RR vs KKR: డికాక్ వ‌న్ మ్యాన్ షో.. ఐపీఎల్ 18వ సీజన్లో బోణీ కొట్టిన కోల్కతా నైట్ రైడర్స్!
IPL 2025లో ఆరవ మ్యాచ్ రాజస్థాన్ రాయల్స్, కోల్కతా నైట్ రైడర్స్ (RR vs KKR) మధ్య జరిగింది. ఈ మ్యాచ్‌లో KKR 8 వికెట్ల తేడాతో గెలిచింది.
- By Gopichand Published Date - 11:55 PM, Wed - 26 March 25
RR vs KKR: IPL 2025లో ఆరవ మ్యాచ్ రాజస్థాన్ రాయల్స్, కోల్కతా నైట్ రైడర్స్ (RR vs KKR) మధ్య జరిగింది. ఈ మ్యాచ్‌లో KKR 8 వికెట్ల తేడాతో గెలిచింది. 152 పరుగుల లక్ష్యాన్ని కేకేఆర్ కేవలం 17.3 ఓవర్లలోనే ఛేదించింది. దీనితో KKR జట్టు IPL 2025లో తన మొదటి మ్యాచ్‌ను గెలుచుకుంది. కానీ రాజస్థాన్ వరుసగా రెండో ఓటమిని ఎదుర్కోవలసి వచ్చింది. ఈ మ్యాచ్‌లో KKR ఓపెనర్ క్వింటన్ డి కాక్ 97 పరుగులతో అజేయంగా బలమైన ఇన్నింగ్స్ ఆడి జట్టుకు ఏకపక్ష విజయాన్ని అందించాడు. కోల్కతా మొదట బౌలింగ్‌లో. తరువాత బ్యాటింగ్‌లో తన బలాన్ని చూపించింది.
క్వింటన్ డి కాక్ ఏకపక్ష ఇన్నింగ్స్
రాజస్థాన్‌పై 152 పరుగుల లక్ష్యాన్ని ఛేదించే క్రమంలో క్వింటన్ డి కాక్ 61 బంతుల్లో 8 ఫోర్లు, 6 సిక్సర్లతో 97 పరుగులు చేసి అజేయంగా నిలిచాడు. అయితే, అతను తన సెంచరీని మిస్ చేసుకున్నాడు. కానీ తన శక్తివంతమైన ఇన్నింగ్స్ కారణంగా జట్టుకు ఏకపక్ష విజయాన్ని అందించాడు. ఈ సీజన్లో KKR కూడా విజయ ఖాతాను తెరిచింది. RCBతో జరిగిన తొలి మ్యాచ్‌లో డి కాక్ త‌క్కువ ప‌రుగుల‌కే ఔటయ్యాడు. కానీ ఈసారి అతను తన అనుభవాన్ని పూర్తిగా చూపించాడు.
RR.. KKRకి 152 పరుగుల లక్ష్యాన్ని నిర్దేశించింది. కోల్కతా కేవలం 17.3 ఓవర్లలోనే ఛేదించి 8 వికెట్ల తేడాతో మ్యాచ్‌ను గెలుచుకుంది. ఆ జట్టు తరఫున మొయిన్ అలీ 5 పరుగులు, అజింక్య రహానె 18 పరుగులు చేశారు. కాగా, అంగ్‌క్రిష్ రఘువంశీ 17 బంతుల్లో 22 పరుగులు చేసి అజేయంగా నిలిచాడు. క్రీజులో క్వింటన్ డి కాక్‌కు మద్దతు ఇచ్చాడు.
Also Read: Lulu Group : లూలూ గ్రూప్‌కు భూమి కేటాయించిన చంద్రబాబు ప్రభుత్వం
ఈ బౌలర్లు అత్యధిక వికెట్లు తీశారు
రాజస్థాన్‌పై కోల్‌కతాకు చెందిన వరుణ్ చక్రవర్తి, మోయిన్ అలీ, హర్షిత్ రాణా, వైభవ్ అరోరా త‌లో రెండు వికెట్లు పడగొట్టారు. స్పెన్సర్ జాన్సన్ 1 వికెట్ పడగొట్టాడు. అదే సమయంలో రాజస్థాన్ రాయల్స్ తరపున వనిందు హసరంగా 1 వికెట్ తీసుకున్నాడు.
ముందుగా బ్యాటింగ్ చేసిన రాజస్థాన్ రాయల్స్ 20 ఓవర్లలో 9 వికెట్ల నష్టానికి 151 పరుగులు చేసింది. ఆ జట్టు తరఫున ధ్రువ్ జురెల్ 33 పరుగులతో అతిపెద్ద ఇన్నింగ్స్ ఆడాడు. యశస్వి జైస్వాల్ 29, రియాన్ పరాగ్ 25, జోఫ్రా ఆర్చర్ 16, సంజు శాంస‌న్ 13, నితీష్ రాణా 8, వనిందు హసరంగా 4, శుభం దుబే 9, షిమ్రాన్ హెట్మెయర్ 7, మహిష్ తీక్షణ నాటౌట్ 1, తుషార్ దేశ్‌పాండే నాటౌట్ 2 పరుగులు చేశారు.
