Trump : జపాన్ పై సుంకం 25 నుంచి 15 శాతానికి తగ్గింపు

America Japan

Trump : అమెరికా అధ్యక్షుడు డొనాల్డ్ ట్రంప్ తాజాగా కీలక ఆర్థిక నిర్ణయం తీసుకున్నారు. జపాన్‌తో నెలల తరబడి సాగిన వాణిజ్య చర్చలకు తెరదిస్తూ, ఇరు దేశాల మధ్య కొత్త ఒప్పందం అమలు దిశగా ముందడుగు వేశారు. ఈ క్రమంలో జపాన్ నుంచి అమెరికాకు దిగుమతి అవుతున్న వాహనాలు, ఆటో విడిభాగాలు తదితర ఉత్పత్తులపై ఇప్పటి వరకు అమల్లో ఉన్న అధిక సుంకాలను తగ్గిస్తూ ఉత్తర్వు జారీ చేశారు.

Nails : గోర్లు కొరికేవారికి షాకింగ్ న్యూస్.. దీర్ఘకాలిక వ్యాధులు వచ్చే చాన్స్

ఇప్పటి వరకు జపాన్ వాహనాలపై 25–27.5 శాతం సుంకం అమలులో ఉండగా, ట్రంప్ ప్రభుత్వం తాజాగా దానిని 15 శాతానికి పరిమితం చేసింది. ఈ నిర్ణయం జపాన్ ఆటోమొబైల్ పరిశ్రమకు ఊరట కలిగించడంతో పాటు, అమెరికాలో పెట్టుబడులకు కూడా కొత్త అవకాశాలు తెరవనుందని అధికారులు వెల్లడించారు. జపాన్ కంపెనీలు అమెరికాలో దాదాపు $550 బిలియన్ల పెట్టుబడులు పెట్టే అవకాశముందని అంచనా. ఈ తగ్గింపు ఈ నెలాఖరులోపు అమల్లోకి వచ్చే అవకాశం ఉంది.

గురువారం వైట్ హౌస్‌లో జరిగిన కార్యక్రమంలో ట్రంప్ ప్రత్యేక కార్యనిర్వాహక ఉత్తర్వుపై సంతకం చేశారు. దానిని ఆయన “అమెరికా–జపాన్ వాణిజ్య సంబంధాల్లో కొత్త శకం ఆరంభం”గా అభివర్ణించారు. ఒప్పందం ప్రకారం, అమెరికాలోకి దిగుమతి అయ్యే జపాన్ ఉత్పత్తులపై సగటున 15 శాతం బేస్‌లైన్ సుంకం విధించబడుతుంది. అయితే ఆటోమొబైల్స్, ఏరోస్పేస్ ఉత్పత్తులు, జనరిక్ ఔషధాలు, అలాగే అమెరికాలో లభించని కొన్ని సహజ వనరులపై ప్రత్యేక మినహాయింపులు ఉంటాయి.

గతంలో ట్రంప్ ప్రభుత్వం జపాన్, దక్షిణ కొరియాపై 25 శాతం సుంకం విధిస్తామని ప్రకటించడం వల్ల ఇరు దేశాల మధ్య సంబంధాలు కఠినమయ్యాయి. వాణిజ్య చర్చలు నిలిచిపోయిన సందర్భంలో, తాజా నిర్ణయం మలుపు తిప్పిందని నిపుణులు వ్యాఖ్యానిస్తున్నారు. ఈ ఒప్పందంలో భాగంగా జపాన్ కూడా కొన్ని కీలక వాగ్దానాలు చేసింది. అమెరికాలో తయారైన వాణిజ్య విమానాలు, రక్షణ పరికరాలు, బియ్యం, మొక్కజొన్న, సోయాబీన్స్, బయోఇథనాల్ తదితర వ్యవసాయ ఉత్పత్తులను అధిక స్థాయిలో కొనుగోలు చేయడానికి అంగీకరించింది.

ముఖ్యంగా, టోక్యో ‘మినిమమ్ యాక్సెస్ ప్లాన్’ కింద అమెరికా బియ్యం దిగుమతులను 75 శాతం పెంచేలా సమ్మతించింది. దీని ఫలితంగా అమెరికా నుంచి జపాన్‌కు వెళ్లే వ్యవసాయ ఎగుమతులు ప్రతి సంవత్సరం సుమారు $8 బిలియన్ల మేర పెరిగే అవకాశం ఉందని అంచనా వేస్తున్నారు. ఆర్థిక నిపుణుల అభిప్రాయం ప్రకారం, ఈ ఒప్పందం అమెరికా–జపాన్ ద్వైపాక్షిక వాణిజ్యానికి కొత్త ఊపును తీసుకువచ్చి, ఇరు దేశాల ఆర్థిక ప్రయోజనాలను సమతుల్యం చేస్తుందని భావిస్తున్నారు.

Lokesh : నేడు ప్రధాని మోదీతో లోకేశ్ భేటీ

Follow us