కోడిగుడ్లు ఆరోగ్యానికి ఎంత వరకు మేలు?..ఎంత మోతాదులో? ఎలా తినాలి?

How good are eggs for health?..in what quantity? How to eat them?

. గుడ్లలో దాగి ఉన్న పోషక శక్తి

. గుండె ఆరోగ్యం..మితమే ముఖ్యము

. ఈ పోషకాల వల్ల మెదడు అభివృద్ధి

Eggs : తక్కువ ధరకే మన శరీరానికి అవసరమైన అనేక పోషకాలను అందించే ఆహారాల్లో కోడిగుడ్లు ముందువరుసలో ఉంటాయి. రోజువారీ ఆహారంలో గుడ్లను చేర్చుకోవడం వల్ల శరీరానికి శక్తి లభించడమే కాకుండా, మెదడు నుంచి గుండె వరకు అనేక అవయవాల ఆరోగ్యానికి మేలు జరుగుతుందని పోషకాహార నిపుణులు చెబుతున్నారు. అయితే, మితిమీరిన వినియోగం ఆరోగ్య సమస్యలకు దారి తీసే అవకాశం ఉందన్న హెచ్చరికలూ ఉన్నాయి. అందుకే గుడ్ల వల్ల కలిగే లాభాలు, నష్టాలు, ఎంత మోతాదులో తీసుకోవాలి అనే అంశాలపై ఇప్పుడు అవగాహన అవసరం.

కోడిగుడ్లలో మన శరీరానికి అవసరమైన విటమిన్లు, ఖనిజ లవణాలు సమృద్ధిగా ఉంటాయి. ముఖ్యంగా ప్రోటీన్లు, విటమిన్ ఎ, డి, బి6, బి12, ఫోలిక్ ఆమ్లం, పాంతోథెనిక్ ఆమ్లం వంటి పోషకాలు గుడ్లలో అధికంగా లభిస్తాయి. అంతేకాకుండా ఐరన్, జింక్, పొటాషియం, మెగ్నీషియం, సోడియం, నియాసిన్, రైబోఫ్లేవిన్ వంటి ఖనిజాలు కూడా గుడ్లలో ఉన్నాయి. ఈ పోషకాల వల్ల మెదడు అభివృద్ధి మెరుగుపడుతుంది. కండరాల బలాన్ని పెంచడంలో, కంటి చూపును కాపాడడంలో, రోగనిరోధక శక్తిని బలోపేతం చేయడంలో గుడ్లు కీలక పాత్ర పోషిస్తాయి. శరీరానికి తక్షణ శక్తిని అందించే ఆహారంగా కూడా గుడ్లకు మంచి పేరు ఉంది.

గుడ్లు గుండె ఆరోగ్యానికి మేలు చేసేవే అయినప్పటికీ, అధికంగా తీసుకుంటే సమస్యలు ఎదురయ్యే అవకాశం ఉందని వైద్యులు హెచ్చరిస్తున్నారు. కోడిగుడ్డులోని పచ్చసొనలో కొలెస్ట్రాల్ పరిమాణం ఎక్కువగా ఉంటుంది. ఒక గుడ్డులో సుమారు 180 నుంచి 300 మిల్లీగ్రాముల వరకు కొలెస్ట్రాల్ ఉండవచ్చు. తెల్లసొనలో మాత్రం కొలెస్ట్రాల్ ఉండదు. అవసరానికి మించి గుడ్లు తీసుకుంటే గుండెజబ్బులు, స్ట్రోక్, అధిక రక్తపోటు వంటి సమస్యలు వచ్చే ప్రమాదం ఉందని నిపుణులు చెబుతున్నారు. ముఖ్యంగా ఇప్పటికే గుండె సంబంధిత సమస్యలు లేదా అధిక కొలెస్ట్రాల్ ఉన్నవారు గుడ్ల వినియోగంలో మరింత జాగ్రత్త పాటించాల్సిన అవసరం ఉంది.

ఐసీఎంఆర్, ఎన్ఐఎన్ మార్గదర్శకాల ప్రకారం రోజుకు సుమారు 300 మిల్లీగ్రాముల కొలెస్ట్రాల్ వరకు ఉన్న ఆహారాన్ని తీసుకోవచ్చు. ఈ లెక్కన సాధారణ ఆరోగ్యవంతులు వారానికి 3 నుంచి 4 గుడ్లు తీసుకోవచ్చని పోషకాహార నిపుణులు సూచిస్తున్నారు. గుండెజబ్బులు లేదా అధిక కొలెస్ట్రాల్ ఉన్నవారు వారానికి గరిష్ఠంగా 3 గుడ్లకే పరిమితం కావడం మంచిది. అలాగే గుడ్లను కేకులు, కుకీలు, వేయించిన స్నాక్స్ రూపంలో తీసుకోవడం వల్ల ట్రాన్స్ ఫ్యాట్స్, చక్కెర, శుద్ధి చేసిన పిండి కారణంగా క్యాలరీలు పెరిగి ఆరోగ్యానికి హాని కలగవచ్చు. అందుకే గుడ్లను నేరుగా ఉడికించి తీసుకోవడం ఉత్తమం. ఇలా తీసుకుంటే గుడ్లలోని పోషకాలు శరీరానికి సమర్థవంతంగా అందుతాయి. సరైన మోతాదులో, సరైన విధానంలో తీసుకున్నప్పుడే కోడిగుడ్లు నిజంగా మన ఆరోగ్యానికి మిత్రులుగా మారుతాయని నిపుణులు స్పష్టం చేస్తున్నారు.

Follow us