Gavaskar: ఐపీఎలే ప్రామాణికం అయితే రంజీ ఎందుకు..? గవాస్కర్ ఫైర్..!

Gavaskar: వెస్టిండీస్ పర్యటన కోసం భారత క్రికెట్ జట్టు సెలక్టర్లు శుక్రవారం టెస్ట్, వన్డే సిరీస్‌ల కోసం జట్టును ప్రకటించారు. వెస్టిండీస్‌తో 2 మ్యాచ్‌ల టెస్టు సిరీస్‌లో భాగంగా టీమిండియా జూలై 12 నుంచి తొలి మ్యాచ్ ఆడాల్సి ఉంది. ప్రపంచ టెస్టు ఛాంపియన్‌షిప్‌లో ఆఖరి మ్యాచ్‌లో ఓటమి తర్వాత టీమిండియాలో పెను మార్పులు చోటుచేసుకుంటాయని అందరూ ఊహించారు. కొంతమంది కొత్త ఆటగాళ్లను కూడా జట్టులోకి తీసుకున్నారు. అయితే సర్ఫరాజ్ ఖాన్‌కు చోటు దక్కకపోవడంతో భారత మాజీ ఆటగాడు సునీల్ గవాస్కర్ (Gavaskar) మండిపడ్డారు.

సర్ఫరాజ్ ఖాన్ గత కొన్ని రంజీ సీజన్‌ల నుండి అద్భుతమైన ప్రదర్శన చేస్తున్నాడు. కానీ ఐపీఎల్ 16వ సీజన్‌లో ప్రత్యేకంగా ఏమీ చేయలేకపోయాడు. అదే సమయంలో సర్ఫరాజ్‌ను ఎంపిక చేయకపోవడంపై సునీల్ గవాస్కర్ మాట్లాడుతూ.. ఇప్పుడు ఆటగాళ్లు రంజీ ట్రోఫీ ఆడటం మానేయాలని అన్నారు. గత 3 రంజీ సీజన్లలో సర్ఫరాజ్ ఖాన్ దాదాపు 100 సగటుతో పరుగులు చేస్తున్నాడని సునీల్ గవాస్కర్ స్పోర్ట్స్ వెబ్‌సైట్‌కు చేసిన ప్రకటనలో తెలిపారు. ఇప్పుడు అతను జట్టులో చేరడానికి ఇంకా ఏమి చేయాలి? అతను ప్లేయింగ్ 11లో భాగం కాలేకపోయినా అతనిని జట్టులో చేర్చుకోవాలి. అతని ప్రదర్శనకు క్రెడిట్ ఇవ్వాల్సిన అవసరం ఉందని గవాస్కర్ అన్నారు. ఐపీఎల్ ఆధారంగానే ఆటగాళ్లను ఎంపిక చేస్తే ఇక రంజీ ట్రోఫీ ఎందుకు..?దాన్ని రద్దు చేయండి అంటూ ఫైర్ అయ్యారు.

Also Read: Asian Games: ఆసియా క్రీడలకు భారత క్రికెట్ జట్లు.. చైనాలో ఆసియా క్రీడలు

గత సీజన్‌లో సర్ఫరాజ్ 92 సగటుతో స్కోర్ చేశాడు

రంజీ ట్రోఫీ చివరి సీజన్‌లో సర్ఫరాజ్ ఖాన్ 6 మ్యాచ్‌ల్లో 92.66 సగటుతో మొత్తం 556 పరుగులు చేశాడు. ఇందులో 3 సెంచరీ ఇన్నింగ్స్‌లు కూడా ఉన్నాయి. అదే సమయంలో 2021-22 రంజీ సీజన్‌లో సర్ఫరాజ్ ఖాన్ 122.75 సగటుతో 982 పరుగులు చేశాడు. ఇందులో 4 సెంచరీలు కూడా ఉన్నాయి. ఇప్పటివరకు సర్ఫరాజ్ 37 ఫస్ట్ క్లాస్ మ్యాచ్ ల్లో 79.65 సగటుతో 3505 పరుగులు చేశాడు.