Jana Reddy Vs Rajagopal Reddy: జానాపై రాజగోపాల్‌ ఫైర్.. ఇద్దరి మధ్య ఏం జరుగుతోంది ?

Also Read :AB Venkateswara Rao: రాజకీయాల్లోకి ఏబీ వెంకటేశ్వర రావు.. ఆ పార్టీలోకి ఎంట్రీ ?

చతురతతో ఇద్దరు కుమారులు సెటిల్

కుందూరు జానారెడ్డి.. కాంగ్రెస్‌లో సీనియర్ నేత. టీడీపీతో రాజకీయాల్లోకి ప్రవేశించిన జానారెడ్డి(Jana Reddy Vs Rajagopal Reddy).. 1988లో నేరుగా ఎన్‌టీ రామారావుతో విభేదించారు. 30 మంది రాష్ట్ర క్యాబినెట్ మంత్రులను ఒకేసారి ఎన్‌టీఆర్ మార్చడం జానారెడ్డికి నచ్చలేదు. దీంతో ఆయన టీడీపీని వదిలేసి కాంగ్రెస్‌లో చేరిపోయారు. నాటి నుంచి నేటి వరకు జానారెడ్డి కాంగ్రెస్‌లోనే ఉన్నారు. తెలుగురాష్ట్రాల్లో అత్యధిక కాలం మంత్రిగా పనిచేసిన నేత కూడా జానారెడ్డే.  ప్రస్తుతం సీఎం రేవంత్ రెడ్డి రాజకీయ సలహా దారుడిగా తెలంగాణ ప్రభుత్వంలో కీలక పాత్రను ఆయన పోషిస్తున్నారు. జానారెడ్డి కుమారుల్లో ఒకరైన కుందూరు రఘువీరారెడ్డి ప్రస్తుతం నల్గొండ ఎంపీగా ఉన్నారు. మరో కొడుకు జయవీర్‌రెడ్డి నాగార్జునసాగర్‌ ఎమ్మెల్యేగా ఉన్నారు. తన ఇద్దరు కుమారుల్ని రాజకీయాల్లో సెటిల్ చేయడాన్ని బట్టి జానారెడ్డి రాజకీయ చతురతను మనం అర్థం చేసుకోవచ్చు. ఇటీవలే తన శిష్యుడు శంకర్ నాయక్‌ను అనూహ్యంగా తెరపైకి తెచ్చి ఎమ్మెల్సీగా చేశారు జానారెడ్డి.

హైకమాండ్‌కు జానా లేఖ.. రాజగోపాల్ రెడ్డి ఫైర్ 

కాంగ్రెస్ హైకమాండ్ దగ్గర జానారెడ్డికి మంచి పలుకుబడి ఉంది. ఆయన ఇటీవలే హైకమాండ్‌కు ఒక లేఖ రాశారు. హైదరాబాద్‌, రంగారెడ్డి జిల్లాలకు మంత్రివర్గంలో ప్రాతినిధ్యం కల్పించాలని కోరుతూ కేసీ వేణుగోపాల్, ఏఐసీసీ ప్రెసిడెంట్ ఖర్గేలకు లెటర్లు పంపారు.  ఉమ్మడి నల్గొండ జిల్లాకు చెందిన జానారెడ్డి.. హైదరాబాద్‌, రంగారెడ్డి జిల్లాలకు మంత్రి పదవి కోసం గళం వినిపించడం అందరినీ ఆశ్చర్యపర్చింది.  ఆలోచింపజేసింది.  ఈ లేఖ వల్ల  ఉమ్మడి నల్గొండ జిల్లా నుంచి మంత్రి పదవిని ఆశిస్తున్న కోమటిరెడ్డి రాజగోపాల్ రెడ్డికి నష్టం జరుగుతుందని రాజకీయ పరిశీలకులు అంటున్నారు.  అందుకే ఇవాళ జానారెడ్డి లక్ష్యంగా రాజగోపాల్ రెడ్డి విమర్శలు చేశారు. నల్గొండ జిల్లా నుంచి ఇప్పటికే ఇద్దరు మంత్రులు ఉన్నారు. మూడో బెర్త్ కోమటిరెడ్డి రాజగోపాల్ రెడ్డికి దక్కుతుందని భావిస్తున్న తరుణంలో.. జానారెడ్డి లేఖతో లెక్కలు మారిపోయాయి.