Goa Governor : గోవా గవర్నర్‌గా అశోక్‌ గజపతిరాజు ప్రమాణ స్వీకారం

Ashok Gajapathi Raju sworn in as Governor of Goa

Goa Governor : ఆంధ్రప్రదేశ్‌కు చెందిన తెలుగుదేశం పార్టీ సీనియర్ నేత, కేంద్ర మాజీ మంత్రి పూసపాటి అశోక్ గజపతిరాజు గోవా గవర్నర్‌గా శనివారం అధికారికంగా ప్రమాణ స్వీకారం చేశారు. గోవా రాజ్‌భవన్‌లోని బంగ్లా దర్బార్‌ హాల్‌లో ఈ కార్యక్రమం అత్యంత గౌరవంగా, ఉత్సాహంగా జరిగింది. బాంబే హైకోర్టు ప్రధాన న్యాయమూర్తి జస్టిస్ ఆలోక్ అరాధే ఆయన చేత ప్రమాణం చేయించారు. ఈ కార్యక్రమానికి గోవా ముఖ్యమంత్రి ప్రమోద్ సావంత్, ఆయన మంత్రివర్గ సభ్యులు, ఆంధ్రప్రదేశ్ అసెంబ్లీ స్పీకర్ తమ్మినేని సీతారాం, కేంద్ర పౌర విమానయాన శాఖ మంత్రి కిన్జర్ రామ్మోహన్ నాయుడు, రాష్ట్ర మంత్రులు నారా లోకేష్, వంగలపూడి సంధ్యారాణి, టీడీపీ ఎంపీలు, ఏపీ బీజేపీ నేతలు పాల్గొన్నారు. ప్రమాణస్వీకారం అనంతరం అశోక్ గజపతిరాజును గోవా ముఖ్యమంత్రి ప్రమోద్ సావంత్ స్వయంగా ఇతర అధికారులు, ప్రజా ప్రతినిధులకు పరిచయం చేశారు. అనంతరం మంత్రి నారా లోకేష్ శాలువ కప్పి, పుష్పగుచ్ఛం అందించి గౌరవపూర్వకంగా సన్మానించారు.

Read Also: IRCTC : రైళ్లలో ఆహార నాణ్యతపై పెరుగుతున్న ఫిర్యాదులు..కేంద్ర మంత్రిత్వ శాఖ స్పందన

గత జూలై 14న అశోక్ గజపతిరాజును గోవా గవర్నర్‌గా నియమిస్తూ రాష్ట్రపతి కార్యాలయం నుంచి అధికారిక ఉత్తర్వులు విడుదలయ్యాయి. పీఎస్ శ్రీధరన్ పిళ్లై స్థానంలో ఆయన బాధ్యతలు స్వీకరించారు. గతంలో కేంద్ర మోదీ క్యాబినెట్‌లో పౌర విమానయాన శాఖ మంత్రిగా 2014 నుంచి 2018 వరకు పనిచేసిన ఆయన, రాష్ట్ర స్థాయిలో కూడా వివిధ కీలక మంత్రిత్వ శాఖలను నిర్వహించారు. ఎన్టీఆర్, చంద్రబాబు నాయుడు ప్రభుత్వాల్లో ఆయన పాత్ర విశేషమైనది. పూసపాటి వంశానికి చెందిన అశోక్ గజపతిరాజు, రాజకీయాల్లో క్లిన్ ఇమేజ్ కలిగిన నేతగా పేరుపొందారు. విదేశాల్లో ఉన్నత విద్యను అభ్యసించిన ఆయన, ఇప్పటివరకు ఏడు సార్లు ఎమ్మెల్యేగా గెలిచారు. 2014లో విజయనగరం లోకసభ నియోజకవర్గం నుంచి ఎంపీగా ఎన్నికై, కేంద్ర మంత్రిగా బాధ్యతలు నిర్వర్తించారు. తండ్రి మహారాజా అలక్‌నారాయణ స్థాపించిన విద్యాసంస్థలను నడిపించడంతో పాటు, మాన్సాస్ ట్రస్ట్ చైర్మన్‌గా కూడా ఆయన సేవలు అందించారు. గతంలో ఆంధ్ర క్రికెట్ అసోసియేషన్ అధ్యక్షుడిగా కూడా ఆయన బాధ్యతలు నిర్వహించారు.

గత ఎన్నికల్లో వయోభారంతో చురుకైన రాజకీయాల్లోనుంచి కొంత దూరంగా ఉన్నప్పటికీ, ఇటీవల ఏర్పడిన ఎన్డీఏ కూటమి ప్రభుత్వంలో ఆయనకు గౌరవప్రదమైన పదవి దక్కుతుందనే ప్రచారం కొనసాగింది. ఆ ప్రచారానికి తెరదించుతూ, గోవా గవర్నర్‌గా ఆయన నియామకం అధికారికమైంది. గోవా చేరుకునే సమయంలో ఆయనకు అక్కడి ముఖ్య కార్యదర్శి కాండేవేవు, డీజీపీ శ్రీ అలోక్ కుమార్, ఇతర ప్రజా ప్రతినిధులు ఘన స్వాగతం పలికారు. గోవా ప్రజలతో పాటు, టీడీపీ శ్రేణులు, అభిమానులు ఆయన ప్రమాణస్వీకారాన్ని గర్వంగా స్వీకరిస్తున్నారు. ఇప్పటిదాకా రాజకీయపరంగా మలినం లేని నాయకుడిగా పేరు తెచ్చుకున్న అశోక్ గజపతిరాజు గవర్నర్ పదవిలో తన అనుభవాన్ని ఉపయోగించి, ప్రజాస్వామ్య పరిరక్షణకు సహకరించే అవకాశముందని విశ్లేషకులు అభిప్రాయపడుతున్నారు. ఈ మేరకు సోషల్ మీడియా, పార్టీల వర్గాల్లో ఆయనకు అభినందనలు వెల్లువెత్తుతున్నాయి.

Read Also: MLA Padi Kaushik Reddy : ఎమ్మెల్యే పాడి కౌశిక్ ఇంటివద్ద టెన్షన్..టెన్షన్

Follow us