Nikhat Zareen : నిఖత్ మెడల్ పంచ్‌
కామన్‌వెల్త్‌ గేమ్స్‌లో వెయిట్ లిఫ్టర్లు ఇచ్చిన మెడల్ జోష్‌తో మిగిలిన క్రీడాకారులూ సత్తా చాటుతున్నారు.
- By Naresh Kumar Published Date - 07:42 PM, Thu - 4 August 22
కామన్‌వెల్త్‌ గేమ్స్‌లో వెయిట్ లిఫ్టర్లు ఇచ్చిన మెడల్ జోష్‌తో మిగిలిన క్రీడాకారులూ సత్తా చాటుతున్నారు. మహిళల బాక్సింగ్‌లో వరల్డ్ ఛాంపియన్, తెలంగాణ బాక్సర్ నిఖత్ జరీన్ మెడల్ ఖాయం చేసుకుంది. లైట్ ఫ్లై వెయిట్ విభాగంలో నిఖత్ సెమీఫైనల్‌కు చేరుకుంది.
క్వార్టర్ ఫైనల్లో నిఖత్ జరీన్.. వేల్స్‌కు చెందిన హెలెన్ జోన్స్‌పై విజయం సాధించింది. ఏ దశలోనూ ప్రత్యర్థికి అవకాశం ఇవ్వకుండా పంచ్‌ల వర్షం కురిపించింది. మహిళల బాక్సింగ్‌లో వరల్డ్ ఛాంపియన్‌గా నిలిచిన నిఖత్ అంచనాలకు తగ్గట్టే రాణిస్తోంది. సెమీస్‌కు చేరడంతో కనీసం కాంస్యం సాధించనుంది నిఖత్. ఇదిలా ఉంటే మ్యాచ్ తర్వాత నిఖత్ జరీన్ చేసిన అభివాదం సోషల్ మీడియాలో వైరల్‌గా మారింది.
తన తల్లి పర్వీన్‌ సుల్తానా పుట్టినరోజు నాడే క్వార్టర్స్‌ మ్యాచ్ గెలిచి పతకం ఖాయం చేసుకతోవడంతో నిఖత్ మొహం సంతోషంతో వెలిగిపోయింది. రింగ్‌ నుంచి కిందకు దిగగానే హ్యాపీ బర్త్‌డే అమ్మీ.. ఐ లవ్‌ యూ.. అల్లా నిన్ను సంతోషంగా ఉంచాలి అంటూ గట్టిగా అరిచింది. ఈ విజయాన్ని పర్వీనా సుల్తానాకు అంకితం చేసిన నిఖత్ జరీన్ తన తల్లిపై ఉన్న ప్రేమను ఈ విధంగా చూపించింది. ప్రస్తుతం నిఖత్ వీడియో వైరల్‌గా మారగా.. వేలాదిగా లైక్‌లు వస్తున్నాయి. ఇక నిఖత్ జరీన్‌తో పాటు మరో తెలంగాణ బాక్సర్ హుసాముద్దీన్‌ కూడా సెమీస్‌కు చేరాడు. వీరితో పాటు హరియాణా అమ్మాయి నీతూ క్వార్టర్ ఫైనల్స్‌లో నికోల్‌ క్లయిడ్‌ను ఓడించింది. దీంతో మూడు పతకాలు ఖాయమయ్యాయి.
