DC vs RR: ఐపీఎల్‌లో సంచ‌ల‌నం.. ఈ ఏడాది తొలి సూప‌ర్ ఓవ‌ర్‌లో ఢిల్లీ ఘ‌న విజ‌యం!

DC vs RR: ఢిల్లీ క్యాపిటల్స్ సూపర్ ఓవర్‌లో రాజస్థాన్ రాయల్స్‌ను (DC vs RR) ఓడించింది. అరుణ్ జైట్లీ స్టేడియంలో జరిగిన ఈ మ్యాచ్‌లో ఢిల్లీ మొదట బ్యాటింగ్ చేసి 188 పరుగులు చేసింది. బ‌దులుగా రాజస్థాన్ రాయల్స్ తరపున జైస్వాల్, నితీష్ రాణా అర్ధసెంచరీలు సాధించారు. కానీ వారి జట్టు కూడా 20 ఓవర్లలో 188 పరుగులు మాత్రమే చేయగలిగింది. దీంతో మ్యాచ్ ఫలితం సూపర్ ఓవర్ ద్వారా నిర్ణయించబడింది. ఇందులో ఢిల్లీ 2 పరుగుల తేడాతో రాజస్థాన్‌ను ఓడించింది.

రాజస్థాన్‌కు బ్యాటింగ్ లోపాలు

189 పరుగుల లక్ష్యాన్ని ఛేదించేందుకు బరిలోకి దిగిన రాజస్థాన్ రాయల్స్ బలమైన ఆరంభాన్ని అందుకుంది. జైస్వాల్, కెప్టెన్ సంజూ శాంసన్ మధ్య దృఢమైన ఓపెనింగ్ భాగస్వామ్యం నెలకొంది. కానీ శాంసన్ 31 పరుగుల వద్ద రిటైర్డ్ హర్ట్‌గా వెనుదిరిగాడు. రియాన్ పరాగ్ పోరాడుతూ కనిపించాడు. అతన్ని అక్షర్ పటేల్ 8 పరుగుల వద్ద క్లీన్ బౌల్డ్ చేశాడు. యశస్వీ జైస్వాల్ వరుసగా రెండో అర్ధసెంచరీ సాధించాడు. 37 బంతుల్లో 51 పరుగులు చేసి ఔటయ్యాడు. ఇంతకుముందు జైస్వాల్ ఆర్‌సీబీపై 75 పరుగుల తుఫాన్ ఇన్నింగ్స్ ఆడి సంచలనం సృష్టించాడు.
రాజస్థాన్ రెండో వికెట్ 112 పరుగుల వద్ద పడింది. ఆ తర్వాత నితీష్ రాణా, ధ్రువ్ జురెల్ బాధ్యత తీసుకున్నారు. రాజస్థాన్ సులభ విజయం వైపు సాగుతుండగా.. నితీష్ 51 పరుగుల వద్ద ఔటయ్యాడు. అక్కడి నుండి మ్యాచ్ ఉత్కంఠగా మారింది. చివరి ఓవర్‌లో రాజస్థాన్‌కు విజయం కోసం 9 పరుగులు అవసరం కాగా, మిచెల్ స్టార్క్ బౌలింగ్ చేశాడు.

రాజస్థాన్ వద్ద 7 వికెట్లు మిగిలి ఉండగా సెట్ బ్యాట్స్‌మన్ ధ్రువ్ జురెల్‌తో పాటు శక్తిమంతమైన ఆటగాడు షిమ్రాన్ హెట్‌మయర్ క్రీజ్‌లో ఉన్నాడు. కానీ చివరి ఓవర్‌లో సింగిల్-డబుల్ వ్యూహాన్ని అవలంబించడం రాజస్థాన్‌కు కొంపముంచింది. చివరి బంతికి 2 పరుగులు అవసరం కాగా, రాజస్థాన్ ఒక్క పరుగు మాత్రమే చేయగలిగింది. దీంతో మ్యాచ్ టై అయింది.

Also Read: Waqf Act : ఆలయ బోర్డుల్లో ముస్లింలకు చోటిస్తారా ? ‘వక్ఫ్’పై కేంద్రానికి సుప్రీం ప్రశ్న

సూపర్ ఓవర్ థ్రిల్

రాజస్థాన్ రాయల్స్ ఇన్నింగ్స్: ఢిల్లీ క్యాపిటల్స్ తరపున మిచెల్ స్టార్క్ బౌలింగ్ చేయగా.. షిమ్రాన్ హెట్‌మయర్, రియాన్ పరాగ్ బ్యాటింగ్‌కు వచ్చారు. మొదటి బంతి డాట్, రెండో బంతికి హెట్‌మయర్ ఫోర్ కొట్టాడు. మూడో బంతికి హెట్‌మయర్ ఒక పరుగు తీశాడు. నాల్గవ బంతికి రియాన్ పరాగ్ ఫోర్ కొట్టాడు. కానీ అది నో-బాల్‌గా ప్రకటించబడింది. అధికారిక నాల్గవ బంతికి రియాన్ పరాగ్ రనౌట్ అయ్యాడు. ఐదో బంతికి హెట్‌మయర్ 2 పరుగులు పరుగెత్తాలనుకున్నాడు. కానీ రెండో పరుగు పరుగెత్తుతుండగా జైస్వాల్ రనౌట్ అయ్యాడు. దీంతో సూపర్ ఓవర్‌లో ఢిల్లీకి 12 పరుగుల లక్ష్యం లభించింది.

ఢిల్లీ క్యాపిటల్స్ ఇన్నింగ్స్: ఢిల్లీ తరపున కేఎల్ రాహుల్, ట్రిస్టన్ స్టబ్స్ బ్యాటింగ్‌కు వచ్చారు. సందీప్ శర్మ బౌలింగ్ చేశాడు. మొదటి బంతికి కేఎల్ రాహుల్ 2 పరుగులు పరుగెత్తాడు. రెండో బంతికి రాహుల్ ఫోర్ కొట్టాడు. మూడో బంతికి సింగిల్ రన్ వచ్చింది. నాల్గవ బంతికి సందీప్ శర్మ మరోసారి షార్ట్ బాల్ వేయడంలో తప్పు చేశాడు. దీన్ని సద్వినియోగం చేసుకున్న ట్రిస్టన్ స్టబ్స్ సిక్సర్ కొట్టి ఢిల్లీ విజయాన్ని ఖరారు చేశాడు.