Trump Tarrifs : ఉక్కు, అల్యూమినియం తర్వాత ఇప్పుడు ఫర్నిచర్ వంతు

Trump Tarrifs : అమెరికా అధ్యక్షుడు డొనాల్డ్ ట్రంప్, ఉక్కు, అల్యూమినియం, ఆటోమొబైల్స్ వంటి రంగాలపై గతంలో విధించిన సుంకాల తర్వాత, ఇప్పుడు ఫర్నిచర్ పరిశ్రమపై దృష్టి సారించారు. విదేశాల నుంచి దిగుమతి అవుతున్న ఫర్నిచర్‌పై కొత్త, భారీ సుంకాలను విధించేందుకు ఆయన తన సన్నాహాలను ప్రకటించారు. ఈ అంశంపై అమెరికా ప్రభుత్వం ఒక కీలక విచారణ ప్రారంభించబోతోందని ట్రంప్ శుక్రవారం వెల్లడించారు.

తన ‘ట్రూత్ సోషల్’ ప్లాట్‌ఫామ్‌లో పోస్టు చేస్తూ, “అమెరికాలోకి దిగుమతి అవుతున్న ఫర్నిచర్‌పై మేము పెద్ద టారిఫ్ విచారణ జరుపుతున్నాం. రాబోయే 50 రోజుల్లోగా ఈ విచారణ పూర్తి అవుతుంది” అని ఆయన చెప్పారు. ఇప్పటివరకు ఫర్నిచర్‌పై ఎంత శాతం సుంకం విధించాలనేది నిర్ణయించబడలేదు. అయితే ఈ చర్య ద్వారా నార్త్ కరోలినా, సౌత్ కరోలినా, మిచిగాన్ వంటి రాష్ట్రాల్లో ఫర్నిచర్ పరిశ్రమను తిరిగి చురుకుగా నిలిపే లక్ష్యం ఉన్నట్టు ఆయన వివరించారు.

AP Free Bus Effect : మహిళలపై కేసు నమోదు

ప్రభుత్వ గణాంకాల ప్రకారం, అమెరికాలో ఫర్నిచర్ తయారీ రంగంలో జులై నాటికి 3,40,000 మంది పని చేస్తున్నారు. ఇది 2000 సంవత్సరంతో పోలిస్తే దాదాపు సగం మాత్రమే. ప్రస్తుతం అమెరికాకు ఫర్నిచర్ సరఫరా చేస్తున్న దేశాల్లో చైనా, వియత్నాం అగ్రస్థానంలో ఉన్నాయి. 2024లో అమెరికా 25.5 బిలియన్ డాలర్ల విలువైన ఫర్నిచర్‌ను దిగుమతి చేసుకున్నట్టు ట్రేడ్ నివేదికలు వెల్లడించాయి.

జనవరిలో తిరిగి అధ్యక్ష బాధ్యతలు చేపట్టిన తర్వాత ట్రంప్ పలు విదేశీ ఉత్పత్తులపై సుంకాలను విధిస్తూ వస్తున్నారు. ఇప్పటికే ఫార్మాస్యూటికల్స్, చిప్స్, కీలకమైన ఖనిజాల వంటి ఉత్పత్తుల దిగుమతులపై జాతీయ భద్రత పరంగా విచారణలు జరిగాయి. దేశాలవారీగా విధించే సుంకాలకు కొన్ని సార్లు చట్టపరమైన సవాళ్లు ఎదురవుతున్నా, ఒక ప్రత్యేక రంగంపై సక్రమ విచారణ చేసి విధించే టారిఫ్‌లకు పటిష్టమైన చట్టపరమైన ఆధారం ఉంటుందని నిపుణులు భావిస్తున్నారు. కొత్త సుంకాలు అమల్లోకి వస్తే, దిగుమతిదారులపై భారం పెరిగి, అమెరికాలో ఫర్నిచర్ ధరలు కూడా పెరగవచ్చని అంచనాలు ఉన్నాయి.

AP DSC Merit List 2025 : మెరిట్ లిస్టు.. టాపర్లు వీరే !!