TG Govt : వాణిజ్య కేంద్రాల్లో ఉద్యోగుల పని వేళల పరిమితిని సవరించిన తెలంగాణ ప్రభుత్వం

TG Govt :  వాణిజ్య రంగంలో కార్యకలాపాలను మరింత సులభతరం చేయాలనే లక్ష్యంతో తెలంగాణ ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా ఉన్న వాణిజ్య సంస్థల్లో ఉద్యోగుల పని వేళలకు సంబంధించి ప్రభుత్వం నూతన మార్గదర్శకాలను విడుదల చేసింది. తాజా ఉత్తర్వుల ప్రకారం, రోజు పనిని గరిష్టంగా 10 గంటల వరకు అనుమతిస్తూ, అయితే వారానికి 48 గంటలు మించకూడదని స్పష్టం చేసింది. ఈ నిర్ణయం “ఈజ్ ఆఫ్ డూయింగ్ బిజినెస్” కార్యక్రమంలో భాగంగా తీసుకున్నదని అధికార వర్గాలు వెల్లడించాయి. ప్రపంచ బిజినెస్ ర్యాంకింగ్‌ల్లో తెలంగాణ స్థాయిని పెంచడం, పెట్టుబడిదారులకు అనుకూల వాతావరణం కల్పించడమే ఇందుకి ముఖ్య కారణంగా పేర్కొన్నాయి. అయితే, ఉద్యోగుల హక్కులు, సంక్షేమాన్ని దృష్టిలో ఉంచుకొని కొన్ని నియమ నిబంధనలను ప్రభుత్వం స్పష్టంగా పేర్కొంది.

ఉత్తర్వులలో ప్రధానాంశాలు ఇవే..

రోజుకు గరిష్టంగా 10 గంటల పని

ప్రతిరోజూ ఉద్యోగి గరిష్టంగా 10 గంటలు మాత్రమే పనిచేయాల్సి ఉంటుంది. అయితే, ఈ పని వేళల్లో మద్యలో విశ్రాంతి సమయం తప్పనిసరి.

వారానికి 48 గంటల పరిమితి

మొత్తం పని గంటలు వారానికి 48 గంటల కంటే మించరాదు. దానిని మించి పనిచేస్తే, అది ఓవర్‌టైమ్ (OT) కింద పరిగణించి, అదనపు వేతనం చెల్లించాల్సి ఉంటుంది.

అరగంట విశ్రాంతి తప్పనిసరి

ఒక పని దినంలో కనీసం 6 గంటలపాటు పనిచేసే ఉద్యోగికి, కనీసం అరగంట విరామం ఇవ్వడం తప్పనిసరిగా పేర్కొంది. ఈ విరామంతో సహా మొత్తం పని సమయం 12 గంటల కంటే మించకూడదని ప్రభుత్వం పేర్కొంది.

ఓవర్‌టైమ్‌కు న్యాయమైన వేతనం

నిర్దేశిత గరిష్ట పని గంటలకు మించి పనిచేస్తే, ఉద్యోగులకు న్యాయమైన ఓవర్‌టైమ్ వేతనం చెల్లించాల్సిందే. ఈ విషయంలో ఉద్యోగుల హక్కులను కాపాడే విధంగా ప్రభుత్వం దృష్టి పెట్టింది.

నిబంధనల ఉల్లంఘనపై చర్యలు

మార్గదర్శకాలను పాటించకపోతే సంబంధిత సంస్థలపై శిక్షలూ, జరిమానాలు విధించనున్నట్లు స్పష్టం చేసింది. లేబర్ ఇన్‌స్పెక్టర్ల ద్వారా తనిఖీలు నిర్వహించి, నిబంధనలు ఉల్లంఘించే సంస్థలపై చర్యలు తీసుకోనుంది.

ఉద్యోగుల హక్కులకు రక్షణ

ఈ మార్గదర్శకాలు మొదటిగా సంస్థలకే అనుకూలంగా ఉన్నట్లుగా కనిపించినప్పటికీ, ప్రభుత్వం ఉద్యోగుల హక్కుల పరిరక్షణకు స్పష్టమైన ఆదేశాలను జారీ చేసింది. పని ఒత్తిడిని తగ్గించేందుకు, వారి శారీరక, మానసిక ఆరోగ్యాన్ని దృష్టిలో ఉంచుకుని విశ్రాంతికి ప్రాధాన్యత ఇవ్వడం గమనార్హం.

వ్యవసాయేతర రంగంలో ప్రాధాన్యత

తెలంగాణలో వస్తు, సేవల రంగం వేగంగా అభివృద్ధి చెందుతోంది. ముఖ్యంగా హైదరాబాద్‌ వంటి నగరాల్లో అనేక ఆఫీస్‌లు, మాల్‌లు, షాపింగ్ సెంటర్లు పనిచేస్తున్నాయి. ఈ నేపథ్యంలో, కార్మికుల పని గంటల నిబంధనల స్పష్టత అవసరమైంది. కొత్త మార్గదర్శకాలు వ్యాపారులకూ, ఉద్యోగులకూ ఒక నిబంధనాత్మక వాతావరణాన్ని కల్పించనున్నాయి. ఈ నిర్ణయం అమల్లోకి వస్తే, మల్టీనేషనల్ కంపెనీలు, ఐటీ రంగ సంస్థలు, పెద్ద రిటైల్ బ్రాండ్‌లకు తెలంగాణ మరింత ఆకర్షణీయంగా మారుతుంది. ఒకవైపు పెట్టుబడులకు స్థిరత కలుగుతూ, మరోవైపు ఉద్యోగుల హక్కులు, ఆరోగ్యం, పని నిబద్ధతలకు ప్రోత్సాహం లభిస్తాయి.

Read Also: Thammudu : తమ్ముడు ఫస్ట్ డే కలెక్షన్స్ ఇంత దారుణమా..?