Vidudala Rajini : కూటమి పాలనపై మాజీ మంత్రి విడదల రజిని విమర్శలు

Minister Vidudala Rajni

ఆంధ్రప్రదేశ్ రాష్ట్రంలో అధికార కూటమి పాలన తీరుపై మాజీ మంత్రి విడదల రజిని తీవ్రస్థాయిలో విమర్శలు గుప్పించారు. ఒకటో తేదీ వచ్చిందంటే చాలు, పెన్షన్ల పంపిణీని ఒక సంబరంలా చూపిస్తూ ముఖ్యమంత్రి చంద్రబాబు నాయుడు కేవలం ఫొటోషూట్లకు ప్రాధాన్యత ఇస్తున్నారని ఆమె మండిపడ్డారు. పెన్షన్లు ఇవ్వడం అనేది ప్రభుత్వ కనీస బాధ్యత అని, కానీ చంద్రబాబు ఏదో అపర దానకర్ణుడిలా ఎలివేషన్లు ఇచ్చుకోవడం విడ్డూరంగా ఉందని ఎద్దేవా చేశారు. ప్రజలకు మేలు చేస్తున్నట్లు కలరింగ్ ఇస్తూ, తెర వెనుక సామాన్యుల ప్రయోజనాలను దెబ్బతీస్తున్నారని ఆమె ఆరోపించారు.

6 లక్షల పెన్షన్ల రద్దు.. ఇది సామాన్యుడిపై దాడి కాదా?

ప్రభుత్వం గొప్పలు చెప్పుకోవడం పక్కన పెడితే, క్షేత్రస్థాయిలో పెన్షన్ల కోత విపరీతంగా ఉందని రజిని విమర్శించారు. కూటమి ప్రభుత్వం అధికారంలోకి వచ్చిన తర్వాత కొత్తగా ఒక్క పెన్షన్ కూడా మంజూరు చేయలేదని, పైగా గతంలో ఉన్న సుమారు 6 లక్షల పెన్షన్లను రద్దు చేశారని ఆమె ఆగ్రహం వ్యక్తం చేశారు. అర్హులైన పేదల పొట్ట కొడుతూ, సాంకేతిక కారణాల పేరుతో లబ్ధిదారుల జాబితాను కుదించడం దారుణమని పేర్కొన్నారు. సంక్షేమ పథకాల్లో కోతలు విధిస్తూనే, ప్రచారానికి మాత్రం కోట్ల రూపాయలు ఖర్చు చేస్తున్నారని ఆమె నిలదీశారు.

అద్దాల మేడల కోసం రూ. 2,500 కోట్లా? మెడికల్ కాలేజీల పరిస్థితి ఏంటి?

రాజధాని అమరావతిలో అసంపూర్తిగా ఉన్న భవనాలకు అద్దాలు బిగించడం వంటి పనుల కోసం ప్రభుత్వం రూ. 2,500 కోట్లు కేటాయించడాన్ని విడదల రజిని తప్పుబట్టారు. కేవలం అద్దాల కోసమే అంత భారీ మొత్తాన్ని ఖర్చు చేసే బదులు, రాష్ట్రవ్యాప్తంగా పెండింగ్‌లో ఉన్న మెడికల్ కాలేజీలను అందుబాటులోకి తేవచ్చు కదా అని ఆమె ప్రశ్నించారు. ప్రజారోగ్యం కంటే భవనాల అలంకరణే ప్రభుత్వానికి ముఖ్యమా అని ఆమె నిలదీశారు. గత ప్రభుత్వ హయాంలో చేపట్టిన వైద్య విద్యా ప్రాజెక్టులను నిర్లక్ష్యం చేస్తూ, ప్రాధాన్యత లేని పనులకు నిధులు మళ్లించడం ప్రజాధనాన్ని వృథా చేయడమేనని ఆమె విమర్శించారు.

Follow us