Andhra King Taluka Review : రామ్ పోతినేని ఆంధ్రా కింగ్ తాలూకా మూవీ రివ్యూ!

Andhra King

దండలు, అగరబొత్తులు, కొబ్బరికాయలు, పాలాభిషేకాలు, విజిల్స్, క్లాప్స్.. తమ అభిమాన హీరో సినిమా రిలీజ్ అవుతుందంటే ఒక వీరాభిమాని బుర్రలో ఇవి తప్ప ఇంకేం ఉండవ్. సినిమాకి హిట్ టాక్ వస్తే జేబులో డబ్బులు తీసి పార్టీలు ఇవ్వడం.. అదే ఫ్లాప్ అని తెలిస్తే బీరు తాగి బాధపడటం.. ఇదే సగటు అభిమాని జీవితం.. అంతేనా!!

ఒక్కసారి అభిమానిస్తే జీవితాంతం గుండెల్లో పెట్టుకొని తిరిగే పిచ్చోళ్లయ్యా ఫ్యాన్స్ అంటే..! తమ హీరోకి చిన్న గాయమైతే గుండెల్లో ముల్లు దిగినట్లు బాధపడే వెర్రోళ్లయ్యా ఫ్యాన్స్ అంటే..! నువ్వు హిట్ కొడితే కాలర్ ఎగరేస్తారు.. ! నువ్వు బాధపడితే తల్లడిల్లిపోతారు..! నువ్వు అడక్కుండానే హిట్లు ఇస్తారు.. నువ్వు అడిగితే ప్రాణాలైనా ఇచ్చేస్తారు.. !.. అదయ్యా ఫ్యాన్ అంటే..! సర్లే కానీ ఒక ఫ్యాన్ బయోపిక్ కదా.. మరి ఆ మాత్రం ఉంటదిలే..! సర్లే ‘ఆంధ్రా కింగ్ తాలుకా’ రివ్యూలోకి వెళ్లిపోదాం.

హీరోగా ఒక వెలుగు వెలిగి.. కెరీర్‌లో ఎన్నో బ్లాక్ బస్టర్లు, సూపర్ హిట్లు, రికార్డులు, అవార్డులు చూసిన హీరో, ఆంధ్రా కింగ్.. సూర్య (ఉపేంద్ర). అయితే వరుసగా 9 ఫ్లాపులు పడటంతో సూర్య 100వ సినిమా షూటింగ్ మధ్యలోనే ఆగిపోతుంది. బయ్యర్లు రాక నిర్మాత భయపడి సినిమాపై ఇక ఖర్చు చేయలేక చేతులెత్తేస్తాడు. మరోవైపు నీ వల్లే నష్టపోయాం అంటూ డిస్ట్రిబ్యూటర్లు సూర్య ఇంటి ముందు నిరసనలు చేస్తుంటారు.

హీరోగా ఎంతోమందికి సాయం చేసిన సూర్య వైపు తొంగి చూసే వారు కూడా ఉండరు. 100వ సినిమా పూర్తి కావాలంటే రూ.3 కోట్లు అవసరం అవుతాయి. ఇక చేసేదేెం లేక తాను ఉంటున్న ఇల్లు, కార్లు అన్నీ అమ్మేసేందుకు సిద్ధపడతాడు. అలాంటి సమయంలో సూర్య అకౌంట్లోకి రూ.3 కోట్లు వచ్చిపడతాయి. అడిగినా సాయం చేయని తనకి అడక్కుండానే ఇంత చేసింది ఎవరా అని హీరో సూర్య కనుక్కుంటాడు. అప్పుడు అంత సాయం చేసింది తాను ఎన్నడూ చూడని తన అభిమాని సాగర్ (రామ్ పోతినేని) అని తెలుస్తుంది.

అభిమానం ఎలా ఉంటుందో తెలుసు కానీ.. తన హీరోకే సాయం చేసేంత పిచ్చి ఉంటుందా అని సూర్య షాకవుతాడు. ఎలాగైనా సాగర్‌ని కలవాలని ఉన్న పళాన బయలుదేరతాడు. ఆ ప్రయాణంలో తన ఫ్యాన్ సాగర్ గురించి సూర్య ఏం తెలుసుకుంటాడు? అసలు సూర్యకి రూ.3 కోట్లు ఇచ్చే అంత డబ్బు సాగర్‌కి ఎక్కడిది? అసలు జీవితంలో నేరుగా ఎప్పుడూ కలవని తన హీరోకి సాగర్ అంత సాయం ఎందుకు చేశాడు..? అనేది మిగిలిన కథ.

