నెలాఖరులోగా SLBC పనులు ప్రారంభించాలి – అధికారులను ఆదేశించిన మంత్రి ఉత్తమ్

Slbc Works

• SLBC వర్క్స్ పై మంత్రి సమీక్ష
• ఈ ప్రాజెక్టు పనులను ఈ నెలాఖరులోగా తిరిగి ప్రారంభించాలి
• మంత్రి ఉత్తమ్‌కుమార్ రెడ్డి అధికారులకు ఖచ్చితమైన ఆదేశాలు

తెలంగాణ రాష్ట్ర సాగునీటి రంగంలో అత్యంత కీలకమైన శ్రీశైలం లెఫ్ట్ బ్యాంక్ కెనాల్ (SLBC) సొరంగ పనులకు ఎట్టకేలకు మోక్షం లభించనుంది. ఈ ప్రాజెక్టు పనులను ఈ నెలాఖరులోగా తిరిగి ప్రారంభించాలని నీటి పారుదల శాఖ మంత్రి ఉత్తమ్‌కుమార్ రెడ్డి అధికారులను ఖచ్చితమైన ఆదేశాలు జారీ చేశారు. నల్గొండ జిల్లాలోని ఫ్లోరోసిస్ పీడిత ప్రాంతాలకు సాగు మరియు తాగునీటిని అందించే ఈ ప్రాజెక్టు ఏళ్ల తరబడి నిలిచిపోవడంపై ప్రభుత్వం తీవ్రంగా స్పందించింది. పనుల్లో జాప్యాన్ని నివారించేందుకు తక్షణమే క్షేత్రస్థాయిలో చర్యలు చేపట్టాలని మంత్రి స్పష్టం చేశారు.

Uttam Slbc

ఈ ప్రాజెక్టులో ప్రధాన అడ్డంకిగా మారిన టన్నెల్ బోరింగ్ మెషీన్ (TBM) సమస్యపై మంత్రి కీలక నిర్ణయం తీసుకున్నారు. ప్రస్తుతం ఉన్న మెషీన్‌ను తొలగించిన నేపథ్యంలో, మిగిలిన సొరంగం పనులను డ్రిల్లింగ్ అండ్ బ్లాస్టింగ్ విధానంలో (DBM – Drilling and Blasting Method) చేపట్టాలని అధికారులకు సూచించారు. అత్యాధునిక యంత్రాల కోసం ఎదురుచూడకుండా, అందుబాటులో ఉన్న సాంకేతికతతో పనులను వేగవంతం చేయడం ద్వారా ప్రాజెక్టును త్వరితగతిన పూర్తి చేయడమే లక్ష్యంగా పెట్టుకున్నారు. ఈ మార్పు వల్ల పనుల వేగం పెరగడంతో పాటు సాంకేతిక సమస్యలు తగ్గుతాయని ప్రభుత్వం భావిస్తోంది.

పనుల పునరుద్ధరణకు ప్రధాన అడ్డంకిగా ఉన్న నిధుల సమస్యను కూడా ప్రభుత్వం పరిష్కరించింది. నిర్మాణ సంస్థకు చెల్లించాల్సిన పెండింగ్ బిల్లుల్లో కొంత మొత్తాన్ని వారం రోజుల్లోగా విడుదల చేస్తామని మంత్రి ఉత్తమ్ కుమార్ రెడ్డి హామీ ఇచ్చారు. ఆర్థిక వెసులుబాటు కల్పించడం ద్వారా కాంట్రాక్ట్ సంస్థలు ఎటువంటి ఇబ్బందులు లేకుండా పనులను కొనసాగించేలా ప్రభుత్వం చర్యలు తీసుకుంటోంది. ఉమ్మడి నల్గొండ జిల్లా ప్రయోజనాల దృష్ట్యా, ఈ ప్రాజెక్టును అత్యంత ప్రాధాన్యత కలిగినదిగా గుర్తించి యుద్ధ ప్రాతిపదికన పూర్తి చేయాలని అధికారులను ఆయన ఆదేశించారు.

Follow us