School Bus: స్కూల్ బ‌స్సుకు త‌ప్పిన ప్ర‌మాదం.. ప్ర‌మాద స‌మ‌యంలో 20 మంది!

School Bus: బెంగళూరు నగరంలోని మౌలిక సదుపాయాల లోపాలు మరోసారి స్పష్టమయ్యాయి. నగరంలోని పనత్తూరు-బాలగెరె రోడ్డుపై దాదాపు 20 మంది విద్యార్థులతో వెళ్తున్న ఓ స్కూల్ బస్సు (School Bus) బురదలో కూరుకుపోయిన గుంతలో ఇరుక్కుపోయి, బోల్తా పడకుండా తృటిలో తప్పించుకుంది. ఈ ఘటన శుక్రవారం చోటుచేసుకుంది. ఈ ప్రమాదంలో ఎవరికీ గాయాలు కానప్పటికీ బస్సులోని పిల్లలను వెనుక తలుపు ద్వారా సురక్షితంగా బయటకు తీయాల్సి వచ్చింది. ఈ సంఘటన స్థానికులలో తీవ్ర ఆగ్రహాన్ని రేకెత్తించింది.

ఈ ఘటనకు సంబంధించిన వీడియో, ఫోటోలు సోషల్ మీడియాలో వైరల్ అయ్యాయి. వీటిపై స్పందించిన ప్రజలు.. గుంతలమయమైన రోడ్లపై ప్రభుత్వం నిర్లక్ష్యాన్ని తీవ్రంగా విమర్శిస్తున్నారు. ఒక నివాసి తన సోషల్ మీడియా పోస్టులో “సుమారు 20 మంది పిల్లలతో వెళ్తున్న స్కూల్ బస్సు గుంతలు, బురదతో నిండిన పనత్తూరు-బాలగెరె రోడ్డుపై దాదాపు బోల్తా పడబోయింది” అని పేర్కొన్నారు. ఈ పోస్ట్ 3,000 కంటే ఎక్కువ మంది వీక్షించగా చాలామంది స్పందించారు. కొందరు బస్సు డ్రైవర్ నిర్లక్ష్యాన్ని ఆరోపించగా, చాలామంది అధికారులు సమయానికి రోడ్డు మరమ్మతులు చేయకపోవడమే ఈ పరిస్థితికి కారణమని విమర్శించారు. ఒక నెటిజన్ అయితే “బెంగుళూరును 10 సంవత్సరాల పాటు కేంద్రపాలిత ప్రాంతంగా మార్చి నగరాన్ని అభివృద్ధి చేయాలి” అని వ్యాఖ్యానించారు.

Also Read: PM Modi To Visit Manipur: రేపు మణిపూర్ పర్యటనకు ప్రధాని నరేంద్ర మోదీ!

మరింత విడ్డూరమేమిటంటే.. కొన్ని నెలల క్రితం ఇదే రహదారిని ముఖ్యమంత్రి సిద్ధరామయ్య, ఉప ముఖ్యమంత్రి డి.కె. శివకుమార్ పరిశీలించారు. అయినప్పటికీ రహదారి పరిస్థితిలో ఎటువంటి మార్పు రాలేదని ప్రజలు అసంతృప్తి వ్యక్తం చేస్తున్నారు. అధికారుల పర్యవేక్షణ ఉన్నప్పటికీ మౌలిక సదుపాయాలు ఇంత అధ్వాన్నంగా ఉండడంపై అనేక ప్రశ్నలు తలెత్తుతున్నాయి. బెంగళూరు వంటి ఒక ప్రధాన నగరంలో స్కూల్ పిల్లలు ప్రయాణించే రోడ్డు పరిస్థితి ఇంత దారుణంగా ఉండడం ఆందోళన కలిగించే విషయం. ఇది కేవలం ఒక బస్సు ప్రమాదం మాత్రమే కాదని, నగరంలోని మొత్తం రహదారి వ్యవస్థ ఎంత ప్రమాదకరంగా ఉందో తెలియజేస్తుందని విశ్లేషకులు అభిప్రాయపడుతున్నారు.