Comedian Anudeep: డిప్యూటీ సీఎం పవన్ కళ్యాణ్ పై అనుచిత వ్యాఖ్యలు.. స్టాండప్ కమెడియన్‌ను అదుపులోకి తీసుకున్న ఏపీ పోలీసులు.

Anudeep Katikala Arrest

Anudeep Katikala హైదరాబాద్‌కు చెందిన స్టాండప్ కమెడియన్ అనుదీప్ కటికలను ఏపీ పోలీసులు అరెస్ట్ చేశారు. ఏపీ డిప్యూటీ సీఎం పవన్ కల్యాణ్, ఆయన కుటుంబ సభ్యులపై అనుచిత వ్యాఖ్యలు చేశారన్న ఆరోపణలతో ఉత్తరప్రదేశ్‌లో ఆయన్ను అదుపులోకి తీసుకున్నారు. ఈ ఘటన రాష్ట్రవ్యాప్తంగా చర్చనీయాంశంగా మారింది.

జనసేన నాయకుడు బడే వెంకట కృష్ణ ఫిర్యాదు మేరకు కాకినాడ పోలీసులు ఈ చర్యలు చేపట్టారు. తన కామెడీ షోలో పవన్ కల్యాణ్ మూడు వివాహాలు, నిహారిక కొణిదెల విడాకులపై అనుదీప్ చేసిన వ్యాఖ్యలు సోషల్ మీడియాలో వైరల్ అయ్యాయి. దీంతో కాకినాడ వన్ టౌన్ పోలీసులు కేసు నమోదు చేశారు.

భారతీయ న్యాయ సంహిత (బీఎన్ఎస్‌), ఐటీ చట్టంలోని పలు సెక్షన్ల కింద అనుదీప్‌పై పరువునష్టం, మహిళల గౌరవానికి భంగం కలిగించడం వంటి అభియోగాలు మోపారు. కుటుంబంతో కలిసి ప్రయాగ్‌రాజ్‌లో పర్యటిస్తుండగా పోలీసులు ఆయన్ను అదుపులోకి తీసుకున్నారు. అయితే, తన వ్యాఖ్యలు ఎవరినీ కించపరచడానికి కాదని, విడాకులపై సమాజంలో ఉన్న ధోరణిని ప్రశ్నించడమే తన ఉద్దేశమని అనుదీప్ గతంలోనే క్షమాపణ చెప్పారు.

క్షమాపణ చెప్పినప్పటికీ, కేసు తీవ్రత దృష్ట్యా పోలీసులు చట్టపరమైన చర్యలు తీసుకున్నారు. ప్రస్తుతం అనుదీప్‌ను విచారణ నిమిత్తం కాకినాడకు తరలిస్తున్నట్లు సమాచారం. పూర్తి విచారణ అనంతరం తదుపరి చర్యలు తీసుకోనున్నారు.

Follow us