Hamali Post: వామ్మో.. హమాలీ ఉద్యోగం రూ. 60 లక్షలు.. ఎక్కడంటే..?

Jpg

సాఫ్ట్ వేర్ జాబ్ కోసం, ప్రభుత్వ ఉద్యోగం కోసం నిరుద్యోగులు లక్షల రూపాయలు కుమ్మరిస్తూ ఉంటారు. డబ్బులు ఖర్చు పెట్టి ఉద్యోగాలు పొందుతూ ఉంటారు. రూ.లక్షల్లో జీతం వచ్చే ఉద్యోగాలను డబ్బులతో కొనేస్తారు. లక్షల్లో జీతం వచ్చే ఉద్యోగాలను డబ్బులు ఖర్చు పెట్టి సంపాదించుకునే విషయం ఒకవైపు ఉంచితే.. హమాలీ పనికి రూ.లక్షలు ఖర్చు పెట్టడం ఇప్పుడు అందరినీ ఆశ్చర్యానికి గురి చేస్తోంది. మెదక్ జిల్లాలోని కొల్చారం మండలం చిన్నఘనపూర్‌లో చోటుచేసుకున్న ఈ వ్యవహారం షాక్‌కు గురి చేస్తోంది. స్థానికంగా ఉన్న ఐఎంఎఫ్‌ఎల్ మద్యం డిపోలో హమాలీ పోస్టుకు హమాలీ మజ్దూర్ యూనియన్ వేలం పాట నిర్వహించింది. ఈ వేలంపాట రసవత్తరంగా జరిగింది.

మెదక్ జిల్లా కొల్చారం మండలం చిన్నఘనపూర్ లో ఉన్న స్వదేశీ మద్యం (ఐఎంఎల్) డిపోలో హమాలీ ఉద్యోగం ఏకంగా రూ. 60. 10 లక్షలు పలికింది. హమాలీ సంఘం సభ్యులు ఒక పోస్టుకు వేలం నిర్వహించగా నలుగురు పోటీ పడ్డారు. వీరిలో ఒకరు రూ. 60. 10 లక్షలకు వేలంపాడి పోస్ట్ దక్కించుకున్నారు. డిపోలో మద్యం సీసాల పెట్టెలు వాహనాలలో ఎక్కించడం, దించడం హమాలీ పని.

హమాలీ పనిలో కనీసం రూ.2500 నుంచి రూ. 5000 వరకు సంపాదించొచ్చు. ఈ డిపో నుంచి ఉమ్మడి మెదక్ జిల్లాలోని సుమారు 60 మద్యం దుకాణాలు, 12 బార్ అండ్ రెస్టారెంట్లకు మద్యం సరఫరా అవుతుంది. వివిధ మద్యం కంపెనీల నుంచి వచ్చిన మద్యం కాటన్లను గోదాములలోకి దిగుమతి చేసుకోవడం, గోదాముల నుంచి వైన్స్, రెస్టారెంట్లకు ఎగుమతి చేసేందుకు ఇక్కడ హమాలీలు పనిచేస్తారు. నాగం సతీశ్ అనే హమాలీ అనారోగ్యంతో పనిని మానేయడంతో దాని కోసం ఆదివారం వేలం నిర్వహించగా ఓ వ్యక్తి రూ.60.10 లక్షలు చెల్లించి కొనుగోలు చేసాడు.

Follow us