స‌రైన నిద్ర లేక‌పోతే డిప్రెష‌న్ త‌ప్ప‌దా?!

Quality Sleep

Quality Sleep: ప్రస్తుత కాలంలో నిద్ర అనేది అత్యంత నిర్లక్ష్యం చేయబడే విషయంగా మారిపోయింది. చాలామంది దీనిని కేవలం అలసటగా లేదా దినచర్యలో భాగంగా భావించి వదిలేస్తుంటారు. అయితే మీరు రాత్రంతా పక్క మీద అటు ఇటు తిరుగుతూ గడుపుతున్నా.. నిద్ర పదేపదే విరుగుతున్నా లేదా నిద్రపోవడంలో ఇబ్బంది పడుతున్నా దానిని తేలికగా తీసుకోవడం పెద్ద తప్పే అవుతుంది. ఎందుకంటే సరిగ్గా నిద్ర పట్టకపోవడం అనేది కేవలం అలసట మాత్రమే కాదు. అది డిప్రెషన్‌కు దారితీసే ఒక ‘సైలెంట్ సిగ్నల్’ కూడా కావచ్చు. ఈసారి వ‌ర‌ల్డ్ హెల్త్ డే సందర్భంగా తరచుగా నిర్లక్ష్యం చేయబడే నిద్రకు సంబంధించిన ఈ అంశంపై మాట్లాడుకుందాం. ఎందుకంటే మంచి నిద్ర అనేది మెరుగైన మానసిక ఆరోగ్యంకు పునాది.

నిద్రలేమి- డిప్రెషన్ మధ్య సంబంధం

నిపుణులు తెలిపిన‌ వివరాల ప్రకారం.. నిద్రకు.. ఒత్తిడి, ఆందోళన, డిప్రెషన్ మధ్య విడదీయలేని సంబంధం ఉంది. అంటే ఎవరైతే ఆందోళన లేదా డిప్రెషన్‌తో బాధపడుతుంటారో, వారి నిద్రపై ప్రభావం పడుతుంది. అదేవిధంగా ఎవరికైతే నిద్ర సరిగ్గా ఉండదో భవిష్యత్తులో వారికి ఆందోళన లేదా డిప్రెషన్ వచ్చే ప్రమాదం పెరుగుతుంది. దీనివల్ల మనిషి ఒక విషవలయం లో చిక్కుకుపోతాడు. అక్కడ ఒత్తిడి, డిప్రెషన్ పెరుగుతూ పోతాయి. నిద్ర మరింత దారుణంగా తయారవుతుంది.

దీర్ఘకాలిక నిద్ర సమస్యలు ఉన్నవారిలో డిప్రెషన్, ఆందోళన వచ్చే అవకాశం 2 నుండి 3 రెట్లు ఎక్కువగా ఉంటుందని పలు అధ్యయనాల్లో తేలింది. మరోవైపు ఇప్పటికే డిప్రెషన్ ఉన్నవారిలో నిద్రలేమి అనేది ఒక సాధారణ లక్షణం. డిప్రెషన్ వల్ల నిద్ర పాడవుతుంది. నిద్ర లేకపోవడం వల్ల డిప్రెషన్ మరింత పెరుగుతుంది.

నిద్ర సరిపోవడం లేదనే ఫిర్యాదు

నిపుణుల అభిప్రాయం ప్రకారం, చాలాసార్లు డిప్రెషన్ లేదా ఆందోళనతో బాధపడుతున్న వారు ప్రారంభంలో కేవలం నిద్ర సమస్యలతోనే డాక్టర్ వద్దకు వస్తుంటారు. తమ మనస్సులో అంతర్గతంగా మార్పులు జరుగుతున్నాయని వారికి తెలియదు. వారి మొదటి ఫిర్యాదు ‘నిద్ర సరిపోవడం లేదు’ అనే ఉంటుంది. నేటి జీవనశైలిలో ఒత్తిడి చాలా సాధారణమైపోయింది. ప్రజలు అర్థరాత్రి వరకు మొబైల్ ఫోన్లు వాడుతుంటారు. నిద్రపోయే ముందు కూడా స్క్రీన్ చూస్తుంటారు. పెరుగుతున్న ఈ స్క్రీన్ టైమ్ నిద్రను పాడు చేయడమే కాకుండా ఒత్తిడి స్థాయిలను మరింత పెంచుతోంది.

Also Read: మ‌రికాసేప‌ట్లో ల‌క్నో వ‌ర్సెస్ ఢిల్లీ మ్యాచ్‌.. పిచ్ రిపోర్ట్ ఇదే!

ఏం చేయాలి?

నిద్రను నిర్లక్ష్యం చేయడం చిన్న పొరపాటుగా అనిపించవచ్చు. కానీ దీని ప్రభావం మీ మెదడు, భావోద్వేగాలపై లోతుగా పడుతుంది. మీరు ప్రతిరోజూ రాత్రి సరిగ్గా నిద్రపోలేకపోతున్నా పదేపదే నిద్ర విరుగుతున్నా లేదా ఉదయం నిద్రలేచాక కూడా అలసటగా అనిపిస్తున్నా దానిని కేవలం ‘రూటీన్ సమస్య’ అని వదిలేయకండి. మీ నిద్ర అనేది మీ మానసిక ఆరోగ్యానికి మొదటి అద్దం అని గుర్తుంచుకోండి.

• ప్రతిరోజూ ఒక నిర్ణీత సమయానికి పడుకోవడం, లేవడం అలవాటు చేసుకోండి.
• నిద్రపోయే 30-40 నిమిషాల ముందే స్క్రీన్ (మొబైల్/ల్యాప్‌టాప్) కు దూరంగా ఉండండి.
• కెఫిన్ (కాఫీ/టీ), అర్థరాత్రి భారీ భోజనానికి దూరంగా ఉండండి.
• పగటిపూట చిన్నపాటి శారీరక వ్యాయామం తప్పనిసరిగా చేయండి.
• నిద్ర సమస్య చాలా కాలం పాటు కొనసాగితే, ఖచ్చితంగా నిపుణుల సలహా తీసుకోండి.

Follow us