Pithapuram Varma: టీడీపీకి షాక్ ఇవ్వ‌నున్న పిఠాపురం వ‌ర్మ‌.. రాజీనామ చేసే యోచ‌న‌లో కీల‌క నేత‌!

Pithapuram Varma: ఆంధ్రప్రదేశ్‌లో టీడీపీ, జనసేన, బీజేపీ కూటమి అధికారంలోకి వచ్చిన తర్వాత పిఠాపురం రాజకీయాలు మరోసారి ఆసక్తికరంగా మారాయి. పిఠాపురం నుంచి జనసేన అధినేత పవన్ కళ్యాణ్ విజయంలో కీలక పాత్ర పోషించిన టీడీపీ సీనియర్ నాయకుడు ఎస్.వి.ఎస్.ఎన్. వర్మ (Pithapuram Varma) తన రాజకీయ భవిష్యత్తుపై కీలక నిర్ణయం తీసుకునే అవకాశం ఉందని ఆయన అనుచరులు చెబుతున్నారు. రాబోయే 15 ఏళ్లు కూటమి కొనసాగుతుందని పవన్ కళ్యాణ్ ప్రకటించడంతో, భవిష్యత్తులో కూడా పిఠాపురంలో తనకు అవకాశం ఉండకపోవచ్చని గ్రహించిన వర్మ ఈ ఆలోచనలో ఉన్నారని తెలుస్తోంది.

వర్మ అసంతృప్తికి కారణాలు

2024 ఎన్నికల్లో పవన్ కళ్యాణ్ గెలుపు కోసం వర్మ తన శక్తినంతటినీ ఉపయోగించారు. స్థానికంగా బలమైన నాయకుడిగా ఉన్న వర్మ సహకారం వల్లే పవన్ కళ్యాణ్ విజయం సులభమైందనే అభిప్రాయాలు ఉన్నాయి. కానీ, అధికారం వచ్చాక వర్మను పూర్తిస్థాయిలో పక్కన పెట్టేశారని ఆయన వర్గీయులు ఆరోపిస్తున్నారు. వర్మకు ప్రాధాన్యత ఇస్తే పవన్ కళ్యాణ్ ప్రభావం తగ్గుతుందనే భావనతోనే ఇలా చేశారని అంటున్నారు.

Also Read: Shubman Gill: ‘నెవర్ గివ్ అప్’.. ఓవ‌ల్ టెస్ట్ విజ‌యం త‌ర్వాత గిల్ కీల‌క వ్యాఖ్య‌లు..!

ఇటీవల పిఠాపురంలో జరిగిన ఒక సభలో ఎమ్మెల్సీ నాగబాబు చేసిన వ్యాఖ్యలు వర్మ వర్గంలో మరింత అసంతృప్తిని పెంచాయి. “ఎవరి దయ వల్ల మేము ఇక్కడ గెలవలేదు. కేవలం పవన్ కళ్యాణ్‌కు ఉన్న ఇమేజ్ వల్లనే గెలిచాం” అని నాగబాబు వ్యాఖ్యానించారు. ఈ వ్యాఖ్యలు పవన్ గెలుపులో వర్మ పాత్ర ఏమీ లేదని పరోక్షంగా చెప్పినట్టయ్యిందని వర్మ వర్గీయులు తీవ్రంగా ఖండిస్తున్నారు.

వర్మ గతం, భవిష్యత్తుపై అంచనాలు

వర్మకు పిఠాపురంలో బలమైన వ్యక్తిగత ఓటు బ్యాంకు ఉంది. 2014 ఎన్నికల్లో టీడీపీ టికెట్ ఇవ్వనప్పటికీ, స్వతంత్ర అభ్యర్థిగా పోటీ చేసి 47,000 ఓట్ల మెజారిటీతో గెలిచి తన సత్తా నిరూపించుకున్నారు. ఇప్పుడు కూడా అదే విధంగా తన రాజకీయ భవిష్యత్తును తానే నిర్ణయించుకోవాలని భావిస్తున్నట్లు సమాచారం.

పవన్ కళ్యాణ్ కూటమి భవిష్యత్తు గురించి చేసిన ప్రకటనతో వర్మ మళ్లీ టీడీపీలో తన భవిష్యత్తు లేదని నిర్ధారించుకున్నారని, అందుకే ప్రత్యామ్నాయ మార్గాలను అన్వేషిస్తున్నారని ఆయన అనుచరులు చెబుతున్నారు. ఈ నేపథ్యంలో వర్మ టీడీపీకి రాజీనామా చేసి వేరే మార్గం చూసుకునే అవకాశం ఉందని ఊహాగానాలు వినిపిస్తున్నాయి. వర్మ ఏ నిర్ణయం తీసుకుంటారనేది ఇప్పుడు పిఠాపురం రాజకీయ వర్గాల్లో ఆసక్తికర చర్చకు దారితీసింది.