Pakistan: ఆర్సీబీ మాజీ డైరెక్ట‌ర్‌ని పాకిస్తాన్ హెడ్ కోచ్‌గా నియ‌మించిన పీసీబీ!

Pakistan: పాకిస్థాన్ క్రికెట్ (Pakistan) జట్టు తదుపరి అంతర్జాతీయ సిరీస్ బంగ్లాదేశ్‌తో జరగనుంది. ఇది తమ సొంత గడ్డపై బంగ్లాదేశ్‌తో ఐదు మ్యాచ్‌ల టీ20 సిరీస్ ఆడనుంది. ఈ సిరీస్ మే 25 నుంచి ప్రారంభం కానుంది. దీనికి ముందు పీసీబీ (పాకిస్థాన్ క్రికెట్ బోర్డు) కొత్త హెడ్ కోచ్‌ను ప్రకటించింది.

పీసీబీ కొత్త హెడ్ కోచ్‌గా ఒక అనుభవజ్ఞుడిని ఎంపిక చేసింది. ఈ వ్యక్తి ఐపీఎల్‌లోని ఆర్‌సీబీ జట్టులో విరాట్ కోహ్లీతో కలిసి పనిచేశాడు. అతను రాయల్ ఛాలెంజర్స్ బెంగళూరు జట్టులో హెడ్ కోచ్‌గా, మాజీ డైరెక్టర్ గా పని చేశాడు. అతను పాకిస్థాన్ సూపర్ లీగ్ ముగిసిన తర్వాత పాకిస్థాన్ జట్టుతో చేరనున్నాడు. అతను మే 26 నుంచి జట్టుకు హెడ్ కోచ్ గా బాధ్యతలు స్వీకరించనున్నాడు. అయితే అతను ప్రస్తుతం పాకిస్థాన్‌లోనే ఉన్నాడు.

మైక్ హెస్సన్ పాకిస్థాన్ కొత్త హెడ్ కోచ్‌

మైక్ హెస్సన్‌ను పాకిస్థాన్ క్రికెట్ వైట్-బాల్ జట్టు కొత్త హెడ్ కోచ్‌గా నియమించారు. అతను ప్రస్తుతం పాకిస్థాన్‌లో ఉన్నాడు. అక్కడ అతను పీఎస్‌ఎల్ జట్టు ఇస్లామాబాద్ యునైటెడ్‌తో ఉన్నాడు. హెస్సన్‌కు ముందు ఆకిబ్ జావేద్ ఐదు నెలల పాటు తాత్కాలిక కోచ్‌గా వ్యవహరించాడు. గ్యారీ కిర్స్టన్ హఠాత్తుగా రాజీనామా చేసిన తర్వాత ఆకిబ్ కోచ్ పదవిని చేపట్టాడు.

50 ఏళ్ల మైక్ హెస్సన్‌కు కోచింగ్‌లో గణనీయమైన అనుభవం ఉంది. అతను సుమారు 6 సంవత్సరాల పాటు (2012 నుంచి 2018 వరకు) న్యూజీలాండ్ హెడ్ కోచ్‌గా పనిచేశాడు. ఆ తర్వాత అతను ఐపీఎల్‌లో కూడా పనిచేశాడు. మైక్ హెస్సన్ 2019లో ఆర్‌సీబీ జట్టుతో చేరాడు. అతను 2023 వరకు జట్టుతో ఉన్నాడు. అయినప్పటికీ ఈ సంవత్సరాల్లో రాయల్ ఛాలెంజర్స్ బెంగళూరు టైటిల్ గెలవలేకపోయింది. పీసీబీ అధికారికంగా మైక్ హెస్సన్ నియామకాన్ని ప్రకటించింది. కానీ అతను ఎంతకాలం ఉంటాడు.. ఇది ఎంత కాలం ఒప్పందం? అనే విషయాన్ని వెల్లడించలేదు. హెస్సన్ ఒప్పందం 2 సంవత్సరాలదని భావిస్తున్నారు.

Also Read: Foreign Players: ఐపీఎల్ రీషెడ్యూల్‌.. ఐపీఎల్‌కు దూరం అవుతున్న విదేశీ ఆట‌గాళ్లు వీరే!

పాకిస్థాన్ క్రికెట్ జట్టు తదుపరి సిరీస్

పాకిస్థాన్ హెడ్ కోచ్‌గా మైక్ హెస్సన్ మొదటి సిరీస్ బంగ్లాదేశ్‌తో జరగనుంది. మే 25 నుంచి ప్రారంభమయ్యే ఈ సిరీస్‌లో 5 టీ20 మ్యాచ్‌లు ఆడతారు. ఆ తర్వాత జట్టు వెస్టిండీస్ పర్యటనకు వెళ్లనుంది. పీసీబీ చైర్మన్ మొహ్సిన్ నక్వీ హెడ్ కోచ్ నియామకంపై మాట్లాడుతూ.. “న్యూజీలాండ్ మాజీ క్రికెటర్ మరియు ప్రఖ్యాత కోచ్ మైక్ హెస్సన్‌ను పాకిస్థాన్ పురుషుల జట్టు యొక్క వైట్-బాల్ ప్రధాన కోచ్‌గా నియమించడం పట్ల నాకు సంతోషంగా ఉంది” అన్నారు.

• పాకిస్థాన్ vs బంగ్లాదేశ్ టీ20 సిరీస్ షెడ్యూల్
• మొదటి మ్యాచ్: మే 25 (ఇక్బాల్ స్టేడియం)
• రెండవ మ్యాచ్: మే 27 (ఇక్బాల్ స్టేడియం)
• మూడవ మ్యాచ్: మే 30 (గద్దాఫీ స్టేడియం)
• నాల్గవ మ్యాచ్: జూన్ 01 (గద్దాఫీ స్టేడియం)
• ఐదవ మ్యాచ్: జూన్ 03 (గద్దాఫీ స్టేడియం)