వీపీఎన్ సేవలపై జమ్మూ కాశ్మీర్ యంత్రాంగం నిషేధం!
ప్రభుత్వ నిర్ణయంపై విమర్శలు కూడా వెల్లువెత్తుతున్నాయి. సాధారణ పౌరుల గోప్యత, సమాచార సేకరణపై ఈ నిర్ణయం ప్రభావం చూపుతుందని కొందరు రాజకీయ నాయకులు వాదిస్తున్నారు.
- Author : Gopichand
Date : 08-01-2026 - 10:25 IST
Published By : Hashtagu Telugu Desk
VPN Services: జమ్మూ కాశ్మీర్ యంత్రాంగం కేంద్రపాలిత ప్రాంతంలోని మొత్తం 20 జిల్లాల్లో అనధికారిక వర్చువల్ ప్రైవేట్ నెట్వర్క్ సేవలపై సమగ్ర నిషేధాన్ని విధించింది. ఉగ్రవాదులు, వారి సహచరులు ఉపయోగిస్తున్న ఎన్క్రిప్టెడ్ కమ్యూనికేషన్ నెట్వర్క్లను ఛేదించడమే ఈ నిర్ణయం ముఖ్య ఉద్దేశ్యం. జాతీయ భద్రత, శాంతిభద్రతలు, సైబర్ భద్రతకు ముప్పు పొంచి ఉందన్న కారణంతో జిల్లా మెజిస్ట్రేట్లు ఈ ఉత్తర్వులు జారీ చేశారు.
ప్రస్తుతానికి ఈ నిషేధం రెండు నెలల పాటు అమల్లో ఉంటుంది. అయితే భద్రతా పరిస్థితుల సమీక్ష తర్వాత దీనిని పొడిగించే అవకాశం ఉంది. ఈ చర్య సాధారణ ప్రజలను ఇబ్బంది పెట్టడానికి కాదని, కేవలం భద్రతను పటిష్టం చేయడానికేనని యంత్రాంగం స్పష్టం చేసింది.
VPN నిషేధించబడిన జిల్లాలు
ఈ నిషేధం కాశ్మీర్ లోయలోని అన్ని 10 జిల్లాలతో పాటు జమ్మూ ప్రాంతంలోని కీలక జిల్లాల్లోనూ అమలు చేయబడింది. కాశ్మీర్ లోయలోని శ్రీనగర్, బుద్గాం, షోపియాన్, కుల్గాం, అనంత్నాగ్, కుప్వారా, గాందర్బల్, బండిపోరా, పుల్వామా, బారాముల్లా జిల్లాలు ఈ సేవలపై నిషేధం విధించాయి.
పోలీసులు, భద్రతా సంస్థలు మొబైల్ ఫోన్లను తనిఖీ చేస్తున్నాయి. అనధికారిక VPNలు ఉన్నవారిపై చర్యలు తీసుకుంటున్నాయి. నియమాలను ఉల్లంఘించిన వారిపై FIR నమోదు చేయడంతో పాటు విచారణ కూడా చేపడుతున్నారు. ఇప్పటివరకు సుమారు 800 నుండి 1000 మందిని విచారించినట్లు సమాచారం.
Also Read: పొదుపు సంఘాల వారికీ చంద్రబాబు తీపికబురు
దుర్వినియోగం చేస్తున్న దేశ వ్యతిరేక శక్తులు
డివిజనల్ కమిషనర్ అన్షుల్ గార్గ్ ఈ చర్యను సమర్థిస్తూ ఇటీవల సమాజ వ్యతిరేక, దేశ వ్యతిరేక శక్తులు నెట్వర్క్ను దుర్వినియోగం చేసిన సందర్భాలు వెలుగులోకి వచ్చాయని తెలిపారు. కొత్త క్రిమినల్ చట్టాల కింద అవసరమైన నిబంధనలను జిల్లా యంత్రాంగం, పోలీసులు అమలు చేశారు. ఉగ్రవాదులు, వారి మద్దతుదారులు తమ గుర్తింపును దాచుకోవడానికి, నిఘా నుండి తప్పించుకోవడానికి VPNలను వాడుతున్నారని నిఘా వర్గాల సమాచారం.
వ్యక్తీకరణ స్వేచ్ఛపై ఆంక్షలని ఆరోపణలు
ప్రభుత్వ నిర్ణయంపై విమర్శలు కూడా వెల్లువెత్తుతున్నాయి. సాధారణ పౌరుల గోప్యత, సమాచార సేకరణపై ఈ నిర్ణయం ప్రభావం చూపుతుందని కొందరు రాజకీయ నాయకులు వాదిస్తున్నారు. పిడిపి (PDP) నాయకురాలు ఇల్తిజా ముఫ్తీ స్పందిస్తూ.. ఇది వ్యక్తీకరణ స్వేచ్ఛపై ఆంక్షలు విధించడమేనని, క్షేత్రస్థాయి సమస్యల నుండి ప్రజల దృష్టిని మళ్లించడానికి ప్రభుత్వం ఇలా చేస్తోందని ఆరోపించారు. అయితే భద్రతను నిర్ధారించడానికి మాత్రమే ఈ చర్య తీసుకున్నామని, పరిస్థితులు సాధారణ స్థితికి రాగానే దీనిని సమీక్షిస్తామని యంత్రాంగం వెల్లడించింది.
Follow us
