ఎట్టకేలకు ఆసరా పింఛన్ల పెంపుపై తెలంగాణ ప్రభుత్వం కసరత్తు
తెలంగాణలో దాదాపు 44 లక్షల మందికి పైగా ఆసరా పింఛన్లను పొందుతున్నారు. ఇందులో వృద్ధులు, దివ్యాంగులు, ఒంటరి మహిళలు, చేనేత కార్మికులు, గీత కార్మికులు, బీడీ కార్మికులు, ఎయిడ్స్ బాధితులు, ఫైలేరియా బాధితులు ఉన్నారు
- Author : Sudheer
Date : 05-01-2026 - 11:12 IST
Published By : Hashtagu Telugu Desk
తెలంగాణ లో అధికారంలోకి రాగానే ఆసరా పింఛన్లను పెంచుతామని హామీ ఇచ్చిన కాంగ్రెస్ పార్టీ, అధికారంలోకి వచ్చి రెండేళ్లు గడుస్తున్నా ఇంకా ఆసరా పింఛన్లను పెంచలేదని అంత ఆగ్రహం వ్యక్తం చేస్తున్న వేళ, ఎట్టకేలకు ప్రభుత్వం పింఛన్ల పెంపుపై కసరత్తులు మొదలుపెట్టింది. తాజాగా హైదరాబాద్ మలక్పేటలో గల దివ్యాంగుల సంక్షేమశాఖ కార్యాలయంలో నిర్వహించిన లూయీస్ బ్రెయిలీ జయంతి వేడుకల్లో మంత్రి అడ్లూరి లక్ష్మణ్ కుమార్ పాల్గొని మాట్లాడారు.
దివ్యాంగులకు ఉచిత బస్సు ప్రయాణం కల్పిస్తామన్నారు. ఈ అంశాన్ని మంత్రి పొన్నం ప్రభాకర్తో ఫోన్లో మాట్లాడగా.. త్వరలోనే ముఖ్యమంత్రి దృష్టికి తీసుకెళ్లి సానుకూల నిర్ణయం తీసుకుంటామని ఆయన భరోసా ఇచ్చారు. వచ్చే విద్యా సంవత్సరం నుండి అంధ, బధిర విద్యార్థుల కోసం ప్రత్యేకంగా ప్రభుత్వ జూనియర్ మరియు డిగ్రీ కళాశాలలను ప్రారంభిస్తామన్నారు. అంతేకాకుండా.. దివ్యాంగ జంటలు వివాహం చేసుకుంటే కల్యాణలక్ష్మితో పాటు అదనంగా మరో లక్ష రూపాయల ప్రోత్సాహకం కూడా అందిస్తున్నారు. అంతే కాకుండా.. ఎన్నికల సమయంలో ఇచ్చిన హామీ ప్రకారం త్వరలోనే దివ్యాగులకు రూ.6000 పెన్షన్ అందజేస్తామని తెలిపారు.
తెలంగాణలో దాదాపు 44 లక్షల మందికి పైగా ఆసరా పింఛన్లను పొందుతున్నారు. ఇందులో వృద్ధులు, దివ్యాంగులు, ఒంటరి మహిళలు, చేనేత కార్మికులు, గీత కార్మికులు, బీడీ కార్మికులు, ఎయిడ్స్ బాధితులు, ఫైలేరియా బాధితులు ఉన్నారు. అయితే ప్రస్తుతం దివ్యాంగులకు నెలకు రూ. 4,016 అందుతుండగా.. వృద్ధులు, ఇతరులకు రూ. 2,016 పింఛనుగా ఇస్తున్నారు. అయితే ఎన్నికల సమయంలో కాంగ్రెస్ ఇచ్చిన హామీ ప్రకారం ఈ మొత్తాన్ని భారీగా పెంచాల్సి ఉంది. దీని ప్రకారం.. దివ్యాంగులకు ప్రస్తుతం ఉన్న రూ. 4,016 ను రూ. 6,000 కు పెంచే అవకాశం ఉంది. ముందుగా దివ్యాంగులకు అమలు చేసిన తర్వాత.. దశలవారీగా మిగిలిన వారికి పెంచిన పెన్షన్ అమలు చేసేందుకు ఆర్థిక శాఖ నివేదికలను సిద్ధం చేస్తున్నట్లు తెలుస్తోంది.
Aasara Pension Increase
దివ్యాంగుల కార్పొరేషన్ ద్వారా దాదాపు 8 వేల మందికి ఉచితంగా సహాయక పరికరాలు అందించాలని కూడా నిర్ణయించారు. పదో తరగతి వరకే ఉన్న బ్రెయిలీ లిపి పుస్తకాలను ఇంటర్మీడియట్, డిగ్రీ వరకు విస్తరించడం ద్వారా అంధ విద్యార్థుల చదువు మధ్యలో ఆగిపోకుండా చూడాలని ప్రభుత్వం భావిస్తోంది. పింఛన్ల పెంపుతో పాటు… అర్హులైన కొత్త లబ్ధిదారులను గుర్తించేందుకు గ్రామ సభల ద్వారా దరఖాస్తులను స్వీకరించనున్నారు. ఇది అమలైతే రాష్ట్రంలోని లక్షలాది కుటుంబాలకు ఆర్థికంగా పెద్ద ఊరట లభిస్తుంది.
Follow us
