DGCA : వాణిజ్య విమానాలకు డీజీసీఏ కీలక ఆదేశాలు

DGCA issues key directives for commercial flights

DGCA : ప్రస్తుత కాలంలో భారత్–పాకిస్థాన్ మధ్య ఉద్రిక్తతలు మళ్లీ పెరిగిన నేపథ్యంలో, వాణిజ్య విమానాల భద్రతపై డైరెక్టరేట్ జనరల్ ఆఫ్ సివిల్ ఏవియేషన్ (DGCA) కీలక నిర్ణయం తీసుకుంది. రక్షణశాఖకు చెందిన వైమానిక స్థావరాల్లో టేకాఫ్ లేదా ల్యాండింగ్ సమయంలో విమానాల్లోని కిటికీల షేడ్స్‌ (Window Shades)ను పూర్తిగా మూసివేయాలని డీజీసీఏ ఆదేశించింది. ముఖ్యంగా పాకిస్థాన్‌ సరిహద్దుకు సమీపంలోని పశ్చిమ భారత వైమానిక స్థావరాల్లో ఈ నిబంధన ఖచ్చితంగా పాటించాలని పేర్కొంది. ఈ నిబంధన విమానం టేకాఫ్ అయిన తర్వాత 10,000 అడుగుల ఎత్తు చేరేవరకు మరియు ల్యాండింగ్ సమయంలో ఆ ఎత్తు దిగిన తర్వాత వర్తిస్తుంది. అయితే, ఎమర్జెన్సీ ఎగ్జిట్ కిటికీలకు మాత్రం మినహాయింపు ఉన్నట్లు డీజీసీఏ వెల్లడించింది. ప్రయాణికులు విమాన ప్రయాణంలో రక్షణ సంబంధిత సమాచారాన్ని తెలియకుండానే పంచుకునే ప్రమాదాన్ని నివారించేందుకు, అలాగే ఆపరేషనల్ భద్రతను మెరుగుపరిచేందుకు ఈ చర్యలు తీసుకున్నట్లు డీజీసీఏ స్పష్టం చేసింది.

Read Also: Monsoon : వర్షాకాలంలో అంటువ్యాధులు రాకుండా ఉండాలంటే..ఇవి తినాల్సిందే !

ఇప్పటికే భారత ప్రభుత్వం పాకిస్థాన్‌కు చెందిన విమానాలకు భారత గగనతల వినియోగంపై విధించిన నిషేధాన్ని జూన్ 23 వరకు పొడిగించింది. ఇదే సమయంలో పాకిస్థాన్‌ కూడా భారత విమానాలకు తమ గగనతలాన్ని మూసివేసింది. ఈ నిషేధం జూన్ 24 తెల్లవారుజామున 4.59 గంటల వరకు కొనసాగుతుంది. ఇది అంతర్జాతీయ సివిల్ ఏవియేషన్‌ ఆర్గనైజేషన్‌ (ICAO) నిబంధనలకు విరుద్ధంగా ఉండవచ్చన్న విశ్లేషణలు ఉన్నా, ఇరు దేశాల మధ్య కొనసాగుతున్న ఉద్రిక్తతల కారణంగా ఈ నిర్ణయాలు అమలులో ఉన్నట్లు తెలుస్తోంది. ఇక, డీజీసీఏ తీసుకున్న మరో ముఖ్య నిర్ణయం ప్రకారం, రక్షణ వైమానిక స్థావరాల పరిధిలో ఫోటోగ్రఫీ మరియు వీడియోగ్రఫీపై ఉన్న నిషేధం గురించి ప్రయాణికులను ముందుగానే అప్రమత్తం చేయాలని విమానయాన సంస్థలకు ఆదేశాలు జారీ చేసింది. ఈ నిషేధాన్ని ఉల్లంఘిస్తే ఏవిధమైన శిక్షలు లేదా చర్యలు ఎదుర్కోవాల్సి వస్తుందన్న సమాచారం ప్రయాణికులకు ఇవ్వాలని స్పష్టంగా పేర్కొంది.

ఈ ఆదేశాలు ప్రత్యేకించి ఈ క్రింది వైమానిక స్థావరాల్లో తప్పనిసరిగా అమలులోకి రావాలి. లేహ్, శ్రీనగర్, జమ్ము, పఠాన్‌కోట్, ఆదంపుర్, చండీగఢ్, బఠిండా, జైసల్మేర్, నాల్, జోధ్‌పుర్, హిండన్, ఆగ్రా, కాన్పుర్, బరేలీ, మహారాజ్‌పుర్, గోరఖ్‌పుర్, భుజ్, లొహెగావ్, డాబోలిమ్ (గోవా), విశాఖపట్నం. ఇటీవల పహల్గాం ఉగ్రదాడికి భారత బలగాలు “ఆపరేషన్ సిందూర్” ద్వారా గట్టి బదులు ఇచ్చాయి. దాంతో తీవ్ర స్థాయిలో రెచ్చిపోయిన పాకిస్థాన్ కొన్ని దౌత్యపరమైన చర్యలు చేపట్టింది. రెండు దేశాల మధ్య కాల్పుల విరమణ ఒప్పందం అమలులో ఉన్నప్పటికీ, అంతర్గత ఉద్రిక్తతలు ఇంకా కొనసాగుతూనే ఉన్నాయి. ఈ పరిస్థితుల్లో డీజీసీఏ తీసుకున్న ఈ జాగ్రత్త చర్యలు, విమాన భద్రతపై ప్రభుత్వ దృష్టిని తెలియజేస్తున్నాయి. ఈ చర్యలు ప్రయాణికుల భద్రతను మాత్రమే కాకుండా, దేశ భద్రతను కూడా దృష్టిలో పెట్టుకుని తీసుకున్నవి.

Read Also: Film Chamber : జూన్‌ 1 నుంచి థియేటర్ల బంద్‌ ఉండదు: ఫిల్మ్‌ ఛాంబర్‌

Follow us