Rajgopal Reddy: ఆ డబ్బుతో నాకు ఎలాంటి సంబంధం లేదు: రాజగోపాల్ రెడ్డి
వివిధ వ్యక్తులకు నగదు బదిలీ చేసిన కంపెనీతో తనకు ఎలాంటి సంబంధం లేదని..
- By Gopichand Published Date - 12:27 PM, Tue - 1 November 22
వివిధ వ్యక్తులకు నగదు బదిలీ చేసిన కంపెనీతో తనకు ఎలాంటి సంబంధం లేదని కోమటిరెడ్డి రాజగోపాల్ రెడ్డి సోమవారం తెలిపారు. అలాంటి బదిలీలకు తానుగానీ, తన ఎలక్షన్ ఏజెంట్ గానీ అధికారం ఇవ్వలేదని బీజేపీ మునుగోడు అభ్యర్థి రాజగోపాల్ రెడ్డి తెలిపారు. ప్రజా జీవితంలో నా పరువు తీయడానికి, ప్రస్తుతం జరుగుతున్న ఎన్నికల ప్రక్రియకు భంగం కలిగించడానికి ఉద్దేశించిన ఫిర్యాదుదారుపై కఠినమైన, అత్యవసర చర్యలు తీసుకోవాలని ఆయన ECI (ఎలక్షన్ కమిషన్ ఆఫ్ ఇండియా)ని కోరారు.
ఓటర్లకు పంచాలనే ఉద్దేశంతో మునుగోడులోని వివిధ వ్యక్తులకు రూ.5.22 కోట్లు బదిలీ చేశారంటూ టీఆర్ఎస్ నుంచి ఆదివారం ఫిర్యాదు రావడంతో ఈసీ నోటీసుపై స్పందించింది. మోడల్‌ కోడ్‌ ఉల్లంఘన పేరుతో నాపై ఆరోపణలు చేశారన్నారు. టీఆర్ఎస్ ఫిర్యాదులో పేర్కొన్న సుషీ ఇన్‌ఫ్రా అండ్ మైనింగ్ లిమిటెడ్ కంపెనీలో తాను భాగస్వామిని కానని, డైరెక్టర్‌గా లేనని, దానిని తన కుమారుడు కోమటిరెడ్డి సంకీర్త్‌రెడ్డి, అతని సహచరులు నిర్వహిస్తున్నారని చెప్పారు. కంపెనీ నుంచి వ్యక్తిగత కంపెనీలకు లేదా ఇతరులకు నిధుల బదిలీ వివరాలు తప్పుడువని ఆయన తెలిపారు. టీఆర్ఎస్ ఆరోపిస్తున్న బ్యాంకు లావాదేవీల వివరాలను తిరస్కరిస్తూ ఆయన ఈసీకి వివరణాత్మక స్టేట్‌మెంట్ కూడా అందించారు.
2021లో గ్లోబల్ టెండర్‌లో పాల్గొని పలు బహుళజాతి కంపెనీలతో పోటీ పడిన సుషీ ఇన్‌ఫ్రా అత్యల్ప బిడ్డర్‌గా అవతరించినందున బొగ్గు గనుల కాంట్రాక్టును పొందినట్లు ఆయన తెలిపారు. మరోవైపు రాజ్‌గోపాల్‌రెడ్డిపై తప్పుడు ఫిర్యాదు చేసిన టీఆర్‌ఎస్‌పై తక్షణమే చర్యలు తీసుకోవాలని బీజేపీ ఈసీకి ఫిర్యాదు చేసింది. సెన్సిటివ్ బ్యాంక్ ఖాతాల సమాచారాన్ని పార్టీ ఎలా భద్రపరిచిందనే విషయంపై ECI తప్పనిసరిగా దర్యాప్తు చేయాలని పేర్కొంది. ఇదిలా ఉండగా.. మునుగోడు ఉప ఎన్నిక ప్రచారానికి నేటితో తెర పడనుంది. నవంబరు 3న పోలింగ్, నవంబర్ 6న ఓట్ల కౌంటింగ్ జరగనుంది.
