ఫార్ములా 1 రేసులపైనా సందేహాలు..

Formula 1  మధ్యప్రాచ్యంలో పెరుగుతున్న యుద్ధ మేఘాలు ప్రపంచ క్రీడారంగంపై పెను ప్రభావం చూపుతున్నాయి. ఇరాన్‌పై అమెరికా, ఇజ్రాయెల్ దాడుల నేపథ్యంలో నెలకొన్న ఉద్రిక్తతల కారణంగా పలు అంతర్జాతీయ టోర్నీలు, ఈవెంట్ల నిర్వహణపై నీలినీడలు కమ్ముకున్నాయి. దీంతో లియోనెల్ మెస్సీ, క్రిస్టియానో రొనాల్డో, లూయిస్ హామిల్టన్ వంటి దిగ్గజ క్రీడాకారుల షెడ్యూల్స్ గందరగోళంలో పడ్డాయి. ప్రయాణ ఆంక్షలు, మ్యాచ్‌ల రద్దుతో గ్లోబల్ స్పోర్ట్స్ క్యాలెండర్ తీవ్ర అనిశ్చితిని ఎదుర్కొంటోంది.

ప్రధానంగా ఫుట్‌బాల్ ప్రపంచంపై ఈ ప్రభావం స్పష్టంగా కనిపిస్తోంది. ఖతార్ వేదికగా ఈ నెల‌ 27న స్పెయిన్, అర్జెంటీనా జట్ల మధ్య జరగాల్సిన ప్రతిష్ఠాత్మక ‘ఫైనలిసిమా’ మ్యాచ్‌పై సందేహాలు నెలకొన్నాయి. ఈ మ్యాచ్‌లో గెలిచి మరో ట్రోఫీని తన ఖాతాలో వేసుకోవాలని మెస్సీ భావిస్తున్న తరుణంలో ఈ పరిస్థితి తలెత్తింది. పరిస్థితిని నిశితంగా గమనిస్తున్నామని యూరోపియన్ ఫుట్‌బాల్ సమాఖ్య (UEFA) తెలిపింది. ఇప్పటికే ఖతార్ తమ దేశంలోని అన్ని సాకర్ గేమ్‌లను తదుపరి ఆదేశాలు వచ్చేవరకు నిలిపివేసింది. సౌదీ క్లబ్ అల్-నసర్‌కు ఆడుతున్న క్రిస్టియానో రొనాల్డో జట్టు పాల్గొనాల్సిన ఆసియన్ ఛాంపియన్స్ లీగ్ మ్యాచ్ కూడా రద్దయింది.

ఫార్ములా 1 అభిమానుల్లోనూ ఆందోళన
మరోవైపు ఫార్ములా 1 అభిమానుల్లోనూ ఆందోళన నెలకొంది. వచ్చే నెలలో బహ్రెయిన్, సౌదీ అరేబియాలలో ఎఫ్‌1 రేసులు జరగాల్సి ఉంది. రేసులకు కొన్ని వారాల ముందే సిబ్బంది, సామగ్రిని తరలించాల్సి ఉన్నందున, నిర్ణయం తీసుకోవడానికి నిర్వాహకులకు ఎక్కువ సమయం లేదు. క్రీడాకారుల భద్రత, శ్రేయస్సే తమకు తొలి ప్రాధాన్యమని ఎఫ్‌1 పాలకమండలి ఎఫ్‌ఐఏ ప్రకటించింది.

కేవలం మ్యాచ్‌ల రద్దు మాత్రమే కాదు, ప్రయాణ ఆంక్షలు కూడా క్రీడాకారులను తీవ్రంగా వేధిస్తున్నాయి. దుబాయ్‌లో టోర్నీ ముగించుకున్న టెన్నిస్ స్టార్ డానిల్ మెద్వెదేవ్ సహా పలువురు ఆటగాళ్లు అక్కడి నుంచి బయటపడేందుకు విమానాల కోసం ఎదురుచూస్తున్నారు. అలాగే, టీ20 ప్రపంచకప్‌లో పాల్గొన్న వెస్టిండీస్ క్రికెట్ జట్టు భారత్‌లో చిక్కుకుపోయింది.

పరిస్థితిని సమీక్షిస్తున్న నిర్వాహకులు
గత దశాబ్ద కాలంగా సౌదీ అరేబియా, ఖతార్ వంటి దేశాలు క్రీడా ఈవెంట్లకు, పెట్టుబడులకు కీలక కేంద్రాలుగా మారాయి. సౌదీ అరేబియా 2034 ఫుట్‌బాల్ ప్రపంచకప్‌కు ఆతిథ్యం ఇవ్వనుండగా, ఖతార్ అనేక అంతర్జాతీయ టోర్నీలను నిర్వహిస్తోంది. తాజా యుద్ధ వాతావరణం ఈ దేశాల క్రీడా ప్రణాళికలపై తీవ్ర ప్రభావం చూపుతోంది. ఈ పరిణామాల నేపథ్యంలో టోర్నీల భవితవ్యంపై నిర్వాహకులు త్వరలోనే కీలక నిర్ణయాలు తీసుకునే అవకాశం ఉంది.