ప్రసంగంతో పాటు, నిధులు జమ అవుతున్న ప్రక్రియను ప్రత్యక్షంగా చూడనున్నారు. నిధులు జమ అయిన వెంటనే రైతులకు SMS ద్వారా సమాచారం అందుతుంది. ఈ కార్యక్రమం ద్వారా రైతుల ఆర్థిక అవసరాలను తీర్చడమే కాకుండా, వ్యవసాయరంగాన్ని బలోపేతం చేయడమనే ఉద్దేశ్యంతో ప్రభుత్వం ముందుకు సాగుతోంది. పీఎం కిసాన్‌ యోజనకు దేశవ్యాప్తంగా మంచి స్పందన లభించిందని అధికారులు వెల్లడించారు.

Read Also: Anil Ambani : రూ.17వేల కోట్ల బ్యాంక్ రుణ మోసాలపై అనిల్ అంబానీకి ఈడీ సమన్లు