కోడి పందేలకు ముస్తాబవుతున్న గోదావరి జిల్లాలు

Godavari Districts kodi pandalu

Godavari Districts సంక్రాంతి అంటే గొబ్బెమ్మలు, హరిదాసు కీర్తనలు, కోడి పందేలు. ముఖ్యంగా పండుగకు కోడి పందేలు ప్రత్యేక ఆకర్షణ. ఉమ్మడి తూర్పు, పశ్చిమ గోదావరి జిల్లాల్లో జరిగే ఈ పందేల్లో కోడి కత్తుల తయారీ, వాటిని కట్టే విధానం ఎంతో కీలకం. వాహనాల బేరింగులకు వాడే స్టీల్‌తో తయారుచేసే ఈ కత్తులకు అధిక గట్టిదనం కోసం కొలిమిలో కాల్చి సానబెడతారు. పందేల్లో గెలుపోటములను నిర్ణయించే ఈ కత్తుల వ్యాపారం ఏటా రూ.5 కోట్లకు చేరుకుంటుంది.

• కోడి పందేలకు ముస్తాబవుతోన్న గోదావరి జిల్లాలు
• కత్తులను కట్టేవాళ్లకు నాలుగు రోజులు డిమాండ్
• ఒక్కసారి కడితే రూ.25 నుంచి రూ.35 వేలు వసూలు

Godavari Districts Kodi Pandalu సంక్రాంతి అంటేనే కోడి పందేలు .. ఇవి లేకుంటే అసలు పండుగ సందడే ఉండదు. భోగీ, సంక్రాంతి, కనుమ ఈ మూడు రోజులు గోదావరి జిల్లాల్లో జరిగే కోడి పందేలను చూసేందుకు ఇతర రాష్ట్రాల నుంచి జనం భారీగా వస్తారు. అయితే, సరదా కోసం ఆడే ఈ పందేల్లో కోడికి కట్టే కత్తే కీలకం. ఇది తగిలితే రక్తం ధారలై పారి, దెబ్బ తగిలిన క్షణాల్లో కోడి నేలకొరుగుతుంది. బరుల్లో వీటి పాత్ర ఎంతో ముఖ్యం. సంక్రాంతి వేళ ప్రతి గ్రామంలోనూ వీటిపైనే చర్చ జరుగుతోంది. ఆరు అంచెల్లో కోడి కత్తులను సానబెడతారు. మొన వంగిపోవడం లేదా విరిగిపోకుండా ఉండాలంటే చాలా గట్టిదనం ఉండాలి. అందుకే వాహనాల చక్రాల బేరింగుల్లో వినియోగించే స్టీల్‌తో ఈ కత్తులను వీటిని తయారు చేస్తారు. వాటికి అత్యంత గట్టిదనం వచ్చేలా కొలిమిలో ఆరుసార్లు కాల్చుతారు.

ఇక, పందేల బరుల్లో కోడి పుంజు కాళ్లకు కత్తులు కట్టడం కూడా ఓ ఆర్ట్. వీటి కట్టడం అందరి వల్ల కాదు. అందుకే పండగ సమయంలో కోడి కత్తులు కట్టే వారికి ఫుల్ డిమాండ్‌ ఉంటుంది. కోడికి ఈ కత్తి కట్టడంలోనే పందెం ఆధారపడి ఉంటుందని అంటారు. బరిలో దిగే పుంజు కుడికాలి పిల్లవేలికి ఈ కత్తిని కడతారు. పందెం జరుగుతున్నంత సేపూ కత్తికట్టే వ్యక్తి దానిని గమనిస్తూనే ఉంటాడు. కత్తి విరిగినా, దిశ మారినా మధ్యో ఆపేసిన సరిచేసి మళ్లీ మొదలుపెడతారు. పందెం గెలిస్తే రూ.లక్షల్లో వస్తాయి. అందుకే రోజుకు కత్తి కట్టేవాళ్లకు రూ.25- రూ.35 వేల వరకు ముట్టజెబుతారు.

కాగా, కోడి కత్తులు తయారు చేసే ఖర్ఖానాలు పశ్చిమ గోదావరి జిల్లా గణపవరం, నూజివీడు, గురవాయి పాలెం, ముప్పర్తిపాడు, తూర్పుగోదావరి జిల్లాలో ముమ్మిడివరం, కాట్రేనికోన, ఎదుర్లంక, కాకినాడ జిల్లాలో సామర్లకోట, అనపర్తి తదితర ప్రాంతాల్లో ఎక్కువగా ఉన్నట్టు సమాచారం. ఉమ్మడి గోదావరి జిల్లాల నుంచి ఏపీ, తెలంగాణతో పాటు కర్ణాటక రాష్ట్రాలకు సైతం కత్తులను తరలిస్తున్నారు. సంక్రాతి సీజన్‌లో వీటి వ్యాపారం దాదాపు రూ.5 కోట్ల వరకు ఉంటుందని అంచనా.

అయితే, ఒకరు రోజుకు 5 నుంచి 6 కత్తుల వరకు మాత్రమే తయారు చేయగలరు. అందుకే ఏడాది పొడవునా వీటిని తయారు చేస్తారు. గతంలో వీటి ధర రూ.200- రూ.300 వరకు ఉండేది. ప్రస్తుతం రూ.1000 వరకు పలుకుతోంది. వీటి తయారికి వాడే ఇనుమును చెన్నై, విజయవాడ, తిరువూరు తదితర ప్రాంతాల నుంచి తీసుకొస్తారు. ఒక కత్తి ఒక పందేనికి మాత్రమే వినియోగిస్తారు.

Follow us