RR vs CSK: సెకండ్ ప్లేస్ టార్గెట్ గా రాజస్థాన్ రాయల్స్

ఐపీఎల్ 2022 సీజన్ లో ఇవాళ రాజస్థాన్ రాయల్స్, చెన్నై సూపర్ కింగ్స్ తలపడనున్నాయి.
ముంబై బ్రబౌర్న్ స్టేడియం వేదికగా జరిగే ఈ మ్యాచ్ ఫలితం నామమాత్రం కానుంది. ఇప్పటివరకు 13 మ్యాచ్‌లు ఆడిన ఆర్ఆర్.. 8 విజయాలతో 16 పాయింట్లు సాధించి దాదాపు ప్లే ఆఫ్ బెర్త్ ఖరారు చేసుకుంది. ఈ మ్యాచ్‌లో గెలిస్తే.. మెరుగైన నెట్‌రన్ రేట్‌తో రెండోస్థానానికి చేరుకునే ఛాన్స్ ఉంటుంది. మరోవైపు చెన్నై ఆడిన 13 మ్యాచ్‌ల్లో కేవలం నాలుగు మ్యాచ్‌ల్లో విజయం సాధించి.. పాయింట్ల పట్టికలో చివరి నుంచి రెండోస్థానంలో ఉంది. ఈ గేమ్‌లో విజయం సాధించి.. గౌరవప్రదంగా ఈ సీజన్‌ను ముగించాలని చూస్తోంది. గత రెండు మ్యాచ్‌ల్లోనూ ఓటమి పాలైన చెన్నై.. ఈ మ్యాచ్‌లోనూ ప్రయోగాలు చేసే అవకాశం ఉంది.
రాజస్థాన్ విషయానికి వస్తే.. స్టార్ బ్యాట్స్‌మెన్ జోస్ బట్లర్ ఈ సీజన్‌లో దుమ్ములేపుతున్నాడు. 627 రన్స్‌తో ఆరెంజ్ క్యాప్‌ రేస్‌లో ఫస్ట్ ప్లేస్‌లో ఉన్నాడు. అతనికి తోడు యశస్వి జైస్వాల్, దేవ్‌దూత్ పడిక్కల్ కూడా అద్భుత ఫామ్‌లో ఉండడం రాజస్థాన్‌కు కలిసి వస్తోంది. హిట్‌మేయర్ స్వదేశానికి వెళ్లిపోవడంతో.. మిడిల్ ఆర్డర్‌కు మారిపోయిన కెప్టెన్ సంజూ శాంసన్ భారీ ఇన్నింగ్స్ ఆడాల్సి ఉంది. ఆల్‌రౌండర్ జేమ్మీ నీషమ్ కూడా గత మ్యాచ్‌లో వచ్చిన అవకాశాన్ని సద్వినియోగం చేసుకోలేదు. రియన్ పరాగ్ కూడా తన సత్తా ఏంటో చూపించాల్సిన సమయం ఆసన్నమైంది.

గత మ్యాచ్‌లో కొత్త కుర్రాళ్లకు ఛాన్స్ ఇచ్చిన చెన్నై.. చివరి మ్యాచ్‌లో కూడా రిజర్వ్ బెంచ్‌ను పరీక్షించుకునే అవకాశం ఉంది. బ్యాటింగ్ విభాగంలో చాలా స్ట్రాంగ్‌గా కనిపిస్తోంది. ముఖ్యంగా ఓపెనర్లు కాన్వే, రుతురాజ్ గైక్వాడ్ ఓపెనింగ్‌ విభాగంలో దుమ్ములేపుతున్నారు. మొయిన్ అలీ అటు బ్యాటింగ్‌లో.. ఇటు బౌలింగ్‌లో టీమ్‌కు మంచి సపోర్ట్ ఇస్తున్నాడు. గత మ్యాచ్‌లో అంబటి రాయుడ ప్లేస్‌లో టీమ్‌లోకి వచ్చిన నారాయణ్ జగదీశన్ 39 పరుగులతో నాటౌట్‌గా నిలిచాడు. మరోసారి అతనికి టీమ్‌లో ప్లేస్ దక్కే ఛాన్స్ ఉంది. ఒకటి రెండు మ్యాచ్‌లో మెరిసిన శివమ్ ధూబే మళ్లీ ఫామ్ కోల్పోయాడు. ధోనికి ఇదే చివరి సీజన్‌ అని వార్తలు వస్తున్న నేపథ్యంలో.. ఐపీఎల్‌లో అతనికి ఇదే చివరి మ్యాచ్‌ అవుతుంది. ఒకవేళ అదే నిజమైతే.. ధోని తన చివరి మ్యాచ్‌ను ఘనంగా ముగించాలని ఫ్యాన్స్ కోరుకుంటున్నారు.