తనంటే ఫ్యాన్స్‌కి ఎంత ఇష్టమో, అభిమానమో, ప్రేమో, పిచ్చో ఒక హీరోకి నిజంగా తెలుసా? తెలుసని చాలా మంది హీరోలు మచెప్పొచ్చు.. మీ కోసమే బతుకుతున్నా అంటూ స్పీచ్‌లు ఇవ్వొచ్చు.. కానీ రియాలిటీలో మాత్రం థియేటర్ ముందు కటౌట్ కట్టి పాలాభిషేకం చేసే ఒక ఫ్యాన్ జీవితం గురించి.. ఏ హీరోకి తెలీదు. వాళ్లు కటౌట్‌పై పోసే పాలు కనిపించొచ్చు.. కానీ ఆ కటౌట్ కట్టేందుకు వాళ్లు పడే కష్టాలు మాత్రం ఖచ్చితంగా తెలీవు.

ఒక సినిమా పోతే హీరో బాధపడతాడేమో.. కానీ ఫ్యాన్ మాత్రం జీవితమే పోయింది అన్నట్లుగా ఫీలైపోతాడు.. ఇది అభిమానం అని హీరోలు అనుకోవచ్చు.. కానీ అది అభిమానం కాదు పిచ్చి.. అన్నది మరొక ఫ్యాన్‌కి మాత్రమే అర్థమవుతుంది. అలాంటి ఒక పిచ్చి అభిమాని తీసిన సినిమానే ఈ ‘ఆంధ్రా కింగ్ తాలుకా’.

ఇది ఒక ఫ్యాన్ బయోపిక్ అని ముందే డైరెక్టర్ ఒక క్లారిటీ ఇచ్చేశాడు. అందుకే ఇందులో కనిపించే ప్రతి సీన్‌కి నువ్వు కనెక్ట్ అవ్వాలంటే నీలో ఉన్న ఆ ఫ్యాన్ బయటికి రావాలి. ప్రతి ఒక్కరూ తమ లైఫ్‌లో ఏదో ఒక హీరోకి ఫ్యాన్ అయ్యే ఉంటారు. కొంతమంది చొక్కాలు చించేసుకునేంత అభిమానం చూపించొచ్చు.. కొంతమంది అదే చొక్కా వెనుక ఉన్న హృదయంలో అభిమానాన్ని దాచేయొచ్చు. కానీ ఈ సినిమా చూసినప్పుడు మాత్రం ఆ ఫ్యాన్ ఒక్కసారైనా సరే మీకు మళ్లీ కళ్ల ముందు కనిపిస్తాడు. నువ్వు పెంచుకున్న ఆ పిచ్చి అభిమానాన్ని మరోసారి గుర్తుచేస్తాడు.

“వాడు ఒకడు ఉన్నాడని నాకు తెలీకపోవచ్చు.. కానీ నేను ఒకడ్ని ఉన్నాననంటే అది వాడి వల్లే”.. అంటూ ఈ సినిమా క్లైమాక్స్‌లో ఉపేంద్ర చెప్పిన ఒక్క డైలాగ్‌ చాలు.. ఇందులో తన అభిమాన హీరో కోసం అభిమాని చేసిన త్యాగం ఏంటో అర్థమవుతుంది. నువ్వు ఎవరో తెలుసుకుందామని వచ్చి నేను ఎవరో తెలుసుకున్నా అంటూ ఉపేంద్ర చెప్పిన డైలాగ్‌కి థియేటర్లో విజిల్స్ వినిపించాయి.

ఈ సినిమాలో హీరోపై ఒక ఫ్యాన్ పెచ్చుకున్న అభిమానం ఎలా ఉంటుందో చూపించారు.. ప్రేమించిన అమ్మాయి కంటే తన హీరోనే తనకి ఎక్కువ అనే పిచ్చిని చూపించారు.. ఫ్యాన్స్‌ అంటే ఎలా ఉంటారో మరోసారి గుర్తుచేశారు. . నిజానికి ఈ సినిమా అభిమానులు కాదు.. హీరోలు కూడా చూడాలి.

