టీ20 క్రికెట్ లో చ‌రిత్ర సృష్టించిన భూటాన్ బౌల‌ర్ సోనమ్ యెషే

Sonam Yeshey

Sonam Yeshey : టీ20 క్రికెట్‌లో భూటాన్ బౌలర్ సోనం యేశే అరుదైన ప్రపంచ రికార్డు సృష్టించాడు. మయన్మార్‌తో జరిగిన మ్యాచ్‌లో కేవలం 7 పరుగులు ఇచ్చి 8 వికెట్లు పడగొట్టి, టీ20 ఫార్మాట్‌లో అత్యుత్తమ ప్రదర్శన కనబరిచిన తొలి బౌలర్‌గా నిలిచాడు. ఈ అద్భుత ప్రదర్శనతో భూటాన్ జట్టు ఘన విజయం సాధించింది. ఇది క్రికెట్ చరిత్రలో ఒక మైలురాయిగా నిలిచిపోతుంది.

• భూటాన్ క్రికెటర్ అరుదైన రికార్డు
• మలేషియాతో మ్యాచ్‌లో రికార్డు సృష్టించిన యేశే
• 45 పరుగులకే మలేషియా ఆలౌట్

టీ20 క్రికెట్ అంటేనే సిక్సర్ల మోత.. బాల్ దొరికిందా బాదుడే బాదుడు. అలాంటి టీ20 ఫార్మాట్‌లో బౌలర్లు రాణించడమంటే చాలా అరుదనే చెప్పొచ్చు. ఈ పొట్టి ఫార్మాట్‌లో నాలుగు వికెట్లు తీశారంటేనే అబ్బో మామూలుగా బౌలింగ్ చేయలేదుగా అంటారు. అలాంటిది ఓ బౌలర్ ఏకంగా 8 వికెట్లు పడగొట్టి ప్రపంచ రికార్డు సృష్టించారు.

భూటాన్ క్రికెట్ చరిత్రలోనే కాదు, ప్రపంచ టీ20 క్రికెట్‌లోనూ అరుదైన ఘనత నమోదైంది. భూటాన్‌కు చెందిన లెఫ్ట్ ఆర్మ్ స్పిన్నర్ సోనం యేశే అద్భుత ప్రదర్శనతో క్రికెట్ చరిత్రలో తన పేరును లిఖించుకున్నాడు. నాలుగు ఓవర్లలో ఎనిమిది వికెట్లు పడగొట్టి, టీ20 ఫార్మాట్‌లో ఈ ఘనత సాధించిన తొలి బౌలర్‌గా నిలిచాడు.

గెలెఫు వేదికగా మయన్మార్‌తో జరిగిన మూడో టీ20 అంతర్జాతీయ మ్యాచ్‌లో సోనం యేశే ఈ అద్భుత స్పెల్ నమోదు చేశాడు. 127 పరుగుల లక్ష్యంతో బరిలోకి దిగిన మయన్మార్ జట్టు, యేశే స్పిన్ దెబ్బకు కేవలం 45 పరుగులకే ఆలౌట్ అయింది. యేశే నాలుగు ఓవర్లలో 7 పరుగులు మాత్రమే ఇచ్చి 8 వికెట్లు తీసి మ్యాచ్‌ను ఏకపక్షంగా మార్చేశాడు.

ఇప్పటివరకు పురుషుల టీ20 అంతర్జాతీయ క్రికెట్‌లో అత్యుత్తమ బౌలింగ్ ప్రదర్శనగా ఏడు వికెట్ల ఘనత మాత్రమే ఉంది. కానీ సోనం యేశే ఆ రికార్డును దాటేసి, సరికొత్త చరిత్ర సృష్టించాడు. అంతర్జాతీయ మ్యాచ్‌లకే కాకుండా, మొత్తం టీ20 క్రికెట్‌లోనూ ఇది ఎవ్వరూ చెరపలేని రికార్డుగా నిలిచింది.

ఈ సిరీస్ మొత్తం మీద కూడా యేశే అద్భుత ఫామ్‌లో ఉన్నాడు. నాలుగు మ్యాచ్‌ల్లో కలిపి 12 వికెట్లు తీసి భూటాన్ విజయంలో కీలక పాత్ర పోషించాడు. 2022లో మలేషియాతో జరిగిన మ్యాచ్‌లో టీ20 అంతర్జాతీయ అరంగేట్రం చేసిన యేశే, ఇప్పటివరకు 34 టీ20 అంతర్జాతీయ మ్యాచ్‌ల్లో 37 వికెట్లు సాధించాడు. భూటాన్ వంటి ఎదుగుతున్న క్రికెట్ దేశం నుంచి వచ్చిన ఈ అరుదైన ప్రదర్శన, ప్రపంచ క్రికెట్ దృష్టిని ఆకర్షిస్తోంది. సోనం యేశే ప్రదర్శన యువ క్రికెటర్లకు ప్రేరణగా నిలుస్తుందని క్రికెట్ విశ్లేషకులు అభిప్రాయపడుతున్నారు.

Follow us