బీజేపీలోకి ఘర్ వాపసీ , తమిళనాట రాజకీయాలు ఇంకాస్త రసవత్తరం

Ttv Dhinakaran Rejoins Nda

తమిళనాడు అసెంబ్లీ ఎన్నికల సమయం దగ్గరపడుతుండటంతో ఆ రాష్ట్ర రాజకీయాలు శరవేగంగా మారుతున్నాయి. ప్రస్తుత ఎన్నికల బరిలో అధికార డీఎంకే (DMK), ప్రతిపక్ష ఏఐఏడీఎంకే (AIADMK) తో పాటు, దళపతి విజయ్ నేతృత్వంలోని తమిళగ వెట్రి కజగం (TVK) పార్టీలు ప్రధానంగా తలపడుతుండటంతో త్రిముఖ పోటీ ఖాయంగా కనిపిస్తోంది. ముఖ్యంగా నటుడు విజయ్ నేరుగా ముఖ్యమంత్రి అభ్యర్థిగా బరిలోకి దిగుతుండటంతో యువతలో విపరీతమైన ఆసక్తి నెలకొంది. ఈ సవాలును ఎదుర్కొని వరుసగా రెండోసారి అధికారాన్ని నిలబెట్టుకోవడానికి ముఖ్యమంత్రి స్టాలిన్ వ్యూహాలకు పదును పెడుతుండగా, అన్నాడీఎంకే సైతం బీజేపీతో పొత్తు కుదుర్చుకుని అధికార పీఠాన్ని దక్కించుకోవాలని గట్టి ప్రయత్నాలు చేస్తోంది.

Dhinakaran

ఈ ఉత్కంఠభరిత వాతావరణంలో బీజేపీ నేతృత్వంలోని ఎన్డీఏ (NDA) కూటమికి పెద్ద ఊరట లభించింది. గతంలో కూటమి నుండి బయటకు వెళ్లిన టీటీవీ దినకరన్ నేతృత్వంలోని అమ్మ మక్కల్ మున్నేట్ర కజగం (AMMK) పార్టీ తిరిగి ఎన్డీఏ గూటికి చేరింది. కేంద్రమంత్రి పియూష్ గోయెల్‌తో భేటీ అయిన అనంతరం దినకరన్ ఈ విషయాన్ని అధికారికంగా ప్రకటించారు. 2024 లోక్‌సభ ఎన్నికల సమయంలో ఎడప్పాడి పళనిస్వామి నాయకత్వంపై అసంతృప్తితో కూటమిని వీడిన దినకరన్, ప్రత్యామ్నాయ రాజకీయ వేదికల కోసం ప్రయత్నించినప్పటికీ అవి ఫలించలేదు. చివరకు డీఎంకేను ఓడించడమే లక్ష్యంగా రాజకీయ విభేదాలను పక్కన పెట్టి ఎన్డీఏతో చేతులు కలిపినట్లు ఆయన స్పష్టం చేశారు.

దినకరన్ పునరాగమనం తమిళనాడులో జయలలిత వారసత్వాన్ని నమ్మే ఓటర్ల మధ్య ఐక్యతను తెచ్చే అవకాశం కనిపిస్తోంది. “అమ్మ జయలలిత నిజమైన అనుచరులమంతా ఏకమై స్థిరమైన ప్రభుత్వాన్ని అందిస్తాం” అని దినకరన్ చేసిన వ్యాఖ్యలు అన్నాడీఎంకే-బీజేపీ కూటమిలో కొత్త ఉత్సాహాన్ని నింపాయి. రాజకీయాల్లో రాజీ అనేది ఒక వ్యూహాత్మక నిర్ణయమని, రాష్ట్ర ప్రయోజనాల కోసమే తాను ఈ నిర్ణయం తీసుకున్నానని ఆయన వివరించారు. ఈ పరిణామం వల్ల అన్నాడీఎంకే కూటమి మరింత బలోపేతం కాగా, విజయ్ టీవీకే ప్రభావం మరియు డీఎంకే వ్యతిరేక ఓట్ల చీలికను అడ్డుకోవడంలో ఈ పొత్తు ఎంతవరకు సక్సెస్ అవుతుందనేది ఇప్పుడు సర్వత్రా ఆసక్తికరంగా మారింది.

Follow us