ఈ సినిమాకి ప్రధాన బలం మాత్రం హీరో రామ్ యాక్టింగ్ అనే చెప్పాలి. ఇప్పటివరకూ రామ్ చాలానే రోల్స్ చేశాడు. లవర్ బాయ్‌గా, యాక్షన్ హీరోగా, మాస్ హీరోగా ఇలా చాలానే చేశాడు. కానీ ఇందులో ఒక అభిమానిగా రామ్ జీవించాడు. తన హీరో సినిమా కోసం కటౌట్లు పెట్టడం నుంచి ఫ్యాన్ వార్స్ అంటూ కొట్టుకోవడం వరకూ.. థియేటర్లో పేపర్లు చింపడం నుంచి పేపర్లో తన హీరో ఫొటో చూసి మురిసిపోవడం వరకూ.. అభిమానంతో మొదలై హీరో మీద పెంచుకున్న పిచ్చి వరకూ.. ప్రతి సీనులోనూ రామ్ యాక్టింగ్ చాలా బావుంది. రామ్ లుక్ కూడా ఫ్యాన్స్‌కి కొత్తగా అనిపిస్తుంది.

ఇక మహాలక్ష్మి పాత్రలో భాగ్యశ్రీ బోర్సే క్యూట్‌గా కనిపించింది. ముఖ్యంగా రామ్-భాగ్యశ్రీ మధ్య కెమిస్ట్రీ చాలా బావుంది. అలానే హీరో సూర్య పాత్రలో ఉపేంద్ర కరెక్ట్‌గా సరిపోయారు. క్లైమాక్స్‌లో ఉపేంద్ర యాక్టింగ్ చూశాక ఈ క్యారెక్టర్‌కి ఆయన్నే ఎందుకు తీసుకున్నారో ఆడియన్స్‌కి అర్థమవుతుంది. ఇక రావు రమేష్, మురళీ శర్మ, సత్య, రాహుల్ రామకృష్ణ, రాజీవ్ కనకాల, తులసి ఇలా ప్రతి ఒక్కరూ తమ పాత్రలకి న్యాయం చేశారు.

ఇక సినిమా నెగెటివ్స్ విషయానికొస్తే రన్‌టైమ్ ఇంకాస్త తగ్గించి ఉంటే బావుండేదేమో అనిపించింది. ఫస్టాఫ్‌లో ఇంకొన్ని సీన్లు ఎడిట్ చేసి ఉండొచ్చు. ఫ్యాన్స్‌కి ఇందులో చూపించిన ప్రతి సీన్ బాగా కనెక్ట్ అవుతుంది.. అయితే నార్మల్ ఆడియన్స్‌కి మాత్రం.. ఏంటి ఒక హీరో కోసం అభిమాని ఇంత త్యాగం చేసేస్తాడా అనే ఫీలింగ్ కలగొచ్చు. అయితే అలాంటి ఫ్యాన్స్ కూడా ఉన్నారు.. అన్నది అందరికీ అర్థం కాకపోవచ్చు.

డైరెక్టర్ మహేష్ బాబు పీ.. ఏ హీరో అభిమాని అన్న సంగతి పక్కన పెడితే.. ఒక అభిమాని జీవితం ఎలా ఉంటుందో మాత్రం బాగా చూపించాడు. పూర్తిగా ఫ్యాన్ కోణంలోనే తీసినా కూడా ఇందులో గోదారి లంక గ్రామాల గురించి అందులో ప్రజలు ఒకప్పుడు ఎదుర్కొన్న సమస్యల గురించి టచ్ చేసిన విధానం బావుంది. అలానే ఫ్యాన్-హీరో మధ్య సాగే అభిమానం అనే కథలో.. అభిమానికి పెట్టిన ప్రేమ కథ కూడా బాగానే వర్కవుట్ అయింది. “చిన్ని గుండెలో ఎన్ని ఆశలో” పాట చూడటానికి బావుంది. మొత్తానికి అయితే రామ్‌ చాన్నాళ్ల తర్వాత ఒక మంచి బొమ్మ చేశాడు.. హిట్టు చేస్తారా లేదా అన్నది తన అభిమానుల చేతుల్లోనే ఉంది.

Follow us